రాయలసీమ న్యూస్, తెలంగాణ డెస్క్: తెలంగాణను విద్యాపరంగా దేశంలో అగ్రగామి రాష్ట్రంగా తీర్చిదిద్దేందుకు తమ ప్రభుత్వం కట్టుబడి ఉందని ముఖ్యమంత్రి రేవంత్ రెడ్డి స్పష్టం చేశారు. మర్రి చెన్నారెడ్డి మానవ వనరుల అభివృద్ధి కేంద్రంలో జరిగిన కార్యక్రమంలో ఆయన విద్యా రంగంపై ప్రభుత్వ ప్రాధాన్యత, తీసుకుంటున్న చర్యలను వివరించారు.
రాష్ట్ర బడ్జెట్‌లో విద్యా రంగానికి ఏకంగా 9 శాతం నిధులు కేటాయిస్తున్నామని సీఎం తెలిపారు. ఇది విద్యా వ్యవస్థను పూర్తిస్థాయిలో బలోపేతం చేయాలనే ప్రభుత్వ సంకల్పానికి నిదర్శనమని పేర్కొన్నారు. ఓట్ల రాజకీయాల కోసం కాకుండా, పిల్లల బంగారు భవిష్యత్తును దిద్ది తీర్చాలనే ఏకైక లక్ష్యంతోనే విద్యాశాఖ బాధ్యతలను తాను స్వయంగా పర్యవేక్షిస్తున్నానని ఆయన చెప్పారు.
గతంలో ఉన్న నాయకులు ఇరిగేషన్ శాఖను తమ వద్ద ఉంచుకున్నారని, అయితే తాను విద్యాశాఖ బాధ్యతను తన వద్దే ఉంచుకున్నానని సీఎం వ్యాఖ్యానించారు. 80 వేల పుస్తకాలు చదివానని చెప్పిన నాయకుడి కాళేశ్వరం ప్రాజెక్టు కూలిపోయిందని ఆయన విమర్శించారు. తాను ప్రాజెక్టులకు ప్రాధాన్యత ఇవ్వడం కంటే పిల్లల చదువులకే ప్రాధాన్యత ఇస్తానని స్పష్టం చేశారు.
లక్షల మంది ఇంజనీరింగ్ పట్టాలు పొందుతున్నా, ఉద్యోగానికి దరఖాస్తు రాయలేని పరిస్థితి రాకూడదని సీఎం అభిప్రాయపడ్డారు. విద్యా ప్రమాణాలను పెంచడం తమ నైతిక బాధ్యతగా ప్రభుత్వం భావిస్తోందని ఆయన పేర్కొన్నారు. నైపుణ్యాలు, ప్రాయోగిక జ్ఞానం, భాషా సామర్థ్యాలు పెంపొందించేలా విద్యా విధానాలు రూపకల్పన చేయాల్సిన అవసరాన్ని ఆయన రుజువు చేశారు.
చిన్నతనంలోనే పిల్లలను హాస్టళ్లలో పెట్టడం వల్ల కుటుంబ సంబంధాలు దెబ్బతింటున్నాయని సీఎం ఆందోళన వ్యక్తం చేశారు. ఒంటరిగా పెరిగే పిల్లలు పెద్దయ్యాక తల్లిదండ్రులను వృద్ధాశ్రమాలకు పంపే ప్రమాదం ఉందని ఆయన హెచ్చరించారు. పాఠశాలల్లో ఉపాధ్యాయులే తల్లిదండ్రుల స్థానంలో ఉండి పిల్లలకు సరైన మార్గదర్శనం చేయాలని ఆయన పిలుపునిచ్చారు.
ప్రతి మండలాన్ని ఒక క్లస్టర్‌గా తీసుకుని విద్యా ప్రణాళికలు తయారు చేయాలని సీఎం సూచించారు. స్థానిక అవసరాలు, సామాజిక పరిస్థితులను దృష్టిలో పెట్టుకుని క్లస్టర్ స్థాయిలో విద్యా అభివృద్ధి కార్యక్రమాలు రూపొందిస్తే మంచి ఫలితాలు వస్తాయని ఆయన అభిప్రాయపడ్డారు.
ఉపాధ్యాయుల సామర్థ్యాలను పెంపొందించేందుకు విదేశీ శిక్షణ కార్యక్రమాలు చేపడుతున్నట్లు సీఎం ప్రకటించారు. విద్యాబోధనలో అంతర్జాతీయ ప్రమాణాలు అందించేందుకు ఏటా 10 నుండి 12 మంది ఉపాధ్యాయులను ‘స్టడీ లీవ్’పై విదేశాలకు పంపనున్నట్లు తెలిపారు. టీచర్ల ప్రమోషన్లు, బదిలీల బాధ్యతను తానే చూసుకుంటానని, అడగకుండానే ప్రతి నెల ఒకటో తేదీన జీతాలు జమవుతున్నాయని గుర్తుచేశారు.
“2034 వరకు ఈ రాష్ట్రానికి నేనే సీఎంగా ఉంటాను, ఎలాంటి సందేహాలు వద్దు”
అని తన రాజకీయ ప్రస్థానంపై స్పందిస్తూ సీఎం రేవంత్ రెడ్డి ధీమా వ్యక్తం చేశారు. రాష్ట్ర అభివృద్ధి, ముఖ్యంగా విద్యా రంగ పురోగతిపై తన నాయకత్వం కొనసాగుతుందనే విశ్వాసాన్ని ఈ సందర్భంగా ఆయన వెల్లడించారు.
