రాయలసీమ న్యూస్, అన్నమయ్య: అన్నమయ్య జిల్లా రాయచోటి డీఎస్పీ కార్యాలయంలో శనివారం జరిగిన మీడియా సమావేశంలో డీఎస్పీ ఎం.ఆర్. కృష్ణమోహన్ గాలివీడు హత్య కేసు వివరాలను వెల్లడించారు. వివాహేతర సంబంధం నేపథ్యంలో భర్త బాలకృష్ణను దారుణంగా హత్య చేసిన భార్య చిన్నక్క, ఆమెకు సహకరించిన సన్నిహితుడు కడప రఫీ, నవీన్లను పోలీసులు అరెస్ట్ చేసినట్లు తెలిపారు.
డీఎస్పీ పర్యవేక్షణలో ఈ కేసు దర్యాప్తు కొనసాగింది. ప్రారంభ దశలో ఎటువంటి ప్రాథమిక ఆధారాలు లేని ఈ కేసును పోలీసులు సాంకేతిక ఆధారాల సహాయంతో ముందుకు తీసుకెళ్లినట్లు అధికారులు వివరించారు. సంఘటన జరిగిన ప్రాంతం, అనుమానితుల సంచారం ఉన్న ప్రదేశాల్లోని 100కు పైగా సీసీటీవీ కెమెరాల ఫుటేజ్లను సేకరించి, విశ్లేషించినట్లు తెలిపారు.
సీసీటీవీ దృశ్యాలు, కాల్ డేటా, ఇతర సాంకేతిక ఆధారాలను జాగ్రత్తగా పరిశీలించడం ద్వారా నిందితుల కదలికలను గుర్తించగలిగినట్లు పోలీసులు పేర్కొన్నారు. ఈ ఆధారాల ఆధారంగా చిన్నక్క, కడప రఫీ, నవీన్ల పాత్ర స్పష్టంగా బయటపడడంతో వారిని అదుపులోకి తీసుకుని విచారణ జరిపినట్లు తెలిపారు.
జిల్లా ఎస్పీ ధీరజ్ కునుబిల్లి ఐపీఎస్ ఆదేశాలతో ఈ కేసు దర్యాప్తు వేగవంతంగా సాగిందని పోలీసు వర్గాలు వెల్లడించాయి. కేసు ఛేదనలో కీలకపాత్ర పోషించిన సీఐ హెచ్. కృష్ణంరాజు నాయక్, ఎస్ఐ జె. నరసింహరెడ్డి, సిసిఎస్ ఏఎస్ఐ సర్దార్, కానిస్టేబుళ్లు మహేంద్ర నాయుడు, బర్కత్లను ఎస్పీ ప్రత్యేకంగా అభినందించారు.
ఎల్ఆర్ పల్లి సర్కిల్ పోలీసు సిబ్బంది సమన్వయంతో ఈ కేసు ఛేదన సాధ్యమైందని అధికారులు పేర్కొన్నారు. నిందితులను కోర్టుకు హాజరుపరచి, రిమాండ్కు తరలించినట్లు సమాచారం. కేసు సంబంధిత మరిన్ని వివరాల కోసం దర్యాప్తు కొనసాగుతున్నట్లు పోలీసులు తెలిపారు.
