రాయలసీమ న్యూస్, ఆంధ్రప్రదేశ్ డెస్క్: విశాఖపట్నంలోని హిందూస్తాన్ పెట్రోలియం కార్పొరేషన్ లిమిటెడ్ (హెచ్‌పీసీఎల్) రిఫైనరీలో సోమవారం సాయంత్రం భారీ అగ్నిప్రమాదం సంభవించింది. ట్రయల్ రన్ జరుగుతున్న సమయంలో నూతన సల్ఫర్ ప్లాంట్‌లో ఒక్కసారిగా మంటలు ఎగిసిపడటంతో రిఫైనరీ పరిసర ప్రాంతమంతా దట్టమైన నల్లటి పొగ కమ్మేసింది. కమిషనింగ్ ప్రక్రియ ఇంకా పూర్తికాని ఈ ప్లాంట్‌లోనే ప్రమాదం చోటుచేసుకోవడం ఆందోళనకు గురిచేసింది.
రిఫైనరీ ప్రాంగణం నుంచి ఎగసిపడుతున్న అగ్నికీలలు, ఆకాశాన్ని తాకేలా ఎగిరిన దట్టమైన పొగను చూసి సమీప ప్రాంతాల ప్రజలు తీవ్ర భయాందోళనలకు గురయ్యారు. ప్రాణభయంతో ఇళ్ల నుంచి బయటకు పరుగులు తీసి సురక్షిత ప్రాంతాలకు తరలిపోయారు. కొంతసేపు ఆ ప్రాంతంలో గందరగోళ వాతావరణం నెలకొంది.
సమాచారం అందిన వెంటనే హెచ్‌పీసీఎల్ అంతర్గత భద్రతా విభాగం సిబ్బంది యుద్ధప్రాతిపదికన సంఘటనా స్థలానికి చేరుకుని అగ్నిమాపక చర్యలు ప్రారంభించారు. రిఫైనరీలోని అత్యవసర ప్రతిస్పందన వ్యవస్థను వెంటనే అమల్లోకి తెచ్చి, మంటలను అదుపులోకి తెచ్చేందుకు ప్రయత్నాలు ముమ్మరం చేశారు.
మంటల నియంత్రణలో భాగంగా సమీప పరిశ్రమల సహాయాన్ని కూడా హెచ్‌పీసీఎల్ యాజమాన్యం కోరింది. వారి అగ్నిమాపక వాహనాలు, సిబ్బంది సహకారంతో మంటలను అదుపులోకి తెచ్చే చర్యలు కొనసాగించాయి. అగ్నిమాపక శాఖ, పోలీసు శాఖల అధికారులతో సమన్వయం చేస్తూ పరిస్థితిని నియంత్రించేందుకు అధికారులు కృషి చేశారు.
ఈ ఘటనలో ప్రాణనష్టం జరగలేదని హెచ్‌పీసీఎల్ యాజమాన్యం ప్రాథమికంగా తెలిపింది. ప్రజలు ఎవరూ ఆందోళన చెందాల్సిన అవసరం లేదని, పరిస్థితి నియంత్రణలోనే ఉందని యాజమాన్యం భరోసా ఇచ్చింది. అయితే, అగ్నిప్రమాదానికి గల ఖచ్చితమైన కారణాలు ఇంకా తెలియాల్సి ఉందని స్పష్టం చేసింది.
రిఫైనరీలో ఏదైనా పేలుడు సంభవించడం వల్లనే మంటలు చెలరేగి ఉండవచ్చని అధికారులు ప్రాథమికంగా భావిస్తున్నారు. అయితే, ఇది కేవలం ప్రారంభ అంచనమేనని, పూర్తి వివరాలు దర్యాప్తు అనంతరం మాత్రమే వెల్లడవుతాయని పేర్కొన్నారు. ప్రమాదంతో సంభవించిన ఆస్తి నష్టానికి సంబంధించిన వివరాలు కూడా ఇంకా అధికారికంగా వెల్లడికాలేదు.
అధికారులు సంఘటనా స్థలాన్ని ఎప్పటికప్పుడు పర్యవేక్షిస్తూ, మిగతా యూనిట్ల భద్రతా పరిస్థితులను కూడా సమీక్షిస్తున్నారు. ఈ ఘటనపై పూర్తిస్థాయి దర్యాప్తు ప్రారంభించినట్లు సంబంధిత విభాగాలు తెలియజేశాయి. అగ్నిప్రమాదానికి దారితీసిన కారణాలు, భద్రతా ప్రమాణాల్లో ఏవైనా లోపాలున్నాయా అనే అంశాలపై దృష్టి సారించినట్లు సమాచారం.
