రాయలసీమ న్యూస్, ఎంటర్‌టైన్‌మెంట్ డెస్క్: ప్రముఖ నటి సాయిపల్లవి మరో విభిన్న పాత్రకు సిద్ధమవుతున్నట్లు సినీ వర్గాల్లో వార్తలు వినిపిస్తున్నాయి. ఇటీవలే ‘ఏక్‌ దిన్‌’ చిత్రంలో ప్రేమికురాలి పాత్రలో ప్రేక్షకుల ముందుకు వచ్చిన ఆమె, త్వరలో భారీ చిత్రమైన ‘రామాయణ’లో సీతగా కనిపించనుంది. ఈ క్రమంలో ఇప్పుడు ఆమె పోలీసు అధికారిణిగా తెరపై సందడి చేయబోతున్నారనే సమాచారం బయటకు వచ్చింది.
తమిళ నటుడు ధనుష్ ప్రధాన పాత్రలో రాజ్ కుమార్ పెరియాసమై దర్శకత్వంలో ఓ చిత్రం రూపొందుతున్న విషయం తెలిసిందే. ఈ చిత్రానికి తాత్కాలికంగా ‘ ధనుష్ 55’ అనే పేరుతో షూటింగ్‌ ప్రారంభించారు. ఇందులో సాయిపల్లవి, శ్రీలీలా కథానాయికలుగా నటిస్తున్నారు. వర్కింగ్‌ టైటిల్‌తో ప్రస్తుతం కొనసాగుతున్న ఈ చిత్రంలో సాయిపల్లవి పోలీసు ఆఫీసర్‌ పాత్రలో నటించనున్నారని సమాచారం.
సినీ వర్గాల్లో వినిపిస్తున్న వార్తల ప్రకారం, ఈ సినిమాలో సాయిపల్లవి పాత్ర పూర్తిగా యాక్షన్‌ ప్రధానంగా ఉండనుందని చెబుతున్నారు. ఇప్పటివరకు ఆమె చేసిన పాత్రలతో పోలిస్తే ఇది పూర్తిగా భిన్నంగా ఉండబోతోందని, ప్రేక్షకులు కొత్త కోణంలో సాయిపల్లవిని చూడబోతున్నారని కోలీవుడ్ వర్గాల్లో చర్చ నడుస్తోంది.
ధనుష్ – రాజ్కుమార్ పెరియాసమై కలయికలో వస్తున్న ఈ చిత్రంపై తమిళంతో పాటు తెలుగు ప్రేక్షకుల్లో కూడా ఆసక్తి నెలకొంది. సాయిపల్లవి, శ్రీలీలా వంటి నటీమణులు ఒకే చిత్రంలో నటించడం, అందులో సాయిపల్లవి యాక్షన్‌ ఓరియెంటెడ్‌ పోలీసు పాత్రలో కనిపించబోతున్నారనే వార్తలు ఈ సినిమాపై మరింత క్రేజ్‌ పెంచుతున్నాయి.
అయితే చిత్రబృందం మాత్రం ఇప్పటివరకు పాత్రల వివరాలు, కథాంశం, టైటిల్‌ వంటి అంశాలపై అధికారిక ప్రకటన చేయలేదు. షూటింగ్‌ శరవేగంగా కొనసాగుతున్నప్పటికీ, సాయిపల్లవి పాత్ర స్వరూపం, ఆమె లుక్‌ గురించి అధికారికంగా వెల్లడించలేదు. అయినప్పటికీ తమిళ సినీ పరిశ్రమలో, అభిమానుల్లో ఆమె కొత్త అవతారంపై చర్చలు జోరుగా సాగుతున్నాయి.
‘ఫిదా’, ‘లవ్‌ స్టోరీ’, ‘శ్యామ్‌ సింగ రాయ్‌’ వంటి చిత్రాల్లో భావోద్వేగ పాత్రలతో ఆకట్టుకున్న సాయిపల్లవి, ఇటీవల ‘గార్గీ’, ‘ఏక్‌ దిన్‌’ వంటి కంటెంట్‌ ఆధారిత చిత్రాలతో నటిగా తనకంటూ ప్రత్యేక స్థానాన్ని ఏర్పరుచుకుంది. ఇప్పుడు యాక్షన్‌ ప్రధానమైన పోలీసు పాత్రలో కనిపించబోతుందనే వార్తలు, ఆమె కెరీర్‌లో మరో మలుపుగా భావిస్తున్నారు.
ఈ చిత్రం విడుదల తేదీ, ఇతర సాంకేతిక నిపుణుల వివరాలు త్వరలోనే అధికారికంగా వెల్లడించే అవకాశం ఉందని పరిశ్రమ వర్గాలు అంచనా వేస్తున్నాయి.
