రాయలసీమ న్యూస్, బిజినెస్ డెస్క్: అమెరికా టెక్ దిగ్గజం ఐబీఎం (International Business Machines) షేర్లు ఒక్కరోజులోనే భారీ పతనాన్ని చవిచూశాయి. దాదాపు 25 శాతం వరకు కుప్పకూలడంతో కంపెనీ మార్కెట్ విలువలో సుమారు 70 బిలియన్ డాలర్లకు పైగా సంపద ఆవిరైంది. భారత కరెన్సీలో ఇది సుమారు రూ.6.7 లక్షల కోట్ల నష్టానికి సమానం. గత 58 ఏళ్లలో ఐబీఎం షేరు విలువ ఒకేరోజు ఇంత తీవ్రంగా పడిపోవడం ఇదే మొదటిసారి కావడం విశేషం.
మంగళవారం అమెరికా కాలమానం ప్రకారం వాల్స్ట్రీట్లో జరిగిన ట్రేడింగ్లో ఐబీఎం కార్పొరేషన్ షేరు విలువ 25.21 శాతం పతనమైంది. దీంతో షేరు ధర 217.07 డాలర్లకు చేరింది. ఒక్కరోజు వ్యవధిలో ఇంత పెద్ద స్థాయిలో పతనం 1968 జనవరి 3 తర్వాత ఇప్పుడే నమోదైంది. త్రైమాసిక ప్రాథమిక ఫలితాల వివరాలు, కృత్రిమ మేధ (ఏఐ) విపణి పరిస్థితులపై కంపెనీ సీఈఓ చేసిన వ్యాఖ్యలు ఈ పతనానికి ప్రధాన కారణాలుగా మార్కెట్ విశ్లేషకులు భావిస్తున్నారు.
ప్రస్తుత ఆర్థిక సంవత్సరం రెండో త్రైమాసికానికి గానూ ప్రాథమిక ఫలితాలను ఐబీఎం తాజాగా ప్రకటించింది. జూన్తో ముగిసిన ఈ త్రైమాసికానికి సంబంధించిన పూర్తి ఫలితాలను కంపెనీ వచ్చే వారం విడుదల చేయనుంది. అయితే, అంతకంటే ముందే వెల్లడించిన ప్రాథమిక అంచనాలు మదుపర్లను నిరాశపరిచాయి. ఈసారి కంపెనీ ఆదాయం మార్కెట్ అంచనాల కంటే తక్కువగా, కేవలం ఒక శాతం పెరిగి 17.2 బిలియన్ డాలర్ల వద్ద ఉండొచ్చని ఐబీఎం తెలిపింది.
సాఫ్ట్వేర్ విభాగ ఆదాయం సుమారు 5 శాతం పెరిగే అవకాశం ఉన్నప్పటికీ, ఐబీఎం ఇన్ఫ్రాస్ట్రక్చర్ వ్యాపారం మాత్రం 7 శాతం నష్టాలను చవిచూసిందని కంపెనీ వెల్లడించింది. ఈ నేపథ్యంలో మదుపర్లకు రాసిన లేఖలో ఐబీఎం సీఈఓ అరవింద్ కృష్ణ ఏఐ విపణి ధోరణులు, కంపెనీ వ్యాపారంపై వాటి ప్రభావం గురించి కీలక వ్యాఖ్యలు చేశారు.
ఏఐ విపణిలో ధరల యుద్ధం తీవ్రతరం కావడంతో కంపెనీలు తమ వ్యయ ప్రాధాన్యతలను మార్చుకుంటున్నాయని, ఏఐ తర్వాత సైబర్ సెక్యూరిటీపై ఎక్కువ దృష్టి పెట్టడం కూడా ఐబీఎం వ్యాపారాన్ని ప్రభావితం చేసిందని అరవింద్ కృష్ణ మదుపర్లకు వివరించారు.
ఏఐ మౌలిక సదుపాయాలపై భారీ పెట్టుబడులు, సైబర్ సెక్యూరిటీ రంగంపై పెరుగుతున్న దృష్టి, ఇన్ఫ్రాస్ట్రక్చర్ వ్యాపారంలో నష్టాలు.. ఇవన్నీ కలసి ఐబీఎం షేర్లపై ఒత్తిడిని పెంచాయి. ఫలితంగా ఒక్కరోజులోనే కంపెనీ మార్కెట్ విలువలో భారీగా సంపద ఆవిరై, ఐబీఎం షేరు పతనానికి చరిత్రాత్మక రికార్డు నమోదైంది.
