రాయలసీమ న్యూస్, తిరుపతి: రేణిగుంట: చదువులో శ్రద్ధ చూపడం లేదని తల్లిదండ్రులు మందలించడంతో మనస్తాపానికి గురైన 10 ఏళ్ల బాలుడు ఇంట్లో ఎవరికీ చెప్పకుండా బయటకు వెళ్లిపోయిన ఘటన రేణిగుంటలో చోటుచేసుకుంది. అయితే ఒంటరిగా తిరుగుతున్న బాలుడిని ఓ ఆటోడ్రైవర్ గుర్తించి వెంటనే పోలీసులకు అప్పగించడంతో బాలుడు క్షేమంగా తిరిగి తల్లిదండ్రుల చెంతకు చేరాడు.
వివరాల్లోకి వెళ్తే, తిరుపతికి చెందిన ధనుష్ (10) జీవకోనలోని శ్రీ సదీశ పాఠశాలలో 5వ తరగతి చదువుతున్నాడు. చదువులో సరిగా రాణించడం లేదని, శ్రద్ధ చూపడం లేదని తల్లిదండ్రులు మందలించడంతో అతడు మనస్తాపానికి గురయ్యాడు. ఈ నేపథ్యంలో శనివారం ఉదయం ఇంట్లో ఎవరికీ చెప్పకుండా బయటకు వెళ్లిపోయాడు.
ఈ క్రమంలో మంగళం రోడ్డులో ధనుష్ ఒంటరిగా తిరుగుతూ కనిపించాడు. అక్కడుగా వెళ్తున్న తారకరామ నగర్కు చెందిన ఆటోడ్రైవర్ రామచంద్ర అతడిని గమనించాడు. బాలుడు ఒంటరిగా, ఆందోళనతో కనిపించడంతో అతని పరిస్థితిని అర్థం చేసుకునేందుకు రామచంద్ర ముందుకు వచ్చాడు.
బాలుడి పరిస్థితి పట్ల అప్రమత్తంగా వ్యవహరించిన రామచంద్ర, ఆలస్యం చేయకుండా ధనుష్ను రేణిగుంట పోలీస్ స్టేషన్కు తీసుకెళ్లి అప్పగించాడు. బాలుడితో మాట్లాడి వివరాలు సేకరించిన రేణిగుంట పోలీసులు అతని తల్లిదండ్రులు ఎనుగుల శ్రీనివాసులు, రెడ్డెమ్మలకు సమాచారం అందించారు. అలాగే బాలుడు చదువుతున్న శ్రీ సదీశ పాఠశాల యాజమాన్యానికి కూడా విషయం తెలియజేశారు.
తరువాత అవసరమైన ప్రక్రియలు పూర్తి చేసిన పోలీసులు ధనుష్ను సురక్షితంగా అతని తల్లిదండ్రుల చెంతకు అప్పగించారు. తమ కుమారుడు క్షేమంగా తిరిగి రావడంతో ఎనుగుల శ్రీనివాసులు, రెడ్డెమ్మలు ఉపశమనం వ్యక్తం చేశారు. బాలుడిని గుర్తించి పోలీసులకు అప్పగించిన ఆటోడ్రైవర్ రామచంద్రకు, బాలుడిని సురక్షితంగా తమకు అప్పగించిన రేణిగుంట పోలీసులకు వారు కృతజ్ఞతలు తెలిపారు.
బాలుడి విషయంలో అప్రమత్తంగా వ్యవహరించి వెంటనే పోలీసులకు సమాచారం అందించిన ఆటోడ్రైవర్ రామచంద్రను స్థానికులు అభినందించారు. చిన్నపిల్లల విషయంలో ఇటువంటి అప్రమత్తత అవసరమని, సమాజంలో ప్రతి ఒక్కరూ బాధ్యతతో వ్యవహరించాలని వారు అభిప్రాయపడ్డారు.
