రాయలసీమ న్యూస్, నేషనల్ డెస్క్: న్యూఢిల్లీ: దేశవ్యాప్తంగా ఉన్న విశ్వవిద్యాలయాలు, కళాశాలల్లో అసిస్టెంట్ ప్రొఫెసర్ అర్హత, జూనియర్ రీసెర్చ్ ఫెలోషిప్ (JRF), PhD ప్రవేశాల కోసం నిర్వహించే UGC NET (జూన్ సెషన్) పరీక్షల షెడ్యూల్‌ను నేషనల్ టెస్టింగ్ ఏజెన్సీ (NTA) విడుదల చేసింది. జూన్ 22 నుంచి జూన్ 30 వరకు ఈ పరీక్షలను దేశంలోని వివిధ పరీక్షా కేంద్రాల్లో నిర్వహించనున్నారు.
NTA ప్రకటన ప్రకారం, ఈసారి UGC NET పరీక్షలను పూర్తిగా CBT ( కంప్యూటర్ బేస్డ్ టెస్ట్ ) విధానంలో నిర్వహిస్తారు. మొత్తం తొమ్మిది రోజుల పాటు పరీక్షలు కొనసాగనున్నాయి. ప్రతిరోజూ రెండు షిఫ్టుల్లో పరీక్షలు నిర్వహించేందుకు ఏర్పాట్లు చేశారు. ఉదయం షిఫ్ట్‌ను 9:00 గంటల నుంచి మధ్యాహ్నం 12:00 గంటల వరకు, మధ్యాహ్నం షిఫ్ట్‌ను 3:00 గంటల నుంచి సాయంత్రం 6:00 గంటల వరకు నిర్వహిస్తారు. ఈ జూన్ సెషన్‌లో 80కి పైగా సబ్జెక్టులకు UGC NET పరీక్షలు జరగనున్నాయని NTA తెలిపింది. దేశంలోని వివిధ రాష్ట్రాల్లోని పరీక్షా కేంద్రాల్లో అభ్యర్థులకు సీట్లు కేటాయించనున్నారు. పరీక్షా కేంద్రాల ఎంపిక, షిఫ్ట్ కేటాయింపు వంటి వివరాలు అభ్యర్థులు దరఖాస్తు ప్రక్రియలో ఇచ్చిన ఎంపికల ఆధారంగా నిర్ణయించబడతాయి.
పరీక్షలకు హాజరయ్యే అభ్యర్థులు ఎగ్జామ్ రాయాల్సిన సిటీ వివరాలను పరీక్ష తేదీలకు సుమారు 8 నుంచి 10 రోజుల ముందుగా తెలుసుకునే అవకాశం ఉంటుంది. ఇందుకోసం ప్రత్యేకంగా సిటీ ఇంటిమేషన్ స్లిప్పులను అధికారిక వెబ్‌సైట్‌లో అందుబాటులో ఉంచుతామని NTA స్పష్టం చేసింది. ఆ తరువాత అభ్యర్థుల అడ్మిట్ కార్డు లను ( హాల్ టికెట్ లను) విడిగా విడుదల చేయనున్నారు. అభ్యర్థులు తమ సిటీ ఇంటిమేషన్ స్లిప్పులు, అడ్మిట్ కార్డులు, పరీక్షా మార్గదర్శకాలు, ఇతర ముఖ్యమైన సమాచారం కోసం అధికారిక వెబ్‌సైట్ ugcnet.nta.nic.inను క్రమం తప్పకుండా పరిశీలించాలని అధికారులు సూచించారు. పరీక్షకు సంబంధించిన అన్ని తాజా అప్‌డేట్లు, నోటిఫికేషన్లు కూడా ఇదే వెబ్‌సైట్‌లో ప్రచురించబడతాయని తెలిపారు.
