రాయలసీమ న్యూస్, టెక్నాలజీ డెస్క్:
6G లక్ష్యంగా భారత్..
కేంద్రం సమగ్ర రోడ్‌మ్యాప్ సిద్ధం
భారతదేశంలో 5G సేవలు ప్రారంభమై నాలుగేళ్లు పూర్తయ్యాయి. ప్రస్తుతం దేశంలోని దాదాపు అన్ని జిల్లాలకు 5G సేవలు విస్తరించాయి. ఇదే సమయంలో టెలికాం సంస్థలు 5G అడ్వాన్స్‌డ్ టెక్నాలజీపై దృష్టి సారించాయి. ఈ నేపథ్యంలో భవిష్యత్ కమ్యూనికేషన్ అవసరాలను దృష్టిలో పెట్టుకుని కేంద్ర ప్రభుత్వం 6G కోసం సమగ్ర రోడ్‌మ్యాప్‌ను సిద్ధం చేస్తోంది. ముఖ్యంగా ఈ ప్రణాళికలో స్వదేశీ సాంకేతికతకు ప్రాధాన్యం ఇవ్వాలని లక్ష్యంగా పెట్టుకుంది.
నివేదికల ప్రకారం, 6G అమలు, విధాన రూపకల్పన కోసం నీతి ఆయోగ్ ఆధ్వర్యంలో వివిధ మంత్రిత్వ శాఖల మధ్య సంప్రదింపులు త్వరలో ప్రారంభం కానున్నాయి. 6G విధాన రూపకల్పన, స్పెక్ట్రమ్ లైసెన్సింగ్, సాంకేతిక అభివృద్ధి వంటి అంశాలపై చర్చించేందుకు ఓ బహిరంగ వేదికను ఏర్పాటు చేయాలని ప్రభుత్వం భావిస్తోంది. ఒక సీనియర్ అధికారి తెలిపిన వివరాల ప్రకారం, కృత్రిమ మేధస్సు వినియోగం ద్వారా సాంకేతిక రంగంలో భారతదేశాన్ని ప్రపంచ అగ్రగామిగా నిలపడం ఈ కార్యక్రమం ప్రధాన లక్ష్యంగా ఉండనుంది.
ప్రభుత్వం రూపొందిస్తున్న రోడ్‌మ్యాప్ ప్రకారం, ప్రస్తుతం ఉన్న సాంకేతిక వ్యవస్థలను కృత్రిమ మేధస్సు ఆధారిత ఆర్కిటెక్చర్‌తో ఏకీకృతం చేసి 6G సేవలను సజావుగా అమలు చేయాలని యోచిస్తున్నారు. ఇందుకోసం వివిధ నియంత్రణ సంస్థల మధ్య సమన్వయం కీలకంగా మారనుంది. ముఖ్యంగా టెలికమ్యూనికేషన్స్ విభాగం, నేషనల్ స్పేస్ ప్రమోషన్ అండ్ ఆథరైజేషన్ సెంటర్ మధ్య సహకారాన్ని మరింత బలోపేతం చేయాలని ప్రణాళికలో ఉంది.
దేశంలోని మారుమూల ప్రాంతాలు, పర్వత ప్రాంతాలు, సముద్ర తీర ప్రాంతాలకు అధునాతన కనెక్టివిటీ అందించాలంటే సెల్యులార్ టవర్లను శాటిలైట్ నెట్‌వర్క్‌లు, లో ఎర్త్ ఆర్బిట్ వ్యవస్థలతో అనుసంధానించాల్సిన అవసరం ఉందని నిపుణులు సూచిస్తున్నారు. హోలోగ్రాఫిక్ కమ్యూనికేషన్ వంటి అత్యాధునిక సేవలను అందించేందుకు, డేటా ప్రాసెసింగ్, నెట్‌వర్క్ నిర్వహణ, స్పెక్ట్రమ్ షేరింగ్‌ను మెరుగుపరచేందుకు స్పేస్-టు-ఎర్త్ కనెక్టివిటీలో కూడా కృత్రిమ మేధస్సు సాంకేతికతను వినియోగించే దిశగా ప్రభుత్వం ఆలోచిస్తోంది.
భారతదేశంలో 6G సేవల అభివృద్ధి, అమలును వేగవంతం చేసేందుకు ఇండియా 6G అలయన్స్‌ను ఇప్పటికే ఏర్పాటు చేశారు. 2030 నాటికి ప్రపంచ 6G మార్కెట్లో భారతదేశం 10 శాతం వాటాను సాధించగలదని అంచనా వేస్తున్నారు. ప్రస్తుతం ఈ రంగంలో భారత వాటా 6 నుంచి 8 శాతం మధ్య ఉంది. 6G సాంకేతికతకు సంబంధించిన సుమారు 4,000 పేటెంట్లను భారత్ ఇప్పటికే దాఖలు చేయడం గమనార్హం. పేటెంట్ ఫైలింగ్‌ల పరంగా ప్రపంచంలోని అగ్ర ఆరు దేశాల్లో భారతదేశం స్థానం సంపాదించింది.
5G విస్తరణను విజయవంతంగా పూర్తి చేసిన భారత్, ఇప్పుడు 6G యుగానికి సిద్ధమవుతోంది. స్వదేశీ సాంకేతికత, కృత్రిమ మేధస్సు ఆధారిత వ్యవస్థలు, శాటిలైట్ కనెక్టివిటీ వంటి అంశాలతో భవిష్యత్ టెలికాం రంగంలో ప్రపంచానికి మార్గదర్శకంగా నిలవాలనే లక్ష్యంతో కేంద్ర ప్రభుత్వం ముందడుగులు వేస్తోంది.
