రాయలసీమ న్యూస్, తిరుపతి: తిరుపతి: సముద్రంలో గల్లంతైన డాక్టర్ బీఆర్ అంబేద్కర్ కోనసీమ జిల్లా మత్స్యకారుల ఆచూకీ కోసం కేంద్ర ప్రభుత్వంపై ఒత్తిడి తీసుకురావడంలో వైఎస్సార్ కాంగ్రెస్ పార్టీ అధ్యక్షులు, మాజీ ముఖ్యమంత్రి వైఎస్ జగన్మోహన్ రెడ్డి కీలక పాత్ర పోషించారని తిరుపతి ఎంపీ డాక్టర్ మద్దిల గురుమూర్తి తెలిపారు. గల్లంతైన ఏడుగురు మత్స్యకారులను సురక్షితంగా ఒడ్డుకు చేర్చేందుకు కేంద్ర హోంశాఖ, రక్షణ శాఖ, విదేశాంగ శాఖతో పాటు శ్రీలంక, బంగ్లాదేశ్, మయన్మార్లలోని భారత రాయబార కార్యాలయాలతో సమన్వయం చేస్తూ గాలింపు చర్యలను ముమ్మరం చేయించామని వివరించారు.
గురువారం తిరుపతిలోని తన కార్యాలయంలో నిర్వహించిన విలేకరుల సమావేశంలో ఎంపీ గురుమూర్తి మాట్లాడారు. ఆగస్టు 3న డాక్టర్ బీఆర్ అంబేద్కర్ కోనసీమ జిల్లా ఓడలరేవు నుంచి బయలుదేరిన బోటు సముద్రంలో సాంకేతిక లోపానికి గురై, గాలులు, అలలతో బంగ్లాదేశ్ సరిహద్దు వైపు కొట్టుకుపోయిందని తెలిపారు. బోటులో ఉన్న ఏడుగురు మత్స్యకారులు దాదాపు 24 రోజుల పాటు సముద్రంలో తీవ్ర ఇబ్బందులు ఎదుర్కొన్నారని చెప్పారు.
ఈ ఘటన వివరాలను East Coast Speed Boats Association అధ్యక్షుడు వాసుపల్లి జానకిరామ్ వైఎస్ జగన్మోహన్ రెడ్డి దృష్టికి తీసుకెళ్లారని ఎంపీ తెలిపారు. దీనిపై స్పందించిన వైఎస్ జగన్మోహన్ రెడ్డి సూచనల మేరకు సంబంధిత కేంద్ర మంత్రులు, ఉన్నతాధికారులతో సంప్రదింపులు జరిపి గాలింపు చర్యలు ఆగకుండా కొనసాగించేలా చర్యలు తీసుకున్నామని గురుమూర్తి వివరించారు.
కోస్ట్గార్డ్ అధికారులు విస్తృతంగా గాలింపు చర్యలు చేపట్టగా, చివరకు West Bengalకు చెందిన మత్స్యకారుల బోటు సిబ్బంది గల్లంతైన ఏడుగురు మత్స్యకారులను గుర్తించి, తమ బోటుకు తాడు కట్టి West Bengalలోని Digha తీర ప్రాంతానికి సురక్షితంగా తీసుకువచ్చారని చెప్పారు. మత్స్యకారులను రక్షించడంలో సహకరించిన కోస్ట్గార్డ్ అధికారులు, కేంద్ర ప్రభుత్వంలోని సంబంధిత శాఖలు, శ్రీలంక, బంగ్లాదేశ్, మయన్మార్లలోని భారత రాయబార కార్యాలయాలకు ప్రత్యేక కృతజ్ఞతలు తెలిపారు.
మత్స్యకారుల ప్రాణాలకు భద్రత కల్పించడం అత్యంత ప్రాధాన్యమైందని ఎంపీ గురుమూర్తి పేర్కొన్నారు. ప్రతి రెండు, మూడు నెలలకు ఒకసారి మత్స్యకారుల బోట్లు ప్రమాదాలకు గురవడం, మత్స్యకారులు గల్లంతవడం ఆందోళన కలిగించే విషయమని అన్నారు. దాదాపు 900 కిలోమీటర్ల తీరరేఖ ఉన్న ఆంధ్రప్రదేశ్లో వేలాది కుటుంబాలు సముద్ర వేటపై ఆధారపడి జీవిస్తున్నప్పటికీ, మత్స్యకారుల భద్రతపై రాష్ట్ర ప్రభుత్వం ప్రత్యేక శ్రద్ధ చూపడం లేదని ప్రశ్నించారు.
ప్రతి బోటుకు సేఫ్టీ ఆడిట్ నిర్వహించి, లైఫ్ జాకెట్లు, అవసరమైన భద్రతా పరికరాలు తప్పనిసరిగా అందించాలని ఆయన కోరారు. ప్రతి బోటుకు satellite phone ఇవ్వడంతో పాటు transponderలలో ఉన్న సాంకేతిక లోపాలను వెంటనే సరిచేయాలని డిమాండ్ చేశారు. GPS, navigation పరికరాలు 24 గంటలు పనిచేసేలా power backup ఏర్పాటు చేయాలని, అవసరమైన చోట solar panels అమర్చాలని సూచించారు. బోటు సముద్రంలో ఎక్కడ ఉందో ఎప్పటికప్పుడు గుర్తించే సాంకేతిక వ్యవస్థను బలోపేతం చేస్తే ప్రమాద సమయంలో మత్స్యకారులను వేగంగా గుర్తించి రక్షించవచ్చని తెలిపారు.
మత్స్యకారులకు సరైన శిక్షణ, ప్రభుత్వ ప్రోత్సాహం అందించాల్సిన అవసరాన్ని ఎంపీ గురుమూర్తి ఉటంకించారు. speed boats, deep sea fishing boats కొనుగోలు చేసుకునేందుకు రుణాలు, ఆర్థిక సహాయం అందించి మత్స్యకారులు స్వయం ఆధారంగా జీవించేలా ప్రభుత్వం చర్యలు తీసుకోవాలని సూచించారు. వైఎస్ జగన్మోహన్ రెడ్డి ముఖ్యమంత్రిగా ఉన్న సమయంలో మత్స్యకారుల సంక్షేమం కోసం fishing harbours నిర్మాణం, మత్స్యకార భరోసా వంటి కార్యక్రమాలు అమలు చేశారని, deep sea fishing boats అందించేందుకు కూడా చర్యలు ప్రారంభించారని గుర్తుచేశారు.
తుఫాను సమయంలోనే కాకుండా సాధారణ రోజుల్లో కూడా మత్స్యకారుల బోట్లు ప్రమాదాలకు గురవుతున్నందున భద్రతా వ్యవస్థల్లో ఉన్న లోపాలను రాష్ట్ర ప్రభుత్వం గుర్తించి పరిష్కరించాల్సిన అవసరం ఉందని ఎంపీ అభిప్రాయపడ్డారు. మత్స్యకారుల సమస్యలను రాజకీయ కోణంలో కాకుండా, వారి ప్రాణాలు, భద్రత, సంక్షేమం దృష్ట్యా చూడాలని రాష్ట్ర ప్రభుత్వాన్ని కోరారు.
Fisheries శాఖ, Disaster Management శాఖ, Home శాఖలు సమన్వయంతో మత్స్యకారుల భద్రత కోసం ప్రత్యేక కార్యాచరణ ప్రణాళిక రూపొందించాలని డిమాండ్ చేశారు. ప్రతి బోటుకు సేఫ్టీ ఆడిట్, satellite phone, పనిచేసే transponder, GPS, navigation పరికరాలు, power backup వంటి సౌకర్యాలు కల్పించి, మత్స్యకారుల ప్రాణాలకు పూర్తి భద్రత కల్పించేలా రాష్ట్ర ప్రభుత్వం తక్షణ చర్యలు తీసుకోవాలని ఎంపీ గురుమూర్తి కోరారు.
