రాయలసీమ న్యూస్, ఎంటర్టైన్మెంట్ డెస్క్: దక్షిణాది చిత్ర పరిశ్రమలో దాదాపు రెండు దశాబ్దాలుగా అగ్ర కథానాయికగా వెలుగొందిన నటి కాజల్ అగర్వాల్, తన రెండో ఇన్నింగ్స్లో కెరీర్ దిశను పూర్తిగా మార్చుకుంటోంది. గ్లామర్, నటన రెండింటినీ సమతుల్యం చేస్తూ దాదాపు అన్ని అగ్ర హీరోలతో జోడీ కట్టి అగ్ర హీరోయిన్గా ప్రత్యేక గుర్తింపు తెచ్చుకున్న కాజల్, ఇప్పుడు మాత్రం కమర్షియల్ హంగులు, గ్లామర్ హద్దులను పక్కనబెట్టి, నటనకు ప్రాధాన్యమున్న వైవిధ్యమైన కథలపై దృష్టి సారించింది.
పెళ్లి, తల్లితనం తర్వాత వెండితెరపై రీఎంట్రీ ఇవ్వాలనుకున్న సమయంలో కాజల్ ముందుకు పలు సవాళ్లు వచ్చాయి. దాదాపు ఆరేళ్ల పాటు సరైన కమర్షియల్ విజయాలు లేకపోవడం, ఫామ్ తగ్గిందనే అభిప్రాయం నెలకొనడంతో ఇండస్ట్రీలో అవకాశాలు కష్టమనే వాతావరణం కనిపించింది. సాధారణంగా సీనియర్ హీరోయిన్లకు రెండో ఇన్నింగ్స్లో సపోర్టింగ్ పాత్రలు, తల్లి రోల్స్నే ఎక్కువగా ఆఫర్ చేసే పరిస్థితి ఉంది. అయితే ఆ మూస పద్ధతిని తప్పక బ్రేక్ చేయాలనే సంకల్పంతో కాజల్ ముందుకు సాగింది.
ఈ క్రమంలోనే గాడ్ ఆఫ్ మాసెస్గా పేరొందిన నటుడు బాలకృష్ణ సరసన ‘భగవంత్ కేసరి’ చిత్రంతో రీఎంట్రీ ఇచ్చింది. ఈ చిత్రం వసూళ్ల పరంగా సరికొత్త రికార్డులు సృష్టించడమే కాకుండా, కాజల్కు గ్రాండ్ వెల్కమ్ పలికింది. ఈ భారీ విజయంతో ఉత్సాహం పొందిన ఆమె, తదుపరి ప్రాజెక్టులను మరింత వైవిధ్యంగా ఎంచుకోవడం ప్రారంభించింది.
లేడీ ఓరియంటెడ్ యాక్షన్ డ్రామాగా వచ్చిన ‘సత్యభామ’ కోసం కాజల్ ప్రత్యేకంగా మార్షల్ ఆర్ట్స్లో శిక్షణ తీసుకోవడం గమనార్హం. ఖాకీ చొక్కా తొడిగి పోలీస్ ఆఫీసర్గా ఆమె చేసిన యాక్షన్ స్టంట్స్ ప్రేక్షకులను ఆకట్టుకున్నాయి. గ్లామర్ ఇమేజ్కు భిన్నంగా, యాక్షన్ మోడ్లో కనిపించిన కాజల్పై సినీ వర్గాల్లో చర్చలు జోరుగా నడిచాయి.
ప్రస్తుతం మారుతున్న ట్రెండ్కు అనుగుణంగా డిజిటల్ ప్లాట్ఫామ్లపై కూడా సత్తా చాటేందుకు కాజల్ సిద్ధమవుతోంది. ప్రముఖ ఓటీటీ ప్లాట్ఫామ్ JioHotstar 2026 సంవత్సరానికి గాను ప్రకటించిన క్రేజీ తెలుగు ఒరిజినల్స్ స్లేట్లో, కాజల్ లీడ్ రోల్లో నటిస్తున్న ‘విశాఖ’ సిరీస్ టాప్ ప్లేస్లో నిలవడం విశేషం. ఈ సిరీస్పై ఇప్పటికే మంచి క్రేజ్ నెలకొంది.
స్టార్ హీరోలతో కమర్షియల్ డ్యూయెట్లు పాడే రోజులకు గుడ్ బై చెప్పేసి, అనుష్క శెట్టి, సమంత తరహాలో ఒంటిచేత్తో సినిమాను నడిపించే పంథాను కాజల్ ఎంచుకున్నట్లు సినీ విశ్లేషకులు భావిస్తున్నారు. రెండో ఇన్నింగ్స్లోనూ అగ్ర నాయికలకు గట్టి పోటీ ఇస్తూ, భారీ పారితోషికం డిమాండ్ చేస్తూ కాజల్ అగర్వాల్ దూసుకుపోతున్న తీరు ప్రస్తుతం టాలీవుడ్లో హాట్ టాపిక్గా మారింది.
