రాయలసీమ న్యూస్, ఆంధ్రప్రదేశ్ డెస్క్: అమరావతి : ఆంధ్రప్రదేశ్‌లో లిక్కర్ స్కాం దేశంలోనే అతిపెద్ద కుంభకోణమని ఎక్సైజ్, గనుల శాఖ మంత్రి కొల్లు రవీంద్ర తీవ్ర ఆరోపణలు చేశారు. ఈ కుంభకోణంలో 50 మందికి పైగా ముద్దాయిలు ఉన్నారని ఆయన తెలిపారు. వైఎస్సార్‌సీపీ అధినేత వైఎస్ జగన్ మోహన్ రెడ్డి నేతృత్వంలో జరిగిన అక్రమాలపై మరిన్ని అసలు వాస్తవాలు త్వరలో బయటకు వచ్చే అవకాశముందని వ్యాఖ్యానించారు.
సోమవారం అమరావతిలో మీడియాతో మాట్లాడిన మంత్రి కొల్లు రవీంద్ర, ఏపీ లిక్కర్ స్కాం పై ఇప్పటికే విచారణ కొనసాగుతోందని, దీనిపై ఎన్ఫోర్స్మెంట్ డైరెక్టరేట్ కూడా దర్యాప్తు చేపట్టడంతో కొత్త పేర్లు వెలుగులోకి వచ్చే అవకాశం ఉందని పేర్కొన్నారు. మద్యం కుంభకోణంలో సూత్రధారులెవ్వరూ తప్పించుకోలేరని హెచ్చరించారు. వైఎస్సార్‌సీపీ ప్రభుత్వం అమలు చేసిన అస్తవ్యస్త విధానాలతో ఎక్సైజ్ శాఖను పూర్తిగా దెబ్బతీశారని మంత్రి విమర్శించారు. జగన్ ప్రభుత్వ విధానాల వల్ల ప్రజల ఆరోగ్యం దెబ్బతినడమే కాకుండా, ఎక్సైజ్ ఆదాయం కూడా గణనీయంగా పడిపోయిందని మండిపడ్డారు. సొంత బ్రాండ్లను ప్రోత్సహించేందుకు నాణ్యమైన బ్రాండ్లను పక్కన పెట్టారని, డిజిటల్ చెల్లింపులను ప్రోత్సహించకపోవడం వల్ల వ్యవస్థలో పారదర్శకత దెబ్బతిందని ఆరోపించారు.
తమ ప్రభుత్వం అధికారంలోకి వచ్చిన తర్వాత నూతన ఎక్సైజ్ పాలసీ ద్వారా వ్యవస్థను సరిదిద్దే చర్యలు తీసుకున్నామని కొల్లు రవీంద్ర స్పష్టం చేశారు. మద్యం అక్రమాలపై ఏర్పాటు చేసిన ప్రత్యేక దర్యాప్తు బృందం విచారణ పూర్తిగా పారదర్శకంగా జరుగుతోందని తెలిపారు.
కూటమి ప్రభుత్వం అమలు చేస్తున్న మద్యం పాలసీ పారదర్శకతపై మాజీ మంత్రి జోగి రమేశ్ నేతృత్వంలో వైఎస్సార్‌సీపీ నేతలు చెడ్డపేరు తీసుకురావడానికి ప్రయత్నించగా, ఆ ప్రయత్నంలోనే వారు బహిర్గతమయ్యారని మంత్రి వ్యాఖ్యానించారు. ప్రజల ఆరోగ్యానికి ప్రాధాన్యం ఇస్తూ, 13 రకాల పరీక్షల తర్వాతే నాణ్యమైన మద్యాన్ని మార్కెట్‌కు విడుదల చేస్తున్నామని ఆయన వివరించారు.
ఏపీ లిక్కర్ స్కాం పై జరుగుతున్న విచారణ, ఎన్ఫోర్స్మెంట్ డైరెక్టరేట్ జోక్యం, కొత్త పేర్లు బయటకు వచ్చే అవకాశాల నేపథ్యంలో రాష్ట్ర రాజకీయ వర్గాల్లో చర్చనీయాంశంగా మారింది. వైఎస్సార్‌సీపీ ప్రభుత్వ కాలంలో అమలైన ఎక్సైజ్ విధానాలపై ప్రస్తుత ప్రభుత్వం మరింత దర్యాప్తు జరిపే అవకాశాలపై కూడా ఊహాగానాలు వినిపిస్తున్నాయి.
