రాయలసీమ న్యూస్, ఇంటర్నేషనల్ డెస్క్: గాల్లో ఎగురుతున్న విమానంలో కిటికీ అద్దం ఊడిపోవడంతో ఓ ప్రయాణికుడు తృటిలో ప్రాణాలతో బయటపడిన ఘటన చోటుచేసుకుంది. గ్రీస్లోని థెస్సలొనికి నుంచి జర్మనీలోని మేంమింగేం కు వెళ్తున్న ర్యనైర్ విమానంలో ఈ ఘటన జరిగింది. విమానం గాల్లో ఉండగానే ఒక్కసారిగా భారీ శబ్దం వినిపించడంతో ప్రయాణికులందరూ భయంతో ఉలిక్కిపడ్డారు.
విమానంలో ప్రయాణిస్తున్న సమయంలో అకస్మాత్తుగా కిటికీ అద్దం విడిపోవడంతో, ఆ కిటికీ పక్కన కూర్చున్న ప్రయాణికుడు దాదాపు బయటకు లాగబడినంత పనైంది. అయితే అతడు సీట్ బెల్ట్ వేసుకుని ఉండటం, వెంటనే పక్కనే ఉన్న తోటి ప్రయాణికులు అతన్ని లోపలికి లాగడం వల్ల పెద్ద ప్రమాదం తప్పిందని సమాచారం. లేకపోతే గాల్లోనే బయటకు ఎగిరిపోయే ప్రమాదం ఉందని సహ ప్రయాణికులు పేర్కొన్నారు.
ఈ ఘటనలో గాయపడిన వ్యక్తి సెర్బియాకు చెందిన పర్యాటకుడిగా గుర్తించారు. అతనికి స్వల్ప గాయాలు కావడంతో సమీప ఆసుపత్రికి తరలించారు. విమానంలో ఉన్న ఇతర ప్రయాణికులు ఈ సంఘటనతో తీవ్ర భయాందోళనలకు గురయ్యారు.
ప్రయాణికుల వివరాల ప్రకారం, ఘటన జరిగిన సమయంలో చాలా మంది నిద్రలోనే ఉన్నారు. ఒక్కసారిగా పెద్ద శబ్దం రావడంతో అందరూ మెలకువకు వచ్చారు. వెంటనే విమానంలో ఆక్సిజన్ మాస్కులు కిందకు పడిపోయాయి. విమానంలో గాలి ఒత్తిడి తగ్గిపోవడంతో పరిస్థితి ఉద్రిక్తంగా మారింది.
కిటికీ బయటకు ఆ ప్రయాణికుడి తల, భుజాలు కనిపించడంతో క్యాబిన్లో ఒక్కసారిగా కలకలం రేగిందని ప్రయాణికులు తెలిపారు. సమయానికి పక్కనే ఉన్న వారు అతన్ని బలంగా లోపలికి లాగడంతో అతని ప్రాణాలు రక్షించబడ్డాయని వారు చెప్పారు.
విమాన ఇంజిన్ నుంచి విడిపోయిన ఒక చిన్న భాగం కిటికీని తాకడంతో ఈ ప్రమాదం జరిగినట్లు ప్రాథమిక సమాచారం వెల్లడించింది. ఆ ఢీకొట్టిన ప్రభావంతో కిటికీ అద్దం ఊడిపోవడంతో ఈ ప్రమాదకర పరిస్థితి ఏర్పడినట్లు తెలుస్తోంది.
ఘటన జరిగిన వెంటనే పైలట్ అప్రమత్తంగా వ్యవహరించారు. విమానాన్ని తిరిగి థెస్సలొనికి విమానాశ్రయానికి మళ్లించి, అక్కడ సురక్షితంగా ల్యాండ్ చేశారు. విమానం భూమిని తాకగానే ప్రయాణికులంతా ఊపిరిపీల్చుకున్నారు. ఎవరూ ప్రాణాలు కోల్పోకపోవడం పెద్ద అదృష్టంగా భావిస్తున్నారు.
ఈ ఘటనపై సంబంధిత విమానయాన సంస్థ, విమాన భద్రతా సంస్థలు దర్యాప్తు ప్రారంభించాయి. కిటికీ అద్దం ఊడిపోవడానికి గల కారణాలు, ఇంజిన్ భాగం ఎలా విడిపోయిందనే అంశాలపై సాంకేతిక బృందాలు పరిశీలిస్తున్నాయి. గాల్లో ప్రయాణిస్తున్న సమయంలో ఇలాంటి ఘటనలు జరగడం పట్ల ప్రయాణికులు ఆందోళన వ్యక్తం చేస్తున్నారు.
