రాయలసీమ న్యూస్, పొలిటికల్ డెస్క్:
రాష్ట్ర పునర్నిర్మాణంలో భాగస్వాములవ్వండి
ఏపీకి విముక్తి లభించి రెండేళ్లు : మంత్రి కొండపల్లి శ్రీనివాస్
అమరావతి: విధ్వంస పాలన నుంచి ఆంధ్రప్రదేశ్ ప్రజలకు విముక్తి లభించి రెండేళ్లు పూర్తయ్యాయని మంత్రి కొండపల్లి శ్రీనివాస్ పేర్కొన్నారు. గత ఐదేళ్లలో జరిగిన పాలనను ఆయన రాక్షస పాలనగా అభివర్ణించారు. ఆ కాలంలో రాష్ట్ర ప్రజలను జగన్ వెన్నుపోటు పొడిచారని వ్యాఖ్యానించారు.
గురువారం మీడియాతో మాట్లాడిన మంత్రి కొండపల్లి శ్రీనివాస్, 2024లో ఆంధ్రప్రదేశ్ ప్రజలు చరిత్రాత్మక తీర్పు ఇచ్చారని గుర్తుచేశారు. 2029లో కూడా ప్రజలు ఇదే విధమైన తీర్పు ఇవ్వనున్నారనే ధీమా వ్యక్తం చేశారు. కూటమి ప్రభుత్వం ఏర్పడిన తర్వాత రాష్ట్రంలో మళ్లీ ప్రజాస్వామ్య వెలుగులు కనిపిస్తున్నాయని ఆయన అభిప్రాయపడ్డారు.
గత ప్రభుత్వ విధ్వంసకర నిర్ణయాలను సరిదిద్దుతూ ముఖ్యమంత్రి చంద్రబాబు నాయుడు రాష్ట్రాన్ని ప్రగతి పథంలో నడిపిస్తున్నారని మంత్రి తెలిపారు. అభివృద్ధి, సంక్షేమమే లక్ష్యంగా కూటమి ప్రభుత్వం శరవేగంగా ముందుకు సాగుతోందని ఆయన వివరించారు. ప్రజల ఆకాంక్షలకు అనుగుణంగా పాలన అందించేందుకు ప్రభుత్వం కృషి చేస్తోందని కొండపల్లి శ్రీనివాస్ అన్నారు.
రాష్ట్రానికి పూర్వవైభవం తీసుకురావడంలో ప్రతి ఒక్కరూ భాగస్వాములు కావాలని మంత్రి పిలుపునిచ్చారు. ఆంధ్రప్రదేశ్ పునర్నిర్మాణంలో ప్రజల సహకారం అత్యంత కీలకమని ఆయన పేర్కొన్నారు. కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలకు ప్రజలు మద్దతు ఇవ్వాలని కోరారు.
రాష్ట్రంలో ప్రజాస్వామ్య వ్యవస్థలు బలపడే దిశగా కూటమి ప్రభుత్వం చర్యలు తీసుకుంటోందని మంత్రి కొండపల్లి శ్రీనివాస్ అభిప్రాయపడ్డారు. ప్రజల నమ్మకాన్ని నిలబెట్టుకునేలా పాలన కొనసాగుతుందని ఆయన విశ్వాసం వ్యక్తం చేశారు.
