రాయలసీమ న్యూస్, తెలంగాణ డెస్క్: రాష్ట్ర పరిపాలనలో మరింత పారదర్శకతకు అవకాశం కల్పించేలా ప్రభుత్వ వ్యవస్థను పూర్తిస్థాయిలో డిజిటలైజ్ చేయాలని ముఖ్యమంత్రి ఎ. రేవంత్ రెడ్డి అధికారులు ఆదేశించారు. రాష్ట్రంలో డిజిటల్ గవర్నెన్స్ అమలు దిశగా సమగ్ర ప్రణాళికలను సిద్ధం చేసి, అవసరమైన మేరకు చట్టాలను రూపొందించే పనిని వేగవంతం చేయాలని సూచించారు.
కాంట్రాక్టు, ఔట్సోర్సింగ్ ఉద్యోగుల సమస్యలపై ముఖ్యమంత్రి ఎంసీఆర్ హెచ్ఆర్డీలోని బోధి పెవిలియన్లో ఉన్నతాధికారులతో సమీక్ష నిర్వహించారు. ప్రజలకు మెరుగైన సేవలను అందించడంతో పాటు సంక్షేమ పథకాలు నేరుగా లబ్ధిదారులకు చేరే విధంగా డిజిటల్ గవర్నెన్స్ అమలు చేయాల్సిన అవసరాన్ని ఆయన అధికారులు దృష్టికి తీసుకువచ్చారు.
ప్రభుత్వ ఉద్యోగులతో పాటు కాంట్రాక్టు, ఔట్సోర్సింగ్ ఉద్యోగులకు ప్రతి నెల 1వ తేదీన జీతాలు అందేలా వ్యవస్థను పూర్తిగా డిజిటలైజ్ చేయాలని ముఖ్యమంత్రి స్పష్టంగా చెప్పారు. వివిధ విభాగాల్లో పనిచేస్తున్న కాంట్రాక్టు, ఔట్సోర్సింగ్ ఉద్యోగుల సంఖ్య, వారి జీతాలు, బ్యాంక్ అకౌంట్ వివరాలు తదితర సమాచారాన్ని డిజిటల్ రూపంలో నమోదు చేయాలని ఆదేశించారు.
రాష్ట్రంలో దాదాపు 4,800 కాంట్రాక్టు, ఔట్సోర్సింగ్ ఏజెన్సీలు ఉన్నాయని, వీటిలో సుమారు 4,300 ఏజెన్సీలు ఉద్యోగులకు ESI, PF చెల్లించడం లేదని అధికారులు ముఖ్యమంత్రి దృష్టికి తీసుకువచ్చారు. ఏజెన్సీలకు ప్రభుత్వం నుంచి చెల్లింపులు జరిగినప్పటికీ, ఉద్యోగులకు సమయానికి జీతాలు చెల్లించడం లేదని సమావేశంలో వివరించారు.
ఈ అంశాన్ని తీవ్రంగా పరిగణించిన ముఖ్యమంత్రి, ఇలాంటి ఏజెన్సీలపై కఠిన చర్యలు తీసుకోవాలని అధికారులను ఆదేశించారు. డిజిటల్ గవర్నెన్స్ అమలుతో ఇలాంటి అక్రమాలకు చెక్ పెట్టేలా వ్యవస్థను రూపకల్పన చేయాలని సూచించారు.
కాంట్రాక్టు, ఔట్సోర్సింగ్ ఉద్యోగులకు ప్రతి నెల 1 నుంచి గరిష్టంగా 5వ తేదీ లోగా పారదర్శకంగా జీతాలు చెల్లించేందుకు డిజిటల్ గవర్నెన్స్ ఉపయోగపడుతుందని ముఖ్యమంత్రి అభిప్రాయపడ్డారు. అందుకోసం సంబంధిత వివరాలన్నింటినీ డిజిటలైజ్ చేయాలని మరోసారి స్పష్టం చేశారు.
ప్రభుత్వం నుంచి చెల్లింపులు జరిగినప్పటికీ సమయానికి ఉద్యోగులకు జీతాలు చెల్లించని కాంట్రాక్టు, ఔట్సోర్సింగ్ ఏజెన్సీలపై కఠిన చర్యలు తీసుకోవాలని సమావేశంలో సూచించారు. ఈ అంశంపై పూర్తిస్థాయిలో కసరత్తు చేసేందుకు ఒక ఉన్నత స్థాయి కమిటీని నియమించాలని ముఖ్యమంత్రి ప్రతిపాదించారు.
ఈ కమిటీ 100 రోజుల్లో నివేదిక సమర్పించి, కాంట్రాక్టు, ఔట్సోర్సింగ్ ఉద్యోగుల సమస్యలను ఒక కొలిక్కి తీసుకురావాలని ఆయన ఆదేశించారు. హెల్త్ కార్డులు, ఇతర ప్రయోజనాలు అమలు చేసేందుకు ప్రభుత్వ ఉద్యోగుల వివరాలను కూడా డిజిటలైజ్ చేయాలని సూచించారు.
నిరంతర మానిటరింగ్ కోసం ఆర్థిక శాఖ ఆధ్వర్యంలో ఒక ప్రత్యేక వ్యవస్థను ఏర్పాటు చేసుకోవాలని ముఖ్యమంత్రి సూచించారు. ఈ సమావేశంలో MP వేం నరేందర్ రెడ్డి, సలహాదారు కె. రామకృష్ణారావు, ప్రభుత్వ ప్రధాన కార్యదర్శి సంజయ్ జాజు, MA&UD ప్రత్యేక ప్రధాన కార్యదర్శి జయేష్ రంజన్, ఎంసీఆర్ హెచ్ఆర్డీ వైస్ చైర్మన్ శాంతి కుమారి తదితర ఉన్నతాధికారులు పాల్గొన్నారు.
