రాయలసీమ న్యూస్, ఇంటర్నేషనల్ డెస్క్: బంగ్లాదేశ్‌లోని చటోగ్రామ్ ఎక్స్‌పోర్ట్ ప్రాసెసింగ్ జోన్‌లో ఉన్న ప్రముఖ డెనిమ్ తయారీ సంస్థ పసిఫిక్ జీన్స్ లిమిటెడ్ తన అత్యంత పాత ఫ్యాక్టరీ యూనిట్ అయిన యూనిట్–1ను తాత్కాలికంగా మూసివేసింది. అయితే సోషల్ మీడియాలో ప్రచారం జరుగుతున్నట్లుగా సంస్థ మొత్తాన్ని మూసివేయలేదని, భవన భద్రతా కారణాల దృష్ట్యా కేవలం ఒక పాత విభాగాన్ని మాత్రమే కూల్చివేసి, సరికొత్తగా పునర్నిర్మించేందుకు ఈ నిర్ణయం తీసుకున్నట్లు యాజమాన్యం స్పష్టం చేసింది.
సుమారు 34 ఏళ్ల నాటి ఈ పాత ఫ్యాక్టరీ భవనం నిర్మాణపరంగా బలహీనపడిందని, ఏ సమయంలోనైనా కూలిపోయే ప్రమాదం ఉందని RMG Sustainability కౌన్సిల్ (RSC) నిర్వహించిన ఆడిట్‌లో తేలింది. అంతర్జాతీయ కొనుగోలుదారుల భద్రతా ప్రమాణాలకు అనుగుణంగా, కార్మికుల ప్రాణ భద్రతను దృష్టిలో పెట్టుకుని యూనిట్–1 కార్యకలాపాలను నిలిపివేసి భవనాన్ని కూల్చివేయాలని పసిఫిక్ జీన్స్ యాజమాన్యం నిర్ణయించింది.
ఈ మూసివేత కారణంగా దాదాపు 5,000 మంది కార్మికులు ఉపాధి కోల్పోతున్నారు. బంగ్లాదేశ్ కార్మిక చట్టాల ప్రకారం వీరందరికీ రావలసిన జీతాలు, అలవెన్సులు, ఓవర్‌టైమ్ బకాయిలు మరియు పూర్తి నష్టపరిహారాన్ని దశలవారీగా చెల్లిస్తూ సేవలను ముగిస్తున్నట్లు సంస్థ తెలిపింది. కార్మికుల హక్కులు, చట్టబద్ధమైన ప్రయోజనాలు కాపాడే విధంగా ప్రక్రియ కొనసాగుతోందని యాజమాన్యం పేర్కొంటోంది.
ఇదిలా ఉండగా, పసిఫిక్ జీన్స్ గ్రూప్ కు చెందిన మిగిలిన 9 ఫ్యాక్టరీలు, అలాగే యూనిట్–2 యథావిధిగా పూర్తి సామర్థ్యంతో నడుస్తున్నాయని స్పష్టంచేశారు. వాటిలో పనిచేస్తున్న 30,000కు పైగా ఉద్యోగులకు ఎలాంటి ప్రమాదం లేదని, వారి ఉపాధిపై ఎలాంటి ప్రభావం పడలేదని సంస్థ వర్గాలు తెలియజేశాయి. సోషల్ మీడియాలో వస్తున్న “సంస్థ మొత్తం మూతపడింది” అనే వార్తలు అసత్యమని, వాస్తవ పరిస్థితి పూర్తిగా భిన్నమని అవి పేర్కొన్నాయి.
యూనిట్–1 భవనాన్ని కూల్చివేసిన తర్వాత, అదే ప్రాంగణంలో వచ్చే దాదాపు ఒకన్నర సంవత్సరాల్లో అత్యాధునిక, పర్యావరణహిత బహుళ అంతస్తుల ఫ్యాక్టరీని నిర్మించేందుకు పసిఫిక్ జీన్స్ ప్రణాళికలు సిద్ధం చేసింది. ఈ కొత్త యూనిట్ ప్రారంభమయ్యే సమయానికి దాదాపు 10,000 మందికి కొత్తగా ఉద్యోగ అవకాశాలు కల్పించగలమని సంస్థ మేనేజింగ్ డైరెక్టర్ సయ్యద్ ఎమ్ తన్వీర్ వెల్లడించారు.
వీడియో కోసం ఈ క్రింది లింక్ ద్వారా మా మా రాయలసీమ న్యూస్ వాట్సాప్ ఛానల్ లో జాయిన్ అవండి..
