రాయలసీమ న్యూస్, ఎంటర్‌టైన్‌మెంట్ డెస్క్:

ఓజీ 2పై కీలక అప్డేట్

జాస్ గంభీరా పాత్రతో పవన్ కళ్యాణ్ మళ్లీ రానున్నారా?

పవర్ స్టార్ పవన్ కళ్యాణ్ నటించిన గ్యాంగ్ స్టర్ డ్రామా OG చిత్రం బాక్సాఫీస్ వద్ద సంచలన విజయాన్ని సాధించిన సంగతి తెలిసిందే. స్టైలిష్ ప్రెజెంటేషన్, మాస్ ఎలిమెంట్స్‌తో ఈ సినిమా అభిమానులను విపరీతంగా ఆకట్టుకుంది. దర్శకుడు సుజీత్ రూపొందించిన ఈ చిత్రం పవన్ కళ్యాణ్ కెరీర్‌లోనే అత్యధిక వసూళ్లు సాధించిన సినిమాగా నిలిచింది. సుమారు రూ.300 కోట్లకు పైగా వసూళ్లు రాబట్టిన ఈ చిత్రం, థియేటర్లలో భారీ విజయాన్ని అందుకుంది.

ఈ విజయంతోనే OGకి సీక్వెల్‌గా OG 2 రానుందని చిత్రబృందం ముందే అధికారికంగా ప్రకటించింది. అయితే ఇటీవల పవన్ కళ్యాణ్ సినిమాలకు కొంతకాలం విరామం ప్రకటించడంతో, OG 2 భవిష్యత్తుపై అభిమానుల్లో అనేక సందేహాలు మొదలయ్యాయి. సినిమా వాయిదా పడుతుందా? లేక పూర్తిగా ఆగిపోతుందా? అనే చర్చలు సోషల్ మీడియాలో విస్తృతంగా కనిపించాయి.

ఇలాంటి పరిస్థితుల్లో తాజాగా సోషల్ మీడియాలో పవన్ కళ్యాణ్ క్రియేటివ్ వర్క్స్ నుంచి OG 2పై కీలక అప్డేట్ వచ్చింది. ఈ అప్డేట్‌తో సినిమా జరుగుతుందా లేదా అనే అనుమానాలకు గట్టి సమాధానం లభించినట్టైంది. మేకర్స్ తమ అధికారిక పోస్టులో పవన్ కళ్యాణ్ ఈ ప్రాజెక్ట్‌కి కట్టుబడి ఉన్నారని స్పష్టం చేశారు.

పవన్ కళ్యాణ్ క్రియేటివ్ వర్క్స్ నుంచి వచ్చిన ఈ స్పష్టీకరణతో OG 2పై నెలకొన్న అనుమానాలు తొలగిపోయినట్టే అని అభిమానులు భావిస్తున్నారు. ఈ ఒక్క అప్డేట్‌తోనే పవన్ కళ్యాణ్ అభిమానుల్లో ఉత్సాహం మరింత పెరిగింది. మరోసారి ఓజాస్ గంభీరా పాత్రను భారీ తెరపై చూడబోతున్నామనే ఆనందంలో ఫ్యాన్స్ సోషల్ మీడియాలో తమ హర్షాన్ని వ్యక్తం చేస్తున్నారు.

మొదటి భాగమైన OGలో ప్రియాంక మోహన్ హీరోయిన్‌గా నటించగా, శ్రీయ రెడ్డి, అర్జున్ దాస్, ఇమ్రాన్ హాష్మీ కీలక పాత్రల్లో కనిపించారు. సుజీత్ దర్శకత్వం, తమన్ సంగీతం ఈ సినిమాకు ప్రధాన బలాలుగా నిలిచాయి. గ్యాంగ్ స్టర్ డ్రామా జానర్‌లో రూపొందిన ఈ చిత్రం, స్టోరీ టెల్లింగ్, టెక్నికల్ వాల్యూస్ పరంగా మంచి ప్రశంసలు అందుకుంది.

ఇటీవల చాలా సినిమాలకు సీక్వెల్స్ ప్రకటించినా, వాటిలో చాలావరకు ఆచరణలోకి రాకపోవడం వల్ల OG 2పై కూడా సందేహాలు వ్యక్తమయ్యాయి. అయితే తాజాగా వచ్చిన ఈ అధికారిక అప్డేట్ ఆ అనుమానాలన్నింటినీ పటాపంచలు చేసినట్టైంది. ఇప్పుడు అభిమానుల దృష్టి అంతా దర్శకుడు సుజీత్ విదేశాల నుంచి తిరిగి వచ్చిన తర్వాత జరగబోయే చర్చలు, తదుపరి అధికారిక ప్రకటనలపైనే నిలిచింది.