రాయలసీమ న్యూస్, కర్నూలు: కర్నూల్:- నగరంలోని రహదారులపై చెత్త వేస్తున్న వారిపై ఇకపై ఉదాసీన వైఖరి అనుమతించబోమని నగరపాలక కమిషనర్ చల్లా ఓబులేసు స్పష్టం చేశారు. నగర స్వచ్ఛతకు సహకరించని వాణిజ్య దుకాణదారులపై తప్పనిసరిగా జరిమానాలు విధించాలని పారిశుద్ధ్య పర్యవేక్షక యంత్రాంగానికి ఆయన ఆదేశాలు జారీ చేశారు.
మంగళవారం కమిషనర్ చల్లా ఓబులేసు ఎన్ఆర్ పేట, గాంధీనగర్, 5 రహదారుల కూడలి, రివర్వ్యూ కాలనీ, రాజ్ విహార్ ప్రాంతాల్లో పారిశుద్ధ్య పనులను ప్రత్యక్షంగా పరిశీలించారు. రహదారులపై చెత్త పేరుకుపోయిన ప్రాంతాలను గుర్తించి, అక్కడి పరిస్థితులపై సంబంధిత అధికారులను ప్రశ్నించారు.
ఎన్ఆర్ పేటలో పలు వాణిజ్య దుకాణాల ఎదుట డస్ట్ బిన్లు లేకపోవడం, దుకాణాల నుంచి వచ్చే చెత్తను నేరుగా రహదారులపైనే వేస్తున్న దృశ్యాలను కమిషనర్ గమనించారు. ఈ నిర్లక్ష్యంపై ఆయన అసహనం వ్యక్తం చేశారు. వెంటనే అటువంటి దుకాణదారులను గుర్తించి, ముందుగా హెచ్చరికలు జారీ చేయాలని సంబంధిత శానిటరీ సిబ్బందికి సూచించారు.
దుకాణాల ఎదుట చెత్త వేయడం ఆపకుండా, పారిశుద్ధ్య నిబంధనలను పట్టించుకోకుండా కొనసాగితే, ఆ దుకాణదారులపై జరిమానాలు విధించడంతో పాటు ట్రేడ్ లైసెన్స్ రద్దు చేసి, అవసరమైతే దుకాణాలను సీజ్ చేయాలని కమిషనర్ ఆదేశించారు. నగర స్వచ్ఛతకు విఘాతం కలిగించే చర్యలను ఎట్టి పరిస్థితుల్లోనూ సహించబోమని ఆయన అధికారులకు స్పష్టం చేసినట్లు సమాచారం.
తరువాత కమిషనర్ రాజ్ విహార్ దర్గా ప్రాంతాన్ని సందర్శించారు. బుధవారం జరగనున్న మిలాద్ ఉన్ నబి వేడుకలకు సంబంధించి అక్కడి పారిశుద్ధ్య పరిస్థితులను సమీక్షించారు. వేడుకలకు పెద్ద సంఖ్యలో ప్రజలు హాజరయ్యే అవకాశం ఉన్నందున, ముందస్తుగా చెత్త తొలగింపు, రహదారుల శుభ్రత, తాగునీటి సరఫరా వంటి ఏర్పాట్లు సమగ్రంగా చేయాలని సంబంధిత విభాగాల అధికారులకు ఆయన ఆదేశాలు ఇచ్చారు.
నగరంలో పారిశుద్ధ్య ప్రమాణాలను మెరుగుపరచేందుకు మున్సిపల్ యంత్రాంగం మరింత చురుకుగా పనిచేయాలని కమిషనర్ సూచించినట్లు అధికార వర్గాలు తెలిపాయి. రహదారులపై చెత్త వేయడం, డస్ట్ బిన్లు ఏర్పాటు చేయకపోవడం వంటి ఉల్లంఘనలపై ప్రత్యేక దృష్టి పెట్టి, అవసరమైన చర్యలు తీసుకోవాలని ఆయన సూచించారు.
ఈ పరిశీలన కార్యక్రమంలో శానిటరీ ఇన్స్పెక్టర్లు అనిల్ కుమార్, మల్లికార్జున తదితరులు కమిషనర్తో పాటు పాల్గొన్నారు. సంబంధిత ప్రాంతాల్లో పారిశుద్ధ్య పనుల పురోగతిపై వారు కమిషనర్కు వివరాలు అందించారు.
