రాయలసీమ న్యూస్, ఎంటర్టైన్మెంట్ డెస్క్:
సుకుమార్ బ్యానర్లో కొత్త దర్శకుడు బాబీకి ఛాన్స్;
సిద్ధు జొన్నలగడ్డ కొత్త సినిమా చర్చల్లో
‘డీజే టిల్లు’, ‘టిల్లు స్క్వేర్’ సినిమాలతో ప్రేక్షకుల్లో ప్రత్యేక గుర్తింపు తెచ్చుకున్న నటుడు సిద్ధు జొన్నలగడ్డ మరో కొత్త ప్రాజెక్ట్తో వార్తల్లోకి వచ్చాడు. ఇండస్ట్రీలో ఎన్నేళ్లుగా ఉన్నప్పటికీ, మధ్య మధ్యలో మాత్రమే ఆకట్టుకునే సినిమాలు చేసిన సిద్ధు, ‘డీజే టిల్లు’ తర్వాత మాత్రం భారీ క్రేజ్ సంపాదించాడు. అయితే ఆ తర్వాత వచ్చిన చిత్రాలు ఆశించిన స్థాయిలో విజయాలు సాధించకపోవడంతో, మళ్లీ గట్టి హిట్ కోసం ఎదురుచూస్తున్నాడు.
సిద్ధు జొన్నలగడ్డ కెరీర్లో వరుస విజయాలు రాకపోవడానికి కారణాలపై ఫిల్మ్ వర్గాల్లో పలు చర్చలు నడుస్తున్నాయి. కొన్ని విషయాలను ఆయనే మీడియా ముందుకు వచ్చి వెల్లడించిన సందర్భాలు ఉన్నాయి. అయితే ప్రస్తుతం ఆయన చేస్తున్న ప్రాజెక్టులపై దృష్టి సారిస్తే, వెంకీ అట్లూరి దర్శకత్వంలో ఓ వెబ్సిరీస్లో నటిస్తున్నాడు. అలాగే ఆర్ఎస్జే స్వరూప్ దర్శకత్వంలో మరో సినిమా కూడా చేస్తున్నాడు.
ఇవే కాకుండా, ప్రముఖ దర్శకుడు సుకుమార్ నిర్మాణంలో సిద్ధు మరో కొత్త సినిమాకు గ్రీన్ సిగ్నల్ ఇచ్చినట్లు సమాచారం. ఈ ప్రాజెక్ట్తో సుకుమార్ సోదరుడి కుమారుడు బాబీ దర్శకుడిగా పరిచయం కానున్నాడని ఫిల్మ్నగర్ టాక్. త్వరలోనే ఈ సినిమాను అధికారికంగా ప్రకటించే అవకాశముందని సినీ వర్గాలు చెబుతున్నాయి.
ఇప్పటివరకు సుకుమార్ శిష్యులుగా, సహాయకులుగా పనిచేసిన పలువురు దర్శకులు ఇండస్ట్రీకి వచ్చారు. అయితే ఆయన కుటుంబ సభ్యులలో ఎవరికీ ఇప్పటివరకు దర్శకత్వ అవకాశాలు రాలేదు. ఈ నేపథ్యంలో బాబీకి సిద్ధు జొన్నలగడ్డ హీరోగా చేసే ఈ సినిమా ద్వారా అవకాశం లభించడం ప్రత్యేకంగా భావిస్తున్నారు. కథ, స్క్రిప్ట్ విషయంలో సుకుమార్ స్వయంగా కఠినంగా పరిశీలించే వ్యక్తిగా పేరున్నందున, ఈ ప్రాజెక్ట్పై ఆసక్తి మరింత పెరిగింది.
అయితే ఇక్కడ అసలు చర్చనీయాంశం సిద్ధు జొన్నలగడ్డ స్టైల్ గురించే. దర్శకుడు ఎలాంటి కథ అనుకున్నా, రాసుకున్నా, చివరికి ఆ సినిమాను తన మీటర్, తన స్టైల్లోకి తీసుకువెళ్లే ప్రయత్నం చేస్తాడని ఫిల్మ్ వర్గాల్లో అభిప్రాయం వినిపిస్తోంది. గతంలో వచ్చిన ‘జాక్’, ‘తెలుసు కదా’ సినిమాల విషయంలో కూడా ఇదే పరిస్థితి నెలకొన్నట్లు సినీ వర్గాలు చెబుతున్నాయి.
తనపై నమ్మకం పెట్టుకుని నిర్మాతలు సినిమాలు చేస్తున్నప్పుడు, కథ విషయంలో కూడా తాను జాగ్రత్తలు తీసుకోవాల్సిందేనని సిద్ధు భావిస్తాడని పరిశ్రమలోని కొందరు వ్యాఖ్యానిస్తున్నారు. ఈ నేపథ్యంలో కొత్తగా దర్శకుడిగా పరిచయం కాబోతున్న బాబీకి, తాను అనుకున్న విధంగా సినిమా తీర్చిదిద్దుకునే స్వేచ్ఛ ఎంతవరకు లభిస్తుందనే అంశంపై ఆసక్తికర చర్చ సాగుతోంది.
సుకుమార్ అడ్డా నుండి వస్తున్న ఈ కొత్త దర్శకుడు బాబీ, సిద్ధు జొన్నలగడ్డతో కలిసి ఎలా సినిమా రూపుదిద్దుకుంటాడు, కథపై ఎవరి ప్రభావం ఎంతవరకు ఉంటుంది అన్నది అధికారిక ప్రకటన, తదుపరి వివరాలు వెలుగులోకి వచ్చిన తర్వాత స్పష్టమవనుంది.
