రాయలసీమ న్యూస్, ఎంటర్‌టైన్‌మెంట్ డెస్క్: ఇంటర్నెట్‌ డెస్క్‌: ఈ ఏడాది ప్రపంచవ్యాప్తంగా బాక్సాఫీస్‌ వద్ద వసూళ్ల సునామీ సృష్టించిన హాలీవుడ్‌ చిత్రం ‘ప్రాజెక్ట్ హెయిల్ మేరీ’ (Project Hail Mary) ఇప్పుడు ఓటీటీ ప్రేక్షకులను అలరించేందుకు సిద్ధమైంది. ఫిల్ లార్డ్, క్రిస్టోఫర్ మిల్లర్ దర్శకత్వంలో రూపొందిన ఈ చిత్రంలో హాలీవుడ్‌ నటుడు ర్యాన్ గాస్లింగ్ ప్రధాన పాత్ర పోషించారు.

థియేటర్లలో ఘన విజయం సాధించిన ఈ ఎపిక్ సైన్స్ ఫిక్షన్ కామెడీ చిత్రం ఇప్పుడు అమెజాన్ ప్రైమ్ వీడియో (Amazon Prime Video) వేదికగా స్ట్రీమింగ్‌కు రానుంది. జులై 3 నుంచి ఈ చిత్రం ఓటీటీలో అందుబాటులోకి రానున్నట్లు సంస్థ ప్రకటించింది. ఈ సందర్భంగా అమెజాన్ ప్రైమ్ వీడియో ప్రత్యేక వీడియోను విడుదల చేస్తూ స్ట్రీమింగ్‌ తేదీని అధికారికంగా వెల్లడించింది.

మార్చిలో విడుదలైన ‘ప్రాజెక్ట్ హెయిల్ మేరీ’ ప్రపంచవ్యాప్తంగా ప్రేక్షకుల ఆదరణను సొంతం చేసుకుంది. సైన్స్‌ ఫిక్షన్‌, కామెడీ అంశాలను సమతౌల్యంగా మేళవించిన ఈ చిత్రం బాక్సాఫీస్‌ వద్ద ఏకంగా రూ.6,000 కోట్లకు పైగా వసూళ్లు సాధించింది. హాలీవుడ్‌తో పాటు ఇతర దేశాల్లోనూ ఈ మూవీ రికార్డు స్థాయి కలెక్షన్లు రాబట్టింది.

ఇండియన్‌ బాక్సాఫీస్‌లోనూ ఈ చిత్రం ప్రభావం చూపింది. గతంలో విడుదలైన ‘ఇంటర్‌స్టెల్లార్’, ‘డ్యూన్ 2’ వంటి ప్రముఖ సైన్స్‌ ఫిక్షన్‌ చిత్రాల కంటే ‘ప్రాజెక్ట్ హెయిల్ మేరీ’ ఎక్కువ వసూళ్లు సాధించడం విశేషం. 2025లో వచ్చిన ‘అవతార్: ఫైర్ అండ్ యాష్’ తర్వాత ఇండియన్‌ ప్రేక్షకులను ఈ స్థాయిలో ఆకట్టుకున్న అంతర్జాతీయ చిత్రం ఇదే కావడం సినీ వర్గాల్లో చర్చనీయాంశంగా మారింది.

గతాన్ని పూర్తిగా మర్చిపోయిన ఒక వ్యోమగామి అంతరిక్షంలో ఒంటరిగా మానవాళిని రక్షించేందుకు చేసే సాహసయాత్ర ఈ చిత్రానికి ప్రధాన కథాంశం. అంతరిక్ష నేపథ్యంలో సాగే థ్రిల్లింగ్‌ ఎపిసోడ్‌లు, భావోద్వేగాలు, హాస్యాన్ని సమ్మిళితంగా చూపిస్తూ దర్శకులు ఫిల్ లార్డ్, క్రిస్టోఫర్ మిల్లర్ ఈ సినిమాను తెరకెక్కించారు. ర్యాన్ గాస్లింగ్ నటన, విజువల్‌ ఎఫెక్ట్స్‌, బ్యాక్‌గ్రౌండ్‌ స్కోర్‌ ఈ చిత్రానికి ప్రధాన బలాలుగా నిలిచాయి.

థియేటర్లలో ఇప్పటికే చూసిన ప్రేక్షకులతో పాటు, ఓటీటీ ద్వారా మొదటిసారి ఈ చిత్రాన్ని చూడబోతున్న సినీ అభిమానులు కూడా ‘ప్రాజెక్ట్ హెయిల్ మేరీ’ స్ట్రీమింగ్‌ కోసం ఆసక్తిగా ఎదురుచూస్తున్నారు. జులై 3 నుంచి అమెజాన్ ప్రైమ్ వీడియోలో ఈ చిత్రం అందుబాటులోకి రావడంతో, సైన్స్‌ ఫిక్షన్‌ ప్రేమికులకు మరోసారి వినోదంతో పాటు ఉత్కంఠభరితమైన అనుభవాన్ని అందించనుందని సినీ విశ్లేషకులు భావిస్తున్నారు.