రాయలసీమ న్యూస్, తెలంగాణ డెస్క్:
గాంధీ భవన్ ముట్టడిలో ఉద్రిక్తత:
బీజేపీ రాష్ట్ర అధ్యక్షుడు రాంచందర్ రావు అరెస్ట్
తెలంగాణ:- హైదరాబాద్ నాంపల్లి ప్రాంతంలో బీజేపీ నిర్వహించిన గాంధీ భవన్ ముట్టడి కార్యక్రమం ఉద్రిక్తతకు దారితీసింది. తెలంగాణ బీజేపీ రాష్ట్ర కార్యాలయం వద్ద మంగళవారం మధ్యాహ్నం పరిస్థితులు ఒక్కసారిగా వేడెక్కాయి. ప్రభుత్వ వ్యతిరేక విధానాలను నిరసిస్తూ గాంధీ భవన్ వైపు ర్యాలీగా వెళ్లేందుకు బీజేపీ శ్రేణులు ప్రయత్నించగా, పోలీసులు అడ్డుకోవడంతో ఉద్రిక్తత నెలకొంది.
తెలంగాణ బీజేపీ రాష్ట్ర అధ్యక్షుడు ఎన్. రాంచందర్ రావు నేతృత్వంలో పార్టీ కార్యకర్తలు గాంధీ భవన్ ముట్టడికి బయలుదేరారు. నాంపల్లి బీజేపీ కార్యాలయం నుంచి గాంధీ భవన్ దిశగా ర్యాలీ కొనసాగుతున్న సమయంలో, శాంతిభద్రతల పరిరక్షణ పేరుతో పోలీసులు జోక్యం చేసుకున్నారు. ర్యాలీని నిలువరించేందుకు పోలీసులు ప్రయత్నించగా, ఇరుపక్షాల మధ్య నెట్టివేత, తోపులాట చోటుచేసుకుంది.
పరిస్థితులు మరింత ఉద్రిక్తంగా మారే అవకాశం కనిపించడంతో పోలీసులు బీజేపీ రాష్ట్ర అధ్యక్షుడు రాంచందర్ రావుతో పాటు పలువురు కీలక నాయకులను అదుపులోకి తీసుకున్నారు. అనంతరం వారిని సమీప పోలీస్ స్టేషన్‌కు తరలించారు. రాంచందర్ రావు అరెస్టు వార్త బయటకు రావడంతో బీజేపీ శ్రేణుల్లో ఆగ్రహజ్వాలలు ఎగసిపడ్డాయి.
పోలీసుల చర్యను ఖండిస్తూ బీజేపీ కార్యకర్తలు నాంపల్లి ప్రాంతంలో రోడ్డుపైనే బైఠాయించి నిరసన తెలిపారు. కాంగ్రెస్ ప్రభుత్వంపై, పోలీసుల వ్యవహారశైలిపై నినాదాలు చేస్తూ ప్రభుత్వ వ్యతిరేకంగా పెద్దఎత్తున ఆందోళన కొనసాగించారు. దీంతో నాంపల్లి పరిసర ప్రాంతాల్లో వాహనాల రాకపోకలు తీవ్రంగా అంతరాయం కలిగాయి.
రోడ్డు మీద బైఠాయించిన కార్యకర్తల కారణంగా అక్కడ భారీగా ట్రాఫిక్ జామ్ ఏర్పడింది. వాహనాలు కిలోమీటర్ల మేర నిలిచిపోయాయి. ఈ అకస్మాత్తు పరిణామంతో అప్రమత్తమైన పోలీసులు బీజేపీ కార్యాలయం పరిసరాల్లో అదనపు బలగాలను మోహరించారు. పరిస్థితిని అదుపులోకి తెచ్చేందుకు ట్రాఫిక్ పోలీసులు కూడా రంగంలోకి దిగారు.
గాంధీ భవన్ ముట్టడిని భగ్నం చేసేందుకు పోలీసులు తీసుకున్న చర్యలపై బీజేపీ వర్గాల్లో తీవ్ర అసంతృప్తి వ్యక్తమవుతోంది. మరోవైపు, నాంపల్లి ప్రాంతంలో సాధారణ ప్రజలు ట్రాఫిక్ అంతరాయం కారణంగా ఇబ్బందులు ఎదుర్కొన్నారు. రాంచందర్ రావు అరెస్టు, గాంధీ భవన్ ముట్టడి ప్రయత్నం నేపథ్యంలో నగర రాజకీయ వాతావరణం క్షణక్షణం మారుతోంది.
