రాయలసీమ న్యూస్, ఎంటర్‌టైన్‌మెంట్ డెస్క్: కథానాయకుడు మంచు విష్ణు ప్రధాన పాత్రలో నటించిన భక్తి చిత్రం ‘కన్నప్ప’ మళ్లీ ప్రేక్షకుల ముందుకు రానుంది. ఈ నెల 27తో ఈ చిత్రం విడుదలై ఏడాది పూర్తవుతున్న సందర్భంగా, చిత్రాన్ని మరోసారి థియేటర్లలో ప్రదర్శించేందుకు నిర్ణయించినట్టు చిత్రబృందం తెలిపింది.
‘కన్నప్ప’ చిత్రానికి ముఖేశ్‌కుమార్ సింగ్ దర్శకత్వం వహించారు. మెహన్‌బాబు ఈ చిత్రాన్ని నిర్మించారు. అక్షయ్‌కుమార్, మోహన్‌లాల్, ప్రభాస్, కాజల్, బ్రహ్మానందం తదితరులు కీలక పాత్రల్లో నటించారు. భక్తకన్నప్ప కథ ఆధారంగా రూపొందిన ఈ చిత్రం తెలుగులో మంచి ఆదరణను సొంతం చేసుకుంది.
విజువల్ పరంగా ప్రత్యేకంగా నిలిచిన ఈ చిత్రం, భారీ నిర్మాణ విలువలు, సాంకేతిక నైపుణ్యంతో ప్రేక్షకులను ఆకట్టుకుంది. దేవభక్తి, త్యాగం, నమ్మకం వంటి అంశాలను ప్రధానంగా తీసుకుని రూపొందించిన ఈ చిత్రానికి కుటుంబ ప్రేక్షకుల నుంచి కూడా మంచి స్పందన లభించింది.
చిత్రంలోని గ్రాఫిక్స్, యాక్షన్ సన్నివేశాలు, పాటలు, నేపథ్య సంగీతం ప్రేక్షకుల మన్ననలు పొందాయి. ముఖ్యంగా కన్నప్ప పాత్ర చిత్రణ, అతని భక్తి ప్రయాణాన్ని తెరపై ఆవిష్కరించిన తీరు సినీప్రియులను ఆకట్టుకున్న అంశాలుగా పరిశ్రమ వర్గాలు పేర్కొంటున్నాయి.
ఈ నెల 27న పరిమిత సంఖ్యలోని థియేటర్లలో ‘కన్నప్ప’ను మళ్లీ విడుదల చేయనున్నట్టు మంచు విష్ణు ఒక ప్రకటనలో తెలిపారు. గతంలో థియేటర్లలో చూసిన వారు, ఓటీటీ ద్వారా చూసిన ప్రేక్షకులు, ఇంకా పెద్ద తెరపై చూడలేకపోయిన సినీప్రియులు ఈ అవకాశాన్ని వినియోగించుకోవచ్చని చిత్రబృందం భావిస్తోంది.
ఇటీవలి కాలంలో విజయవంతమైన చిత్రాలను వార్షికోత్సవాల సందర్భంగా తిరిగి విడుదల చేసే ధోరణి పెరుగుతోంది. అదే తరహాలో ‘కన్నప్ప’ను కూడా మరోసారి ప్రేక్షకుల ముందుకు తీసుకురావడం గమనార్హం. విడుదలకు సంబంధించిన పూర్తి వివరాలు, థియేటర్ల జాబితాను త్వరలో ప్రకటించే అవకాశం ఉంది.
