రాయలసీమ న్యూస్, ఎంటర్‌టైన్‌మెంట్ డెస్క్:
సందీప్ రెడ్డి వంగా కాదు..
మహేష్ నెక్స్ట్ అనిల్ రావిపూడితోనేనా?
సూపర్ స్టార్ మహేష్ బాబు హీరోగా ఎస్.ఎస్.రాజమౌళి దర్శకత్వంలో రూపుదిద్దుకుంటున్న ‘వారణాసి’ సినిమాపై ప్రపంచవ్యాప్తంగా భారీ అంచనాలు నెలకొన్నాయి. ప్రత్యేకంగా మహేష్ బాబు అభిమానులు ఈ చిత్రాన్ని కోసం ఎంతో ఆతృతగా ఎదురుచూస్తున్నారు. ‘వారణాసి’ విడుదలైతే ప్రపంచ రికార్డులు సృష్టించడం ఖాయమనే నమ్మకంతో ఉన్న అభిమానులు, ఈసారి మాత్రం మునుపటి సినిమాల్లా తరచూ అప్డేట్లు డిమాండ్ చేయకుండా ఓపికగా ఉన్నారు.
అయితే మహేష్ బాబు అభిమానుల్లో ఒక విషయంలో మాత్రం ఇంకా స్పష్టత రాలేదనే ఆందోళన కనిపిస్తోంది. అదే మహేష్ బాబు 30వ సినిమా, అంటే ‘వారణాసి’ తర్వాత ఆయన చేయబోయే తదుపరి చిత్రానికి దర్శకుడు ఎవరు అన్న ప్రశ్న. ఈ ప్రశ్నకు ఇప్పటివరకు అధికారిక సమాధానం రాలేదు. కానీ టాలీవుడ్ వర్గాల్లో మాత్రం వరుసగా ఊహాగానాలు వినిపిస్తున్నాయి.
‘పెద్ది’ విడుదలైన తర్వాత దర్శకుడు బుచ్చిబాబు ఓ ఇంటర్వ్యూలో మహేష్ బాబుకు ఓ కథ వినిపించినట్టు వెల్లడించడంతో, మహేష్ బాబు నెక్స్ట్ సినిమా బుచ్చిబాబు దర్శకత్వంలోనే ఉంటుందని అప్పట్లో టాక్ మొదలైంది. ఇదే సమయంలో మరో వార్త హాట్ టాపిక్‌గా మారింది. ఏషియన్ సునీల్ నిర్మాణంలో మహేష్ బాబు తదుపరి సినిమా ఉండబోతోందని, దానికి సందీప్ రెడ్డి వంగా దర్శకత్వం వహిస్తారని ప్రచారం సాగింది. దీంతో అభిమానుల్లో మరింత కన్ఫ్యూజన్ నెలకొంది.
ఇక సందీప్ రెడ్డి వంగా ప్రస్తుత బిజీ షెడ్యూల్ కూడా ఈ ఊహాగానాలపై ప్రశ్నార్థక చిహ్నం పెడుతోంది. ప్రస్తుతం ఆయన ప్రభాస్‌తో ‘స్పిరిట్’ చిత్రాన్ని తెరకెక్కిస్తున్నారు. ఆ తర్వాత అల్లు అర్జున్‌తో ఒక సినిమా చేయాల్సి ఉంది. అలాగే రణబీర్ కపూర్‌తో ‘యానిమల్ పార్క్’ ప్రాజెక్టు కూడా చర్చల్లోనే ఉంది. ఈ క్రమంలో మహేష్ బాబుతో ఆయన సినిమా త్వరలోనే సెట్స్‌పైకి వెళ్లే అవకాశాలు తక్కువగానే కనిపిస్తున్నాయని సినీ వర్గాలు భావిస్తున్నాయి.
మరోవైపు అనిల్ రావిపూడి దర్శకత్వంలో మహేష్ బాబు చాలా కాలంగా ఒక సినిమా చేయాలని ఆసక్తి చూపుతున్నట్టు టాక్ వినిపిస్తోంది. ‘గుంటూరు కారం’ తర్వాత ఈ కాంబినేషన్‌లో సినిమా వస్తుందనే ప్రచారం ఒక దశలో బలంగా వినిపించినా, కొన్ని కారణాల వల్ల ఆ ప్రాజెక్టు ఆగిపోయినట్టు సమాచారం.
ఇప్పుడేమైతే ‘వారణాసి’ వంటి భారీ స్థాయి చిత్రంలో నటిస్తున్న మహేష్ బాబు, ఆ తర్వాత పూర్తిగా భిన్నమైన జానర్‌లో, అనిల్ రావిపూడి దర్శకత్వంలో ఒక ఫ్యామిలీ ఎంటర్టైనర్ చేయాలనే ఆలోచనలో ఉన్నారనే వార్తలు వినిపిస్తున్నాయి. అనిల్ రావిపూడి వినిపించిన కథ ప్రకారం, ఈ ప్రాజెక్టు క్రీడల నేపథ్యంతో సాగుతుందని, అందులో మహేష్ బాబు కోచ్ పాత్రలో కనిపించే అవకాశం ఉందని టాలీవుడ్ వర్గాల్లో చర్చ నడుస్తోంది.
అయితే మహేష్ బాబు 30వ సినిమా గురించి ఇప్పటివరకు ఎటువంటి అధికారిక ప్రకటన వెలువడలేదు. ‘వారణాసి’ షూటింగ్ పూర్తయ్యే దశలో లేదా ఆ తర్వాతే ఈ ప్రాజెక్టుపై స్పష్టత వచ్చే అవకాశం ఉందని పరిశ్రమ వర్గాలు అంచనా వేస్తున్నాయి.
