రాయలసీమ న్యూస్, వై.యస్.ఆర్:
కడప జిల్లాలో మూడు రోజుల పర్యటనకు మాజీ సీఎం వైఎస్ జగన్
కడప జిల్లా పులివెందుల నియోజకవర్గంలో మాజీ ముఖ్యమంత్రి, వైఎస్సార్సీపీ అధ్యక్షుడు వైఎస్ జగన్ మూడు రోజుల పర్యటనకు సిద్ధమయ్యారు. మంగళవారం నుంచి 25వ తేదీ వరకు ఆయన వివిధ కార్యక్రమాల్లో పాల్గొననున్నారు. పార్టీ వర్గాలు, స్థానిక నాయకులు, అభిమానులు ఈ పర్యటనకు సంబంధించిన ఏర్పాట్లు పూర్తి చేసినట్లు సమాచారం.
వైఎస్ జగన్ రేపు సాయంత్రం పులివెందుల చేరుకోనున్నారు. అక్కడ తన క్యాంప్ కార్యాలయంలో ప్రజాదర్బార్ నిర్వహించేందుకు ఏర్పాట్లు చేస్తున్నారు. స్థానిక ప్రజలు, కార్యకర్తలు, వివిధ సమస్యలతో వచ్చే వర్గాలను ఆయన కలుసుకునే అవకాశం ఉంది. పులివెందులలోని క్యాంప్ కార్యాలయం పరిసరాల్లో భద్రతా ఏర్పాట్లు కట్టుదిట్టం చేసినట్లు తెలిసింది.
ఈ నెల 24వ తేదీ ఉదయం వైఎస్ జగన్ వేముల మండలం భూమయ్యగారిపల్లిలోని లక్ష్మీనరసింహ స్వామి దేవాలయాన్ని సందర్శించనున్నారు. ముఖ్యమంత్రిగా ఉన్న సమయంలో ఈ దేవాలయ అభివృద్ధికి కోటిన్నరకు పైగా నిధులు మంజూరు చేసినట్లు అధికార వర్గాలు గుర్తుచేస్తున్నాయి. దేవాలయ అభివృద్ధి పనుల్లో ఎంపీ వైఎస్ అవినాష్ రెడ్డి, పాడా నిధులతో కూడా మరికొన్ని పనులు చేపట్టినట్లు సమాచారం.
దాతల విరాళాలు, ప్రభుత్వ మంజూరులు, ఇతర నిధులు కలుపుకుని సుమారు రూ.2.5 కోట్ల వ్యయంతో లక్ష్మీనరసింహ స్వామి దేవాలయ పునఃప్రతిష్ట నిర్వహించేందుకు ఏర్పాట్లు చేశారు. పునఃప్రతిష్ట కార్యక్రమం సందర్భంగా ప్రత్యేక పూజలు, వేద మంత్రోచ్ఛారణలతో వైదిక కార్యక్రమాలు జరగనున్నాయి. ఈ కార్యక్రమానికి వైఎస్ జగన్ హాజరుకానుండటంతో భూమయ్యగారిపల్లి, పరిసర ప్రాంతాల్లో ఉత్సాహ వాతావరణం నెలకొంది.
దేవాలయంలో ప్రత్యేక పూజల అనంతరం వైఎస్ జగన్ తిరిగి పులివెందుల క్యాంప్ కార్యాలయానికి చేరుకుంటారు. అక్కడ మధ్యాహ్నం నుంచి మళ్లీ ప్రజాదర్బార్ నిర్వహించనున్నారు. స్థానిక సమస్యలు, అభివృద్ధి కార్యక్రమాల అమలు, పార్టీ వ్యవహారాలపై ఆయన సమీక్ష చేసే అవకాశం ఉన్నట్లు పార్టీ వర్గాలు చెబుతున్నాయి.
ఈ నెల 25వ తేదీ ఉదయం వైఎస్ జగన్ కడప జిల్లా నుంచి తిరుగు ప్రయాణం కానున్నారు. మూడు రోజుల పర్యటనలో ఆయనను కలుసుకోవడానికి పార్టీ నాయకులు, కార్యకర్తలు, ప్రజలు పెద్ద సంఖ్యలో రావచ్చని అంచనా వేస్తున్నారు. పర్యటన మొత్తం వ్యవధిలో పోలీసులు, స్థానిక పరిపాలన విభాగాలు భద్రత, ట్రాఫిక్ నియంత్రణ, ప్రజా నిర్వహణకు సంబంధించిన చర్యలు చేపట్టాయి.
