రాయలసీమ న్యూస్, స్పోర్ట్స్ డెస్క్: జాంబియా వేదికగా జరుగుతున్న ఏషియన్ లీజెండ్స్ లీగ్‌లో ఇండియన్ రాయల్స్ జట్టు అద్భుత విజయాన్ని నమోదు చేసింది. ఉత్కంఠభరితంగా సాగిన పోరులో ఇండియన్ రాయల్స్ జట్టు పాకిస్థాన్ ప్యాంథర్స్‌ను 2 వికెట్ల తేడాతో ఓడించింది. ఈ విజయంతో టోర్నీలో భారత్ వరుసగా రెండో విజయాన్ని సాధించింది.
మొదట బ్యాటింగ్ చేసిన పాకిస్థాన్ లీజెండ్స్ నిర్ణీత 20 ఓవర్లలో 6 వికెట్ల నష్టానికి 167 పరుగులు చేశారు. దీంతో ఇండియన్ రాయల్స్ ముందు 168 పరుగుల లక్ష్యం నిలిచింది. పాకిస్థాన్ తరఫున ఇమ్రాన్ నజీర్ 29 బంతుల్లో 47 పరుగులు చేసి జట్టుకు మంచి ఆరంభాన్ని అందించాడు. మధ్య ఓవర్లలో భారత బౌలర్లు కట్టుదిట్టంగా బౌలింగ్ చేయడంతో పాకిస్థాన్ స్కోరు ఊహించిన దానికంటే తక్కువగానే నిలిచింది.
తర్వాత 168 పరుగుల లక్ష్యంతో బరిలోకి దిగిన ఇండియన్ రాయల్స్ ఆరంభంలోనే ఒత్తిడికి గురైంది. ఓపెనర్లు నమన్ ఓజా, అభిషేక్‌లు త్వరగానే పెవిలియన్‌కి చేరడంతో జట్టు కష్టాల్లో పడింది. కీలక సమయంలో రిషి ధావన్, సారుల్‌లు ఇన్నింగ్స్‌ను భుజాలపై వేసుకున్నారు.
రిషి ధావన్ 33 బంతుల్లో 50 పరుగులు చేసి జట్టుకు బలమైన పునాది వేశాడు. మరోవైపు సారుల్ 29 బంతుల్లో 46 పరుగులు చేసి రన్‌చేజ్‌ను సులభతరం చేశాడు. వీరిద్దరి భాగస్వామ్యం భారత్‌ను విజయానికి చేరువ చేసింది. అయితే ఈ ఇద్దరూ అవుటైన తర్వాత ఇండియన్ రాయల్స్ వరుసగా వికెట్లు కోల్పోయి మళ్లీ ఒత్తిడిలో పడింది.
ఇలాంటి పరిస్థితుల్లో ఆఖరి వరుస బ్యాటర్లు కీలక పాత్ర పోషించారు. చివరి ఓవర్లలో సమయోచితంగా ఆడి, మిగిలిన లక్ష్యాన్ని చాకచక్యంగా ఛేదించారు. మరో 14 బంతులు మిగిలి ఉండగానే ఇండియన్ రాయల్స్ 17.4 ఓవర్లలో 8 వికెట్లు కోల్పోయి లక్ష్యాన్ని చేరుకుంది.
ఈ విజయంతో టోర్నీలో ఇండియన్ రాయల్స్ జోరు కొనసాగుతోంది. అంతకుముందు జరిగిన తొలి మ్యాచ్‌లో ఇండియన్ రాయల్స్ బంగ్లాదేశ్ టైగర్స్‌పై 19 పరుగుల తేడాతో విజయం సాధించింది. జూలై 30న ప్రారంభమైన ఏషియన్ లీజెండ్స్ లీగ్ రెండో సీజన్ ఫైనల్ మ్యాచ్ ఆగస్టు 10న జరగనుంది.
ఇండియన్ రాయల్స్ జట్టులో శిఖర్ ధావన్, సురేష్ రైనా, హర్భజన్ సింగ్, దినేష్ కార్తీక్, అంబటి రాయుడు వంటి పలువురు దిగ్గజ ఆటగాళ్లు పాల్గొనడం వల్ల ఈ లీగ్‌పై భారత క్రికెట్ అభిమానుల్లో భారీ ఆసక్తి నెలకొంది. భారత అభిమానులకు ఎంతగానో ఉత్కంఠను పంచిన ఈ హై-వోల్టేజ్ మ్యాచ్‌ను FanCode యాప్, Sony Sports Network ప్రత్యక్ష ప్రసారం చేశాయి.
