రాయలసీమ న్యూస్, స్పోర్ట్స్ డెస్క్: ప్రపంచకప్‌ ఫుట్‌బాల్‌లో ఆతిథ్య జట్టు అమెరికా జోరు కొనసాగుతోంది. హైతీపై 3-0తో విజయం సాధించిన బ్రెజిల్‌ ఈ టోర్నీలో తొలి గెలుపు నమోదు చేసుకోగా, వరుసగా రెండో మ్యాచ్‌ గెలిచిన అమెరికా నాకౌట్‌ దశకు అర్హత సాధించింది. నెదర్లాండ్స్‌, మొరాకో, పరాగ్వే జట్లు కూడా తమ తమ మ్యాచ్‌ల్లో విజయం సాధించాయి.
గ్రూప్‌–సి పోరులో బ్రెజిల్‌ శనివారం హైతీని 3-0తో ఓడించింది. మొరాకోతో డ్రా కారణంగా తప్పనిసరిగా గెలవాల్సిన పరిస్థితిలో బరిలోకి దిగిన బ్రెజిల్‌ ఆరంభం నుంచే ఆధిపత్యం ప్రదర్శించింది. మాథ్యూస్‌ కున్యా రెండు గోల్స్‌తో మెరిశాడు.
23వ నిమిషంలో బ్రెజిల్‌ ఆధిక్యంలోకి దూసుకెళ్లింది. బాక్స్‌లోకి చొచ్చుకెళ్లిన విన్సియస్‌ జూనియర్‌ బలంగా కొట్టిన షాట్‌ను హైతీ గోల్‌కీపర్‌ జానీ ప్లసైడ్‌ ఎడమవైపు దూకుతూ అడ్డుకున్నాడు. అయితే రీబౌండ్‌ను క్లియర్‌ చేయబోయిన హైతీ డిఫెండర్‌ డెల్‌క్రాయిక్స్‌ నుంచి బంతి కున్యాకు తగిలి నెట్లోకి వెళ్లింది. 36వ నిమిషంలో విన్సియస్‌ జూనియర్‌ నుంచి వచ్చిన పాస్‌ను కున్యా ఎడమకాలితో నెట్‌ ఎడమ మూలలోకి పంపి ఆధిక్యాన్ని 2-0కు పెంచాడు.
తొలి అర్ధభాగం ముగిసేలోపే విన్సియస్‌ జూనియర్‌ మరో గోల్‌ చేసి స్కోరును 3-0గా మార్చాడు. రెండో అర్ధభాగంలో ఇరుజట్లూ గోల్‌ చేయలేకపోయాయి. గాయం కారణంగా బ్రెజిల్‌ స్టార్‌ నెయ్‌మార్‌ వరుసగా రెండో మ్యాచ్‌కు దూరంగా ఉన్నాడు.
గ్రూప్‌–డి పోరులో ఆతిథ్య అమెరికా 2-0తో ఆస్ట్రేలియాపై విజయం సాధించింది. స్టార్‌ ఆటగాడు క్రిస్టియన్‌ పులిసిచ్‌ గాయంతో జట్టులో లేనప్పటికీ అమెరికా దూకుడుగా ఆడింది. కామెరాన్‌ బర్గెస్‌ సెల్ఫ్‌ గోల్‌తో 11వ నిమిషంలోనే అమెరికా ఆధిక్యంలోకి వెళ్లింది. 43వ నిమిషంలో అలెక్స్‌ ఫ్రీమ్యాన్‌ చేసిన గోల్‌ను మొదట ఆఫ్‌సైడ్‌గా నిరాకరించినప్పటికీ సమీక్ష అనంతరం గోల్‌గా గుర్తించారు. దీంతో అమెరికా ఆధిక్యం 2-0గా నిలిచింది.
ఈ విజయంతో అమెరికా ఆరు పాయింట్లతో గ్రూప్‌లో అగ్రస్థానంలో నిలిచింది. 1930 తర్వాత ఒకే ప్రపంచకప్‌లో వరుసగా రెండు మ్యాచ్‌లు గెలవడం అమెరికాకు ఇదే మొదటిసారి. తొలి మ్యాచ్‌లో అమెరికా 4-1తో పరాగ్వేపై గెలిచిన విషయం తెలిసిందే.
ఫేవరెట్లలో ఒకటైన నెదర్లాండ్స్‌ గ్రూప్‌ మ్యాచ్‌లో స్వీడన్‌పై 5-1తో భారీ విజయం సాధించింది. జపాన్‌తో తొలి మ్యాచ్‌ను డ్రాగా ముగించిన ఆరెంజ్‌ జట్టు ఈసారి ఆరంభం నుంచే దూకుడుగా ఆడింది. అయిదో నిమిషంలో బ్రయాన్‌ బ్రాబే తొలి గోల్‌ చేశాడు. 17వ నిమిషంలో అతడే మరో గోల్‌ చేసి ఆధిక్యాన్ని పెంచాడు. కోడీ గాక్పో 47వ, 54వ నిమిషాల్లో రెండు గోల్స్‌ చేయగా, 89వ నిమిషంలో క్రిసెన్సియో గోల్‌ చేసి నెదర్లాండ్స్‌ విజయాన్ని ఖరారు చేశాడు.
ఫాక్స్‌బారోలో జరిగిన మరో గ్రూప్‌–సి మ్యాచ్‌లో మొరాకో 1-0తో స్కాట్లాండ్‌ను ఓడించింది. మ్యాచ్‌ ప్రారంభమైన 72వ సెకన్లోనే ఇస్మాయిల్‌ సాలిబారి గోల్‌ చేసి మొరాకోకు విజయారంభం అందించాడు. ఆ తరువాత స్కాట్లాండ్‌ సమం చేయడానికి చేసిన ప్రయత్నాలు ఫలించలేదు.
శాంటా క్లారాలో జరిగిన గ్రూప్‌–డి మ్యాచ్‌లో పరాగ్వే 1-0తో తుర్కియేపై గెలిచింది. రెండో నిమిషంలో మతియాస్‌ గలార్‌జా దూరం నుంచి బలంగా కొట్టిన షాట్‌ గోల్‌గా మారి పరాగ్వేకు ఆధిక్యం తెచ్చింది. తొలి అర్ధభాగం ఇంజురీ సమయంలో పరాగ్వే ఆటగాడు అల్మిరాన్‌, తుర్కియే ఆటగాడు ముల్డర్‌ మధ్య వాగ్వాదం చోటుచేసుకుంది. ఈ సమయంలో నోటికి చేతిని అడ్డుపెట్టుకుని మాట్లాడిన అల్మిరాన్‌పై ముల్డర్‌ రిఫరీ ఇవాన్‌కు ఫిర్యాదు చేశాడు. ప్రపంచకప్‌ నిబంధనల ప్రకారం ఇది నిషిద్ధం కావడంతో రిఫరీ అల్మిరాన్‌కు రెడ్‌ కార్డు చూపించాడు. ఈ కారణంతో ప్రస్తుత ప్రపంచకప్‌లో రెడ్‌ కార్డు చూసిన తొలి ఆటగాడిగా అల్మిరాన్‌ నిలిచాడు. మ్యాచ్‌ మిగతా భాగాన్ని పరాగ్వే పది మందితోనే ఆడినా ఆధిక్యాన్ని కాపాడుకుని విజయం సాధించింది.
