రాయలసీమ న్యూస్, పొలిటికల్ డెస్క్:
ఏపీకి పెట్టుబడులే లక్ష్యం!
దక్షిణ కొరియాలో మంత్రి నారా లోకేశ్ బిజీబిజీ
దక్షిణ కొరియా పర్యటనలో ఐటీ, విద్యా శాఖల మంత్రి నారా లోకేశ్ పెట్టుబడుల ఆకర్షణపై దృష్టి సారించారు. ఆంధ్రప్రదేశ్లో పరిశ్రమల విస్తరణ, ఉపాధి అవకాశాల పెంపు లక్ష్యంగా ప్రముఖ పారిశ్రామికవేత్తలతో వరుస సమావేశాలు నిర్వహిస్తున్నారు. రాష్ట్రాన్ని తయారీ, రిటైల్, డిస్ట్రిబ్యూషన్, హైఎండ్ టెక్నాలజీ హబ్గా తీర్చిదిద్దేందుకు పెట్టుబడులను ఆహ్వానించే దిశగా లోకేశ్ చర్చలు కొనసాగిస్తున్నారు.
ఈ క్రమంలో షూఆల్స్ ఛైర్మన్ లీ చియాంగ్-గెన్తో మంత్రి లోకేశ్ సమావేశమయ్యారు. ఆంధ్రప్రదేశ్లో షూఆల్స్ పాదరక్షల తయారీ యూనిట్ పనులు వేగవంతం చేయాలని ఆయన విజ్ఞప్తి చేశారు. రాష్ట్రంలో ఆర్ అండ్ డీ, ఇన్నోవేషన్ సెంటర్ ఏర్పాటు చేయాలని షూఆల్స్ సంస్థకు ఆహ్వానం పలికారు. ఏపీని రిటైల్, డిస్ట్రిబ్యూషన్ హబ్గా అభివృద్ధి చేయాలనే రాష్ట్ర ప్రభుత్వ లక్ష్యాన్ని ఈ సమావేశంలో లోకేశ్ వివరించారు.
మంత్రి విజ్ఞప్తిపై షూఆల్స్ ఛైర్మన్ లీ చియాంగ్-గెన్ సానుకూలంగా స్పందించారు. ఏపీ ప్రభుత్వం చేసిన ప్రతిపాదనలను సంస్థ పరిశీలిస్తుందని ఆయన తెలిపారు. ఆంధ్రప్రదేశ్లో సుమారు రూ.300 కోట్ల పెట్టుబడితో షూఆల్స్ యూనిట్ నిర్మాణం జరగనుంది. ఈ యూనిట్ ద్వారా సుమారు 3 వేల మందికి ఉపాధి అవకాశాలు కలుగనున్నాయని అధికార వర్గాలు పేర్కొంటున్నాయి.
తరువాత సోలమ్ గ్రూప్ గ్లోబల్ ఆపరేషన్స్ ఆఫీసర్ జీగాబ్ హాతో మంత్రి నారా లోకేశ్ భేటీ అయ్యారు. శ్రీసిటీలో సోలమ్ యూనిట్ నిర్మాణం త్వరితగతిన పూర్తిచేయాలని ఆయన కోరారు. శ్రీసిటీలో ఎలక్ట్రానిక్ షెల్ఫ్ లేబుల్స్ తయారీ విస్తరణకు రాష్ట్ర ప్రభుత్వం పూర్తి సహకారం అందిస్తుందని మంత్రి వివరించారు.
శ్రీసిటీ ప్లాంట్ పనులు వేగవంతం చేస్తామని సోలమ్ సంస్థ ప్రతినిధులు ఈ సమావేశంలో పేర్కొన్నారు. రూ.338 కోట్ల పెట్టుబడితో శ్రీసిటీలో సోలమ్ ఈవీ ఛార్జర్ యూనిట్ నిర్మాణం జరగనుంది. ఈ యూనిట్ ద్వారా ఎలక్ట్రిక్ వాహనాల ఛార్జింగ్ రంగంలో ఆంధ్రప్రదేశ్ కీలక కేంద్రంగా ఎదగనుందని ప్రభుత్వం భావిస్తోంది.
ఆపై సాఫ్ట్-ఈపీఐ సీఈవో సుంగ్ మిన్ హ్వాంగ్, సీనియర్ మేనేజింగ్ డైరెక్టర్ ఇన్-సుంగ్ చోతో మంత్రి లోకేశ్ సమావేశమయ్యారు. ఆంధ్రప్రదేశ్లో మైక్రో ఎల్ఈడీ డిస్ప్లే మెటీరియల్ హబ్ ఏర్పాటు చేయాలని రాష్ట్ర ప్రభుత్వం ప్రతిపాదించింది. తిరుపతి ఐఐటీ సహకారంతో అడ్వాన్స్డ్ ఎపిటాక్సీ సెంటర్ స్థాపనకు ఆహ్వానం పలికారు.
ఏటా 500 మంది టెక్నీషియన్లకు శిక్షణ ఇచ్చే అకాడమీని ఏర్పాటు చేయాలనే ప్రతిపాదనను కూడా మంత్రి ఈ సమావేశంలో ముందుకు పెట్టారు. ఏపీ ప్రభుత్వ ప్రతిపాదనలను పరిశీలిస్తామని సాఫ్ట్-ఈపీఐ సీఈవో సుంగ్ మిన్ హ్వాంగ్ ఈ సందర్భంగా తెలిపారు.
దక్షిణ కొరియా పర్యటన మొత్తం పెట్టుబడుల ఆకర్షణ, పరిశ్రమల విస్తరణ, హైటెక్ తయారీ యూనిట్ల స్థాపనపై కేంద్రీకృతమై ఉందని అధికార వర్గాలు పేర్కొంటున్నాయి. ఆంధ్రప్రదేశ్ను ఆసియా స్థాయిలో కీలక పారిశ్రామిక కేంద్రంగా అభివృద్ధి చేయాలనే లక్ష్యంతో మంత్రి నారా లోకేశ్ ఈ పర్యటనలో బిజీ షెడ్యూల్ కొనసాగిస్తున్నారు.
