రాయలసీమ న్యూస్, నేషనల్ డెస్క్: న్యూఢిల్లీ: వరుసగా మూడు దఫాలు ప్రధానిగా ఎన్నికై దేశానికి సేవలందిస్తున్న నరేంద్ర మోదీ మరో విశేష రికార్డును నమోదు చేశారు. పదవి చేపట్టిన నాటి నుంచి ఇప్పటి వరకు ఆయన మొత్తం 100 విదేశీ పర్యటనలు పూర్తి చేశారు. తాజాగా వారం రోజుల యూరప్‌ పర్యటనతో ఈ మైలురాయిని చేరుకున్నారు. ప్రధానమంత్రిగా నరేంద్ర మోదీ తొలి అధికారిక విదేశీ పర్యటన భూటాన్‌కు జరిగినట్లు ప్రధానమంత్రి కార్యాలయం వెబ్‌సైట్‌ వివరాలు తెలియజేస్తున్నాయి. 2014 జూన్ 15 నుంచి 16 వరకు ఆయన భూటాన్‌లో పర్యటించారు. అప్పటి నుంచి ఇప్పటి వరకు మోదీ మొత్తం 78 దేశాలను సందర్శించారు.
2014లో మొదటిసారి ప్రధానిగా ఎన్నికైన తర్వాత తొలి దఫా పదవీకాలంలో మోదీ 49 విదేశీ పర్యటనలు చేశారు. రెండో దఫా ప్రధానిగా ఉన్న సమయంలో 27 పర్యటనలు నిర్వహించారు. మూడో దఫాలో ఇప్పటివరకు 24 విదేశీ పర్యటనలు చేసినట్లు అధికారిక గణాంకాలు సూచిస్తున్నాయి. ప్రస్తుతం మోదీ యూరప్‌ పర్యటనలో భాగంగా పలు దేశాలను సందర్శిస్తున్నారు. ఈ క్రమంలో స్లోవేకియా రాజధాని బ్రటిస్లావాలో సోమవారం జరిగిన ద్వైపాక్షిక సమావేశంలో ఆ దేశ ప్రధాని రాబర్డ్‌ ఫికోతో ఆయన భేటీ అయ్యారు. ఇరు దేశాల మధ్య సహకారాన్ని బలోపేతం చేసే అంశాలపై ఈ సమావేశంలో చర్చించినట్లు ప్రభుత్వ వర్గాలు తెలిపాయి.
యూరప్‌ పర్యటనలో భాగంగా మోదీ జీ-7 సదస్సులో కూడా పాల్గొంటున్నారు. ఈ నెల 18న జీ-7 సమావేశాలు ముగిసిన తర్వాత ఆయన భారత్‌కు తిరిగి రానున్నారు. దీంతో మూడో దఫా ప్రధానిగా ఆయన 24వ విదేశీ పర్యటన పూర్తవుతుంది. మూడు దఫాల్లో కలిపి 100 పర్యటనలు పూర్తి చేయడం ద్వారా మోదీ విదేశాంగ రంగంలో తన చురుకుదనాన్ని మరోసారి చాటినట్లుగా రాజకీయ విశ్లేషకులు అభిప్రాయపడుతున్నారు.
విదేశీ పర్యటనల ద్వారా భారత్‌ ద్వైపాక్షిక, బహుపాక్షిక సంబంధాలను విస్తరించడమే కాకుండా, పెట్టుబడులు, సాంకేతిక సహకారం, రక్షణ, ఇంధన భద్రత వంటి కీలక రంగాల్లో సహకారాన్ని పెంపొందించేందుకు మోదీ కృషి చేస్తున్నారని కేంద్ర ప్రభుత్వం తరచూ వివరిస్తోంది. ఈ నేపథ్యంలో 100వ విదేశీ పర్యటన మైలురాయి ప్రాధాన్యం సంతరించుకుంది.
