రాయలసీమ న్యూస్, కర్నూలు: కర్నూలు కలెక్టరేట్ ఎదుట ఆదివారం విద్యార్థులు, యువత ఆధ్వర్యంలో ధర్నా జరిగింది. విద్యార్థులు, యువత ప్రశ్నించే హక్కును హరించే విధంగా ఉన్న Rc.No.30/6/2025 ఉత్తర్వులను ప్రభుత్వం వెంటనే ఉపసంహరించుకోవాలని BC, SC, ST, మైనార్టీ, విద్యార్థి యువజన సమాఖ్య రాష్ట్ర అధ్యక్షుడు భరత్ కుమార్ ఆచారి డిమాండ్ చేశారు.
ఈ సందర్భంగా ఆయన మాట్లాడుతూ ప్రభుత్వం ఇటీవల జారీ చేసిన Rc.No.30/6/2025 ఉత్తర్వులు ప్రజాస్వామ్య విలువలకు విరుద్ధంగా ఉన్నాయని పేర్కొన్నారు. విద్యార్థులు, యువత తమ సమస్యలు, ప్రజా సమస్యలపై ప్రశ్నించే హక్కు రాజ్యాంగం కల్పించిన మౌలిక హక్కు అని, అలాంటి హక్కులను పరిమితం చేసే చర్యలను అంగీకరించలేమని ఆయన అభిప్రాయపడ్డారు.
ధర్నాలో పాల్గొన్న విద్యార్థి, యువజన సంఘాల నాయకులు జీవో 77ను రద్దు చేయాలని డిమాండ్ చేశారు. జీవో 77 కారణంగా పేద, మధ్యతరగతి విద్యార్థులు తీవ్ర ఇబ్బందులు పడుతున్నారని, ఉన్నత విద్య అందుబాటులో ఉండాలంటే ఫీజు రీయింబర్స్మెంట్ విధానాన్ని పూర్తిస్థాయిలో అమలు చేయాలని కోరారు.
భరత్ కుమార్ ఆచారి మాట్లాడుతూ లోకేశ్ యువగళం పాదయాత్ర సందర్భంగా ఇచ్చిన హామీలను ప్రభుత్వం అమలు చేయాలని డిమాండ్ చేశారు. ఆ పాదయాత్రలో విద్యార్థులు, నిరుద్యోగ యువత సమస్యలపై ఇచ్చిన భరోసాలను ఇప్పుడు కార్యరూపంలోకి తేవాల్సిన సమయం వచ్చిందని ఆయన అభిప్రాయపడ్డారు.
ధర్నాలో పాల్గొన్న నాయకులు, కార్యకర్తలు వివిధ నినాదాలు చేస్తూ Rc.No.30/6/2025 ఉత్తర్వుల ఉపసంహరణ, జీవో 77 రద్దు, ఫీజు రీయింబర్స్మెంట్ అమలు, యువతకు ఇచ్చిన హామీల నెరవేర్పు వంటి డిమాండ్లను ముందుకు తెచ్చారు. విద్యార్థులు, యువత సమస్యలను ప్రభుత్వం సీరియస్గా తీసుకుని తక్షణ చర్యలు తీసుకోవాలని వారు కోరారు.
ధర్నా కారణంగా కొంతసేపు కలెక్టరేట్ పరిసరాల్లో రద్దీ నెలకొంది. అనంతరం సంఘాల ప్రతినిధులు తమ డిమాండ్లను వివరించే వినతిపత్రాన్ని అధికారులకు సమర్పించినట్లు సమాచారం.
