రాయలసీమ న్యూస్, ఎంటర్‌టైన్‌మెంట్ డెస్క్: తమిళ సినీ పరిశ్రమలో వరుస సీక్వెల్స్‌కి సన్నాహాలు జోరుగా సాగుతున్నాయి. ముఖ్యంగా స్టార్ హీరోలు ధనుష్ , శివకార్తికేయన్ నటించే ప్రాజెక్టులు అభిమానుల్లో భారీ అంచనాలు రేపుతున్నాయి. ఏళ్లుగా ఎదురుచూస్తున్న ‘ వడ చెన్నై 2’ నుంచి, తాజాగా వార్తల్లో నిలుస్తున్న ‘ మావీరం 2’ వరకు కోలీవుడ్ బాక్సాఫీస్‌ను కుదిపేయడానికి సిద్ధమవుతున్నాయి.
ధనుష్ అభిమానులు ఎంతో ఆతృతగా ఎదురుచూస్తున్న మోస్ట్ అవైటెడ్ మూవీ ‘ వడ చెన్నై 2’పై ఎట్టకేలకు స్పష్టత వచ్చింది. వెట్రిమారన్ దర్శకత్వంలో 2018లో వచ్చిన ‘వడ చెన్నై’ గ్యాంగ్‌స్టర్ కల్ట్ క్లాసిక్‌గా నిలిచిన విషయం తెలిసిందే. ఆ చిత్ర ముగింపులోనే పార్ట్–2 ఉంటుందని మేకర్స్ ప్రకటించారు. అయితే ఆ తర్వాత ప్రాజెక్ట్‌పై పెద్దగా కదలికలు లేకపోవడంతో అభిమానుల్లో నిరాశ నెలకొంది.
ఇప్పుడు ఆ సుదీర్ఘ నిరీక్షణకు తెరపడేలా ‘వడ చెన్నై 2’ ప్రొడక్షన్ పనులు త్వరలోనే ప్రారంభించనున్నట్టు మూవీ టీం ధృవీకరించింది. దీంతో ధనుష్ గ్యాంగ్‌స్టర్ వరల్డ్‌లోకి మళ్లీ ఎప్పుడు తీసుకెళ్తాడోనని అభిమానుల్లో కొత్త ఉత్సాహం కనిపిస్తోంది.
ధనుష్ కెరీర్‌లో మరో కీలక ప్రాజెక్ట్‌గా నిలిచిన ‘ కెప్టెన్ మిల్లర్ ’ను కూడా మేకర్స్ పెద్ద ఫ్రాంచైజీగా మలచాలని భావిస్తున్నారు. అరుణ్ మాతేశ్వరం దర్శకత్వంలో వచ్చిన ఈ యాక్షన్ అడ్వెంచర్ సినిమాను మల్టీ–పార్ట్ ఫ్రాంచైజీగా విస్తరించే ప్లాన్‌పై చర్చలు కొనసాగుతున్నాయి. దీనికి సంబంధించి ఒక ప్రీక్వెల్‌తో పాటు సీక్వెల్‌పై కూడా చర్చలు జరుగుతున్నట్టు సమాచారం.
ఇక దర్శకుడు సెల్వ రాఘవన్ తో ధనుష్ చేయాల్సిన కల్ట్ ప్రాజెక్టులు ‘ ఆయిరత్తిల్ ఒరువన్ 2’, ‘ పుదుపెట్టై 2’ ప్రస్తుతం ప్రీ–ప్రొడక్షన్ దశలోనే ఉన్నాయని టాలీవుడ్, కోలీవుడ్ వర్గాల్లో టాక్ నడుస్తోంది. ఈ రెండు చిత్రాలపై కూడా అభిమానుల్లో ప్రత్యేక ఆసక్తి నెలకొంది.
మరోవైపు యంగ్ హీరో శివకార్తికేయన్ నుంచి వస్తున్న అప్‌డేట్ మరో స్థాయిలో ఉంది. మూడేళ్ల క్రితం మాదొన్నె అశ్విన్ దర్శకత్వంలో వచ్చిన యాక్షన్ ఫాంటసీ డ్రామా ‘ మావీరం ’ బ్లాక్‌బస్టర్ హిట్‌గా నిలిచింది. అదితి శంకర్ , మిస్సుకిం కీలక పాత్రల్లో నటించిన ఈ చిత్రానికి ఇప్పుడు సీక్వెల్‌గా ‘ మావీరం 2’ను ప్లాన్ చేస్తున్నారు.
ఈ సీక్వెల్ షూటింగ్‌ను 2027 చివర్లో ప్రారంభించేలా నిర్మాతలు సన్నాహాలు చేస్తున్నట్టు తెలిసింది. శాంతి టాకీస్ బ్యానర్‌పై రూపొందనున్న ఈ ప్రాజెక్ట్‌కు సంబంధించి మరో ఆసక్తికర అంశం ఏమిటంటే, ‘ మావీరం 2’కు సంబంధించిన టైటిల్‌ను మేకర్స్ ఇప్పటికే ఖరారు చేసినట్టు ఇండస్ట్రీ టాక్ వినిపిస్తోంది.
మాస్ గ్యాంగ్‌స్టర్ కథల నుంచి ఫాంటసీ యాక్షన్ డ్రామాల వరకు కోలీవుడ్ బాక్సాఫీస్‌ను షేక్ చేయడానికి వరుస సీక్వెల్స్ సిద్ధమవుతున్నాయి. మరి ప్రేక్షకులు ఎక్కువగా ఎదురు చూస్తున్నది ధనుష్ గ్యాంగ్‌స్టర్ వరల్డ్‌లోకి తీసుకెళ్లే ‘ వడ చెన్నై 2’కోసమో, లేక శివకార్తికేయన్ హీరోగా రానున్న ‘మావీరం 2’కోసమో అనేది తెలియాలంటే ఇంకొన్ని రోజులు ఆగాల్సిందే.
