రాయలసీమ న్యూస్, అన్నమయ్య: అన్నమయ్య జిల్లా రాయచోటి నియోజకవర్గంలో వైసీపీకి భారీ ఎదురుదెబ్బ తగిలింది. లక్కిరెడ్డిపల్లె మండలంలో వైసీపీ శ్రేణుల్లో గణనీయమైన మార్పులు చోటుచేసుకున్నాయి. మండల జడ్పీటీసీ రమాదేవి, మాజీ ఎంపీపీ అంబాబత్తిన రెడ్డయ్య ఆధ్వర్యంలో సుమారు 150 మంది వైసీపీ నేతలు, కార్యకర్తలు పార్టీకి రాజీనామా చేసి టీడీపీలో చేరారు.
రాష్ట్ర రవాణా శాఖ మంత్రి మండిపల్లి రాంప్రసాద్ రెడ్డి సమక్షంలో ఈ చేరిక కార్యక్రమం జరిగింది. టీడీపీలోకి వచ్చిన నేతలు, కార్యకర్తలకు మంత్రి రాంప్రసాద్ రెడ్డి టిడిపి కండువాలు కప్పి పార్టీలోకి ఆహ్వానించారు. ఈ చేరికతో రాయచోటి నియోజకవర్గంలో టీడీపీ శక్తి మరింతగా పెరిగినట్లు పార్టీ వర్గాలు భావిస్తున్నాయి.
రాయచోటి నియోజకవర్గాన్ని టీడీపీ బలమైన గడపగా మలచాలని పార్టీ నేతలు సంకల్పం వ్యక్తం చేస్తున్నారు. రానున్న స్థానిక సంస్థల ఎన్నికల్లో ఇతర పార్టీ జెండాలు ఎగరనీయకుండా, ఒక్క టిడిపి జెండానే ఎగరేలా కార్యకర్తలు కృషి చేయాలని మంత్రి రాంప్రసాద్ రెడ్డి పిలుపునిచ్చినట్లు పార్టీ వర్గాలు తెలిపాయి.
పాత, కొత్త అనే తేడా లేకుండా ప్రతి ఒక్క కార్యకర్త టీడీపీ బలోపేతం కోసం పని చేయాలని ఆయన సూచించినట్లు సమాచారం. గ్రామ, మండల స్థాయిలో పార్టీ బలపడేలా కొత్తగా చేరిన నేతలు, కార్యకర్తలకు బాధ్యతలు కేటాయించే దిశగా టీడీపీ స్థానిక నాయకత్వం వ్యూహాలు రచిస్తోంది.
రాబోయే స్థానిక సంస్థల ఎన్నికల్లో అన్నమయ్య జిల్లాలోని అన్ని స్థానాలను టీడీపీ గెలుచుకోవాలని, ఆ విజయాన్ని సీఎం చంద్రబాబు నాయుడు చేతిలో పెట్టాలని మంత్రి రాంప్రసాద్ రెడ్డి టీడీపీ కార్యకర్తలకు పిలుపునిచ్చినట్లు పార్టీ వర్గాలు పేర్కొన్నాయి. ఈ చేరికతో లక్కిరెడ్డిపల్లె మండలంలో వైసీపీకి గట్టి దెబ్బ తగిలినట్టుగా రాజకీయ వర్గాలు విశ్లేషిస్తున్నాయి.
