రాయలసీమ న్యూస్, వెదర్ డెస్క్:
చురుగ్గా నైరుతి రుతుపవనాలు..
పలు జిల్లాలకు భారీ వర్షాల హెచ్చరిక.. ఎల్లో అలర్ట్
ఆంధ్రప్రదేశ్‌ మీదుగా నైరుతి రుతుపవనాలు చురుగ్గా కొనసాగుతున్నాయని భారత వాతావరణ శాఖ తెలిపింది. ప్రస్తుతం రుతుపవనాల ప్రభావం శ్రీకాకుళం జిల్లా కళింగపట్నం వరకు విస్తరించినట్లు అధికారులు వివరించారు. ఈ ప్రభావంతో రాష్ట్రంలోని అనేక ప్రాంతాల్లో వర్షాలు విస్తృతంగా కురుస్తున్నాయి.
వాతావరణ శాఖ అంచనాల ప్రకారం రానున్న గంటల్లో రాష్ట్రంలోని పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉంది. ముఖ్యంగా అల్లూరి సీతారామరాజు, కోనసీమ, పశ్చిమ గోదావరి, కృష్ణా, ప్రకాశం, నెల్లూరు జిల్లాల్లోని కొన్ని ప్రాంతాల్లో ఉరుములు, మెరుపులతో కూడిన భారీ వర్షాలు నమోదయ్యే అవకాశం ఉన్నట్లు పేర్కొంది. ఈ నేపథ్యంలో ఆయా జిల్లాలకు ఎల్లో అలర్ట్ జారీ చేసినట్లు వెల్లడించింది.
అదేవిధంగా అల్లూరి సీతారామరాజు, ఏలూరు, ఎన్టీఆర్, కృష్ణా, నంద్యాల, వైఎస్సార్ కడప, అన్నమయ్య, తిరుపతి జిల్లాల్లో నేడు జూన్ 12న భారీ వర్షాలు కురిసే అవకాశాలు ఉన్నాయని వాతావరణ శాఖ స్పష్టం చేసింది. లోతట్టు ప్రాంతాల్లో నివసించే ప్రజలు అప్రమత్తంగా ఉండాలని, అవసరమైన జాగ్రత్తలు తీసుకోవాలని సూచించింది.
కోస్తాంధ్ర వ్యాప్తంగా గంటకు 50 నుంచి 60 కిలోమీటర్ల వేగంతో బలమైన ఈదురుగాలులు వీచే అవకాశం ఉందని అధికారులు హెచ్చరించారు. భారీ వర్షాలు, ఈదురుగాలుల ప్రభావంతో రహదారులపై నీరు నిలిచిపోవడం, చెట్లు విరిగిపడే ప్రమాదం ఉన్నందున అత్యవసర పరిస్థితులు తప్ప ప్రజలు బయటకు వెళ్లకుండా ఉండాలని సూచించారు.
సముద్రం అల్లకల్లోలంగా మారే అవకాశం ఉన్నందున మత్స్యకారులు చేపల వేటకు వెళ్లకూడదని వాతావరణ శాఖ స్పష్టమైన హెచ్చరికలు జారీ చేసింది. ఇప్పటికే సముద్రంలో ఉన్న మత్స్యకారులు తక్షణమే తీరానికి చేరుకోవాలని సూచించింది.
రాష్ట్ర వ్యాప్తంగా వర్షాలు మరికొన్ని రోజులు కొనసాగనున్న నేపథ్యంలో సంబంధిత జిల్లా యంత్రాంగాలు అప్రమత్తంగా ఉండాలని ప్రభుత్వం ఆదేశించినట్లు సమాచారం. అత్యవసర పరిస్థితులను ఎదుర్కొనేందుకు అవసరమైన చర్యలు సిద్ధంగా ఉంచినట్లు అధికారులు వెల్లడించారు. ప్రజలు అధికారిక వాతావరణ హెచ్చరికలను గమనిస్తూ, స్థానిక అధికారుల సూచనలను పాటించాలని సూచిస్తున్నారు.
