రాయలసీమ న్యూస్, అన్నమయ్య: అన్నమయ్య జిల్లా రాజంపేట మండలం గుండ్లూరులోని జిల్లా పరిషత్ ఉన్నత పాఠశాలలో హిందీ ఉపాధ్యాయురాలి ప్రవర్తనపై విద్యార్థుల తల్లిదండ్రులు ఆగ్రహం వ్యక్తం చేశారు. విద్యార్థులపై అనుచితంగా ప్రవర్తిస్తూ, దుర్వాక్యాలు ఉపయోగిస్తున్నారనే ఆరోపణలతో సోమవారం ఉదయం పాఠశాల వద్ద ఉద్రిక్తత నెలకొంది.
హిందీ టీచర్ ప్రశాంతి విద్యార్థులతో అసభ్యంగా మాట్లాడుతున్నారని, తరగతి గదిలో అవమానకరంగా ప్రవర్తిస్తున్నారని తల్లిదండ్రులు ఆరోపించారు. పలుమార్లు హెచ్చరించినా మార్పు రాలేదని, దీంతో తమ పిల్లల చదువు, మానసిక స్థితిపై ప్రతికూల ప్రభావం పడుతోందని వారు పేర్కొన్నారు.
ఈ నేపథ్యంలో పెద్ద సంఖ్యలో తల్లిదండ్రులు పాఠశాల వద్దకు చేరుకుని నిరసన తెలిపారు. “ఈ టీచర్ మాకొద్దు” అంటూ నినాదాలు చేస్తూ పాఠశాల గేటుకు తాళం వేశారు. దీంతో కొంతసేపు పాఠశాల కార్యకలాపాలు అంతరాయం కలిగాయి. విద్యార్థులు, ఉపాధ్యాయులు గేటు బయటే నిలిచిపోయారు.
“ఈ టీచర్ మాకొద్దు”
పాఠశాలలో పిల్లలు భయాందోళనలకు గురవుతున్నారని, ఉపాధ్యాయురాలిని వెంటనే ఇక్కడి నుంచి మార్చాలని తల్లిదండ్రులు డిమాండ్ చేశారు. ఘటనపై సంబంధిత అధికారులు తక్షణం స్పందించి విచారణ జరిపి చర్యలు తీసుకోవాలని వారు కోరారు.
పాఠశాల వద్ద ఉద్రిక్త పరిస్థితులు నెలకొనడంతో స్థానిక విద్యా శాఖ సిబ్బంది, గ్రామ పెద్దలు జోక్యం చేసుకున్నట్లు సమాచారం. తల్లిదండ్రులతో మాట్లాడి పరిస్థితిని శాంతింపజేయడానికి ప్రయత్నాలు చేసినట్టు స్థానిక వర్గాలు చెబుతున్నాయి. అయితే అధికారుల నుంచి అధికారిక స్పందన వెలువడాల్సి ఉంది.
హిందీ టీచర్ ప్రశాంతిపై వచ్చిన ఆరోపణలపై ఉన్నతాధికారులు నివేదిక కోరినట్లు తెలిసింది. తల్లిదండ్రుల ఫిర్యాదుల మేరకు విచారణ జరిపి తగిన చర్యలు తీసుకుంటామని విద్యా శాఖ వర్గాలు సూచించినట్టు సమాచారం. ఈ ఘటనతో గుండ్లూరు జడ్పీ హైస్కూల్ మరోసారి చర్చనీయాంశంగా మారింది.
