రాయలసీమ న్యూస్, నేషనల్ డెస్క్:
సుప్రీం కోర్టులో మీనాక్షి నటరాజన్‌కు ఎదురుదెబ్బ
న్యూఢిల్లీ: కాంగ్రెస్‌ అగ్రనేత మీనాక్షి నటరాజన్‌కు సుప్రీం కోర్టులో ఎదురుదెబ్బ తగిలింది. రాజ్యసభ ఎన్నికల్లో తన నామినేషన్‌ను రిటర్నింగ్‌ అధికారి తిరస్కరించడంపై ఆమె సర్వోన్నత న్యాయస్థానంలో దాఖలు చేసిన పిటిషన్‌ను కోర్టు శుక్రవారం కొట్టివేసింది.
మీనాక్షి నటరాజన్‌ పిటిషన్‌పై సుప్రీం కోర్టులో వరుసగా రెండో రోజు విచారణ జరిగింది. ఆమె తరఫున సీనియర్‌ న్యాయవాది అభిషేక్‌ మను సింఘ్వీ వాదనలు వినిపించారు. ప్రైవేట్‌ ఫిర్యాదును కోర్టు పరిగణనలోకి తీసుకోలేదని, మీనాక్షి నటరాజన్‌పై నమోదైందని చెబుతున్న కేసులో ఇప్పటివరకు చార్జీలు నమోదు కాలేదని ఆయన వాదించారు. రిప్రజెంటేషన్ ఆఫ్ పీపుల్స్ యాక్ట్ ప్రకారం నామినేషన్ తిరస్కరణకు చార్జీలు ఫ్రేమ్ కావడం తప్పనిసరి అని సింఘ్వీ కోర్టు దృష్టికి తీసుకువచ్చారు. కోర్టు కేవలం ఆమెకు నోటీసులు మాత్రమే జారీ చేసిందని, అలాంటి పరిస్థితిలో నామినేషన్ తిరస్కరించడం చట్టవిరుద్ధమని ఆయన వాదించారు.
అయితే నామినేషన్ తిరస్కరణపై తాము నేరుగా జోక్యం చేసుకోలేమని ధర్మాసనం వ్యాఖ్యానించింది. ఇలాంటి విషయాల్లో గతంలో సుప్రీం కోర్టు జోక్యం చేసుకున్న తీర్పులు ఉంటే చూపించాలని సింఘ్వీని కోరింది. ఇలాంటి సందర్భాల్లో ఎన్నికల సంఘాన్ని ఆశ్రయించాలని సూచిస్తూ, మీనాక్షి నటరాజన్‌ దాఖలు చేసిన పిటిషన్‌ను డిస్మిస్‌ చేస్తున్నట్లు ధర్మాసనం స్పష్టం చేసింది.
మధ్యప్రదేశ్‌ తరఫున రాజ్యసభకు మీనాక్షి నటరాజన్‌ నామినేషన్ దాఖలు చేశారు. అయితే తెలంగాణలో పెండింగ్‌లో ఉన్న ఒక క్రిమినల్‌ కేసును వెల్లడించలేదన్న కారణంతో ఆమె నామినేషన్‌ను తిరస్కరించినట్లు రిటర్నింగ్‌ అధికారి ప్రకటించారు. దీనిపై ఆమె గురువారం అత్యవసరంగా సుప్రీం కోర్టును ఆశ్రయించి, తన నామినేషన్ రిజక్ట్‌ కావడంతో ఎన్నికల ఫలితాలపై స్టే విధించాలని, ఈ వ్యవహారంలో తక్షణ ఊరట ఇవ్వాలని కోరారు. అయితే కోర్టు ఆ అభ్యర్థనలను తిరస్కరించింది.
సుప్రీం కోర్టు జోక్యం చేసుకోకపోవడంతో మధ్యప్రదేశ్‌ నుంచి రాజ్యసభకు మూడు స్థానాలకుగానూ ముగ్గురు BJP అభ్యర్థులు ఏకగ్రీవంగా ఎన్నికైనట్లు ఎన్నికల సంఘం ప్రకటించింది.
మరోవైపు మీనాక్షి నటరాజన్‌ నామినేషన్ తిరస్కరణపై కాంగ్రెస్‌ ఆగ్రహం వ్యక్తం చేస్తోంది. ఇప్పటికే ఎన్నికల సంఘాన్ని కలిసి తమ అసంతృప్తిని తెలియజేసింది. ఈసీ తీరును తీవ్రంగా తప్పుబడుతూ పార్టీ నేతలు నిరసనలు ప్రారంభించారు. ఢిల్లీలో కాంగ్రెస్‌ ధర్నాకు సిద్ధమవుతోంది. మీనాక్షి నటరాజన్‌కు సంఘీభావంగా మధ్యప్రదేశ్‌ కాంగ్రెస్‌ ఎమ్మెల్యేలంతా రాష్ట్రపతి ద్రౌపది ముర్ము ముందు పరేడ్‌కు సిద్ధమవుతున్నట్లు పార్టీ వర్గాలు తెలిపాయి.
