రాయలసీమ న్యూస్, ఎంటర్‌టైన్‌మెంట్ డెస్క్: చిత్ర పరిశ్రమలో మరో విషాదం నెలకొంది. ప్రముఖ తమిళ దర్శకుడు భారతీరాజా (84) మంగళవారం ఉదయం చెన్నైలో కన్నుమూశారు. కొంతకాలంగా అనారోగ్యంతో బాధపడుతున్న ఆయన అక్కడే చికిత్స పొందుతూ తుదిశ్వాస విడిచినట్లు కుటుంబ వర్గాలు తెలిపాయి. ఆయన అంత్యక్రియలను ప్రభుత్వ లాంఛనాలతో నిర్వహించేందుకు ఏర్పాట్లు జరుగుతున్నాయి.
1941 జూలై 17న జన్మించిన భారతీరాజా, గ్రామీణ నేపథ్య కథలతో దక్షిణ భారత చిత్రసీమకు కొత్త దిశ చూపిన దర్శకుడిగా గుర్తింపు పొందారు. 1977లో విడుదలైన తమిళ చిత్రం ‘16 వయథినిలే’ ద్వారా దర్శకుడిగా పరిచయమయ్యారు. ఈ చిత్రం తమిళంతో పాటు ఇతర భాషల్లోనూ విశేష విజయాన్ని సాధించి, ఆయనకు ప్రత్యేక స్థానాన్ని తీసుకువచ్చింది.
తెలుగు చిత్రసీమలోకి ‘కొత్త జీవితాలు’ సినిమాతో అడుగుపెట్టిన భారతీరాజా, ఇక్కడ కూడా తనదైన ముద్ర వేశారు. ఆయన దర్శకత్వంలో వచ్చిన ‘సీతాకోకచిలుక’, ‘ఆరాధన’, ‘జమదగ్ని’ వంటి చిత్రాలు బ్లాక్‌బస్టర్‌లుగా నిలిచి, తెలుగు ప్రేక్షకుల మనసుల్లో చిరస్థాయిగా నిలిచిపోయాయి. గ్రామీణ జీవన శైలిని సహజంగా ఆవిష్కరించే కథన శైలితో ఆయన ప్రత్యేక గుర్తింపు తెచ్చుకున్నారు.
సినీ రంగానికి చేసిన సేవలకు గుర్తింపుగా భారతీరాజా ఆరు జాతీయ పురస్కారాలు, నాలుగు ఫిల్మ్‌ఫేర్‌ అవార్డులు అందుకున్నారు. ‘సీతాకోకచిలుక’ చిత్రానికి జాతీయ పురస్కారంతో పాటు, ఉత్తమ దర్శకుడిగా నంది అవార్డు దక్కింది. దర్శకుడిగానే కాకుండా రచయితగా కూడా తన ప్రతిభను చాటుకున్న ఆయన, ‘మంగమ్మగారి మనవడు’ చిత్రానికి కథను, ‘పల్నాటి పౌరుషం’కు స్క్రీన్‌ప్లేను అందించారు.
ఇటీవల మోహన్‌లాల్‌ నటించిన ‘తుడురమ్’ చిత్రంలో నటుడిగా కనిపించడం భారతీరాజా చివరి సిల్వర్‌ స్క్రీన్‌ ప్రదర్శనగా నిలిచింది. దశాబ్దాల పాటు దక్షిణ భారత చిత్రసీమలో అనేక తరాల నటీనటులు, సాంకేతిక నిపుణులపై ఆయన ప్రభావం స్పష్టంగా కనిపించింది.
సినీ రంగానికి ఆయన అందించిన సేవలను గుర్తించిన భారత ప్రభుత్వం, 2004లో పద్మశ్రీ పురస్కారంతో సత్కరించింది. గ్రామీణ కథలను ప్రధాన స్రవంతిలోకి తీసుకువచ్చిన దర్శకుడిగా ఆయనను సినీ వర్గాలు స్మరించుకుంటున్నాయి.
వ్యక్తిగత జీవితంలో మాత్రం గతేడాది ఆయనకు తీవ్ర విషాదాన్ని మిగిల్చింది. ఆయన కుమారుడు, నటుడు మనోజ్‌ భారతీరాజా (48) గుండెపోటుతో మృతి చెందారు. ఈ ఘటనతో భారతీరాజా తీవ్రంగా మానసికంగా కుంగిపోయినట్లు ఆయనకు సమీప వర్గాలు పేర్కొన్నాయి. ఆ సమయంలో పలువురు సినీ ప్రముఖులు ఆయనను ప్రత్యక్షంగా కలిసి పరామర్శించారు.
ఇటీవల నటి రాధిక కూడా భారతీరాజాను కలిసి పరామర్శించిన విషయం తెలిసిందే. ఆమె నటించిన ‘తాయ్‌కిళవి’ చిత్రానికి జాతీయ పురస్కారం రావచ్చని ఆయన ప్రోత్సహించినట్లు సమాచారం. రాధిక, ఆ అవార్డు వస్తే ఆయన పాదాల వద్ద ఉంచుతానని భావోద్వేగంగా స్పందించినట్లు తెలిపింది.
భారతీరాజా మరణవార్త తెలిసిన వెంటనే తమిళ, తెలుగు సినీ వర్గాల్లో విషాదం నెలకొంది. సోషల్‌ మీడియాలో పలువురు నటీనటులు, దర్శకులు, అభిమానులు ఆయనతో తమ అనుబంధాన్ని గుర్తుచేసుకుంటూ సంతాప సందేశాలు వ్యక్తం చేస్తున్నారు.
