రాయలసీమ న్యూస్, ఇంటర్నేషనల్ డెస్క్: స్పెయిన్ రాజధాని మాడ్రిడ్‌కు దక్షిణంగా ఉన్న ఉర్దా సమీపంలో రెండు హైస్పీడ్ రైళ్లు ఢీకొన్న భయానక ప్రమాదంలో 68 మంది ప్రాణాలు కోల్పోయారు. ఈ మరణాల సంఖ్యను కాస్టిల్లా-లా మాంచా ప్రాంతీయ ప్రభుత్వం అధికారికంగా ధృవీకరించింది. రెండు రైళ్లలో కలిపి 500 మందికి పైగా ప్రయాణికులు ఉన్నట్లు అధికారులు అంచనా వేస్తున్నారు.
సహాయక చర్యలు కొనసాగుతుండగా, మృతుల సంఖ్య మరింత పెరిగే అవకాశం ఉందన్న ఆందోళన వ్యక్తమవుతోంది. ప్రమాద స్థలానికి పెద్ద సంఖ్యలో అగ్నిమాపక సిబ్బంది, అత్యవసర సేవల బృందాలు చేరుకుని గాయపడిన వారిని సమీప ఆసుపత్రులకు తరలిస్తున్నాయి.
అందులో రైలు బోగీలు పట్టాలు తప్పి బోల్తా పడి ఉండటం, మొదటి బోగీ తీవ్రంగా దెబ్బతినడం, చుట్టూ శిథిలాలు చెల్లాచెదురుగా పడి ఉండటం స్పష్టంగా కనిపిస్తోంది. మరో వీడియోలో అనేక ఎమర్జెన్సీ వాహనాలు, రెస్క్యూ సిబ్బంది, దుప్పట్లు కప్పుకుని గడ్డి మీద పడుకుని ఉన్న బాధితులు కనిపించారు. ఒక వ్యక్తికి IV బ్యాగ్ అమర్చిన దృశ్యాలు కూడా నమోదయ్యాయి.
ప్రమాదం జరిగిన తర్వాత తీసిన డ్రోన్ ఫోటోలను స్పానిష్ సివిల్ గార్డ్ విడుదల చేసింది. పట్టాలు తప్పిన కోచ్‌ల చుట్టూ డజన్ల కొద్దీ వాహనాలు, హెలికాప్టర్లు, అంబులెన్సులు కనిపిస్తున్నాయి. గాయపడిన పలువురు నేలపై పడుకుని చికిత్స కోసం ఎదురుచూస్తున్నట్లు ఆ చిత్రాలు తెలియజేస్తున్నాయి.
ఈ ప్రమాదంలో కనీసం 64 మంది మరణించారని ముందుగా రీజనల్ గవర్నమెంట్ వర్గాలు స్పానిష్ మీడియాకు వెల్లడించగా, అనంతరం మృతుల సంఖ్య 68కు పెరిగింది. సహాయక చర్యలు ఇంకా కొనసాగుతున్నాయి. ప్రైవేట్ సంస్థ Iryo రైల్ కు చెందిన ట్రైన్‌లో 147 మంది, దానిని ఢీకొట్టిన హైస్పీడ్ రైల్లో 397 మంది ప్రయాణికులు ఉన్నట్లు అధికారులు తెలిపారు.
గత జనవరిలో 46 మంది ప్రాణాలు కోల్పోయిన ఆడామస్ రైలు దుర్ఘటన కంటే ఈ ప్రమాదం మరింత తీవ్రమై ఉండొచ్చని స్పానిష్ మీడియాతో మాట్లాడిన అధికార వర్గాలు పేర్కొన్నాయి.
“గందరగోళం, చాలామంది బయటకు రాలేకపోయారు”
ప్రమాదానికి సంబంధించిన ఫుటేజ్‌లో అనేక కోచ్‌లు పట్టాలు తప్పి, పెద్ద మొత్తంలో శిథిలాలు చెల్లాచెదురుగా పడి ఉండటం కనిపిస్తోంది. ఒక మొబైల్ ఫోన్ వీడియోలో ఒక కోచ్ వెనుక భాగం పూర్తిగా ముక్కలైపోయినట్లు, నుజ్జునుజ్జు అయిన శిథిలాల మధ్య కొంతమంది నిలబడి ఉన్న దృశ్యాలు నమోదయ్యాయి.
ప్రమాదం తర్వాత అక్కడ “గందరగోళం” నెలకొందని, చాలామంది బయటకు రాలేకపోయారని 17 ఏళ్ల యువకుడు Eduardo Cadena Ser మీడియాకు చెప్పారు.
ఆగి ఉన్న Iryo రైలును హైస్పీడ్ రైలు వెనుక నుంచి ఢీకొట్టిందా అనే అంశంపై అధికారులు ఇంకా స్పష్టత ఇవ్వలేదు. ప్రమాదానికి సంబంధించి అధికారిక సాంకేతిక వివరాలు వెలువడలేదు. అయితే పట్టాలలో తలెత్తిన సమస్య కారణంగా ఒక రైలు నిలిచిపోగా, వెనుక నుంచి వచ్చిన హైస్పీడ్ రైలు దానిని ఢీకొట్టినట్లు స్థానిక వార్తా కథనాలు సూచిస్తున్నాయి.
ఆసుపత్రుల్లో అత్యవసర ఏర్పాట్లు, రక్తదాన పిలుపు
స్పానిష్ వార్తా సంస్థ EFE సమాచారం ప్రకారం, ప్రమాదం తర్వాత పెరుగుతున్న క్షతగాత్రులకు చికిత్స అందించేందుకు టోలెడో, సియుడాడ్ రియల్, అల్కాజర్ డి శాన్ జువాన్‌లోని ఆసుపత్రులు ముందుగా షెడ్యూల్ చేసిన ఆపరేషన్లను వాయిదా వేశాయి. వైద్య అవసరాలు పెరిగే అవకాశం ఉందని పేర్కొంటూ, మాడ్రిడ్ రక్త మార్పిడి కేంద్రం రక్తదానాల కోసం “ఎమర్జెన్సీ కాల్” జారీ చేసింది. టోలెడో బ్లడ్ బ్యాంకు కూడా రక్తదానాల కోసం ప్రజలను విజ్ఞప్తి చేసినట్లు స్పానిష్ మీడియా కథనాలు తెలిపాయి.
BBC కరస్పాండెంట్లు థామస్ కోప్ ల్యాండ్ , Marlyn థామస్ , శేరి రీడర్ ల సమాచారం ప్రకారం, పెద్ద సంఖ్యలో అగ్నిమాపక సిబ్బంది, సహాయక బృందాలు సంఘటనా స్థలానికి చేరుకున్నాయి. హెలికాప్టర్లు, అంబులెన్సులు సహాయక చర్యల్లో పాల్గొంటున్నాయి. డ్రోన్ చిత్రాలు ప్రమాద స్థలంలో అత్యవసర వాహనాలు, రెస్క్యూ బృందాలు గుమికూడిన దృశ్యాలను చూపించాయి.
రాజకీయ కార్యక్రమాల రద్దు, భద్రతపై వాదోపవాదాలు
ప్రమాదం తర్వాత స్పెయిన్‌లోని చాలా రాజకీయ పార్టీలు బుధవారం జరగాల్సిన తమ ఎన్నికల కార్యక్రమాలను రద్దు చేసుకున్నాయి. ప్రధానమంత్రి పెడ్రో శాంచెజ్ , చట్టసభ సభ్యులు తమ కార్యక్రమాలను నిలిపివేసి పరిస్థితిని పర్యవేక్షిస్తున్నారు. ప్రతిపక్ష కన్సర్వేటివ్ నాయకుడు అల్బెర్టో నూనెజ్ ఫెయిజూ తో పాటు నవంబర్ 29న జరగనున్న ఎన్నికల్లో పోటీ చేస్తున్న అనేక మంది అభ్యర్థులు కూడా తమ ప్రచార కార్యక్రమాలను రద్దు చేశారు.
అయితే మితవాద వోక్స్ పార్టీ మాత్రం భిన్నంగా స్పందించింది. దేశంలో రైల్వేల భద్రతలో ఉన్న లోపాలను ఇలాంటి సంతాప కార్యక్రమాలతో కప్పిపుచ్చలేమని, అలాంటి ప్రయత్నాలకు తమ పార్టీ సహకరించబోదని ఆ పార్టీ నాయకుడు శాంటియాగో బాస్కేల్ వ్యాఖ్యానించినట్లు వార్తా కథనాలు తెలిపాయి.
ప్రధాని సంతాపం, గత ప్రమాదాల జ్ఞాపకం
ప్రధానమంత్రి పెడ్రో శాంచెజ్ సోషల్ మీడియాలో సంతాప సందేశం పంపి, గాయపడిన వారికి, వారి కుటుంబాలకు సానుభూతి, మద్దతు తెలియజేశారు. ఈ ఏడాది జనవరిలో కూడా ఒకే లైన్‌పై వచ్చిన రెండు రైళ్లు ఢీకొన్న ఘటనలో 46 మంది మరణించిన విషయం గుర్తుచేస్తూ, తాజాగా జరిగిన ఈ భయానక రైలు ప్రమాదం తనను దిగ్భ్రాంతికి గురిచేసిందని ఆయన పేర్కొన్నట్లు స్పానిష్ మీడియా నివేదించింది.
