రాయలసీమ న్యూస్, స్పోర్ట్స్ డెస్క్: ఫుట్బాల్ ప్రపంచకప్లో సాకర్ మాంత్రికుడు లియోనల్ మెస్సి విజృంభణ కొనసాగుతోంది. వరుసగా ఏడో ప్రపంచకప్ మ్యాచ్లోనూ గోల్ నమోదు చేసి అరుదైన రికార్డు సృష్టించాడు. గ్రూప్ దశ చివరి లీగ్ మ్యాచ్లో జోర్డాన్పై అర్జెంటీనా 3-1 తేడాతో ఘనవిజయం సాధించింది. ఈ మ్యాచ్లో మెస్సి చేసిన ఫ్రీ కిక్ గోల్ ప్రధాన ఆకర్షణగా నిలిచింది.
డిఫెండింగ్ ఛాంపియన్ అర్జెంటీనా ఇప్పటికే నాకౌట్ దశకు అర్హత సాధించగా, జోర్డాన్ టోర్నీ నుంచి ముందే నిష్క్రమించింది. దీంతో గ్రూప్-జె నుంచి ఇరుజట్లకు ఈ పోరు నామమాత్రంగా మారింది. ఈ నేపథ్యంలో అర్జెంటీనా జట్టు మెస్సిని ఆరంభ జట్టులో కాకుండా బెంచ్పై ఉంచింది.
మ్యాచ్ ప్రారంభం నుంచే అర్జెంటీనా ఆధిపత్యం చెలాయించింది. 19వ నిమిషంలో జియోవాని లో సెల్సో ఫ్రీ కిక్ను గోల్గా మలిచి జట్టుకు తొలి ఆధిక్యాన్ని అందించాడు. అనంతరం 31వ నిమిషంలో లాటారో మార్టినెజ్ పెనాల్టీని గోల్గా మార్చి స్కోరును 2-0కు తీసుకెళ్లాడు. ద్వితీయార్ధంలో 55వ నిమిషంలో జోర్డాన్ తరఫున ముసా టామారి గోల్ చేసి స్కోరును 2-1గా తగ్గించాడు.
60వ నిమిషంలో మార్టినెజ్ స్థానంలో మెస్సి సబ్స్టిట్యూట్గా మైదానంలోకి దిగాడు. అతను ప్రవేశించగానే స్టేడియం ఉత్సాహంతో మార్మోగింది. 80వ నిమిషంలో అర్జెంటీనాకు ఫ్రీ కిక్ లభించగా, దాన్ని గోల్గా మలిచే బాధ్యతను మెస్సి తీసుకున్నాడు. జోర్డాన్ డిఫెండర్ల మధ్యలో ఉన్న ఖాళీని గమనించి, ఎడమ కాలితో బంతికి స్పిన్ ఇచ్చి గోల్పోస్టులోకి పంపించాడు. ఈ అద్భుత గోల్తో అర్జెంటీనా విజయం మరింత పటిష్టమైంది.
ఈ గోల్తో మెస్సి ప్రపంచకప్ చరిత్రలో వరుసగా ఏడు మ్యాచ్ల్లో గోల్స్ చేసిన తొలి ఆటగాడిగా నిలిచాడు. మొత్తం ప్రపంచకప్ పోటీల్లో అతని గోల్స్ సంఖ్య 19కు చేరింది. ఈ టోర్నీకి ముందు 16 గోల్స్తో అగ్రస్థానంలో ఉన్న జర్మనీ ఆటగాడు క్లోజ్ను మెస్సి అధిగమించాడు. ప్రస్తుత టోర్నీలో మెస్సి ఆరు గోల్స్ నమోదు చేసి, ఫ్రాన్స్ స్టార్ ఎంబాపె, క్లోజ్ రికార్డులను సమం చేశాడు. టోర్నీలో మెస్సి టాప్ స్కోరర్గా కొనసాగుతున్నాడు.
గ్రూప్ దశను విజయవంతంగా ముగించిన అర్జెంటీనా, జులై 4న జరగనున్న ప్రిక్వార్టర్ ఫైనల్లో కేప్ వెర్డెను ఎదుర్కోనుంది. మరోవైపు ఈ ప్రపంచకప్లో రికార్డు స్థాయిలో ఎనిమిది ఆఫ్రికా జట్లు నాకౌట్ దశకు చేరడం విశేషం. గతంలో గరిష్టంగా రెండు ఆఫ్రికా జట్లు మాత్రమే ముందంజ వేసిన నేపథ్యంలో, ఈసారి డీఆర్ కాంగో, మొరాకో, దక్షిణాఫ్రికా, సెనెగల్, ఐవరీకోస్ట్, ఘానా, కేప్ వెర్డె, ఈజిప్ట్ జట్లు నాకౌట్లో అడుగుపెట్టాయి.
డీఆర్ కాంగో 52 ఏళ్ల తర్వాత ప్రపంచకప్లో ఆడే అవకాశం దక్కించుకుని, గ్రూప్-కెలో ఉజ్బెకిస్థాన్పై 3-1తో గెలిచి నాకౌట్ దశకు చేరింది. పోర్చుగల్, కొలంబియా మధ్య మ్యాచ్ 0-0తో డ్రాగా ముగియగా, ఈ రెండు జట్లు ముందుగానే నాకౌట్ దశకు అర్హత సాధించాయి.
గ్రూప్-జెలో ఆస్ట్రియా, అల్జీరియా మధ్య రసవత్తర పోరు 3-3తో డ్రాగా ముగియడంతో రెండు జట్లూ నాకౌట్కు చేరాయి. గ్రూప్-ఎల్లో క్రొయేషియా, గ్రూప్-ఎలో ఇంగ్లాండ్ తమ తమ గ్రూపుల్లో రెండో, మొదటి స్థానాలతో నాకౌట్ దశకు అర్హత సాధించాయి. రాత్రి బ్రెజిల్ – జపాన్, అనంతరం జర్మనీ – పరాగ్వే మధ్య నాకౌట్ పోరులు జరగనున్నాయి.
