రాయలసీమ న్యూస్, ఆహా డెస్క్: ప్రతిరోజూ ఒకే రకమైన వంటకాలు తింటూ విసుగెత్తిపోయే వారికి ఇంట్లోనే సులభంగా తయారుచేసుకునే కొన్ని వెరైటీ స్నాక్స్ మంచి ప్రత్యామ్నాయంగా నిలుస్తాయి. కొద్దిపాటి పదార్థాలతో, తక్కువ సమయంలో సిద్ధమయ్యే ఈ వంటకాలు కుటుంబ సభ్యులందరికీ నచ్చేలా ఉంటాయి. ముఖ్యంగా సాయంత్రం టీ టైమ్కి, వీకెండ్ స్పెషల్గా ఈ వంటకాలను ప్రయత్నించవచ్చు.
ఇలాంటి వెరైటీలు ట్రై చేయాలనుకునే వారి కోసం బాంబే ఐస్ హల్వా, మసాలా చీజ్ టోస్ట్, ఖట్టా మూంగ్ వంటి మూడు ప్రత్యేక వంటకాల తయారీ విధానాన్ని ఇక్కడ వివరంగా తెలియజేస్తున్నారు.
బాంబే ఐస్ హల్వా
కావలసినవి: పాలు ఒకటిన్నర కప్పు, పంచదార ఒక కప్పు, కార్న్ ఫ్లోర్ పావు కప్పు, నెయ్యి పావు కప్పు, ఆరెంజ్ ఫుడ్ కలర్ టీ స్పూన్, ఏలకుల పొడి కొద్దిగా, బాదం ముక్కలు టేబుల్ స్పూన్, పిస్తా ముక్కలు టేబుల్ స్పూన్.
తయారీ: పెద్ద కడాయిలో పాలు, పంచదార, కార్న్ ఫ్లోర్, నెయ్యి వేసి స్టవ్ ఆన్ చేసి మంటను సిమ్లో ఉంచాలి. ఉండలు కట్టకుండా గరిటెతో నిరంతరం కలుపుతూ ఉండాలి. మిశ్రమం చిక్కబడి పేస్ట్లా మారిన తర్వాత ఆరెంజ్ ఫుడ్ కలర్, కొద్దిగా నెయ్యి వేసి మీడియం మంటపై బాగా కలపాలి. తరువాత ఏలకుల పొడి వేసి మిశ్రమం జిగటగా, మెరుస్తూ మారేంత వరకు కలపాలి. అవసరమైతే మరికొద్దిగా నెయ్యి చేర్చాలి.
ఇప్పుడు బటర్ పేపర్ పై ఒక గరిటెడు మిశ్రమం వేసి, మరో నెయ్యి రాసిన బటర్ పేపర్ షీట్ను పై నుంచి ఉంచి చేతితో మెల్లగా నొక్కాలి. చపాతీ కర్రతో కావలసిన మందంలో పరచాలి. పై పేపర్ను జాగ్రత్తగా తీసేసి, బాదం, పిస్తా ముక్కలు చల్లి 15 నిమిషాల పాటు రిఫ్రిజిరేటర్లో ఉంచాలి. గట్టిపడిన తర్వాత బటర్ పేపర్తో సహా ముక్కలుగా కట్ చేసుకోవచ్చు.
మసాలా చీజ్ టోస్ట్
కావలసినవి: సన్నగా తరిగిన ఉల్లిపాయ, క్యాప్సికమ్, క్యారట్ కలిపి ఒక కప్పు, కారం అర టీస్పూన్, మిరియాల పొడి అర టీస్పూన్, ధనియాల పొడి అర టీస్పూన్, ఉప్పు రుచికి సరిపడా, బ్రెడ్ స్లైసెస్ రెండు, చీజ్ తగినంత.
తయారీ: గిన్నెలో తరిగిన ఉల్లిపాయ, క్యాప్సికమ్, క్యారట్ ముక్కలు తీసుకుని అందులో కారం, మిరియాల పొడి, ధనియాల పొడి, ఉప్పు వేసి బాగా కలపాలి. ఈ మిశ్రమాన్ని పాన్పై లైట్గా వేయించి కూరగాయలు కొద్దిగా మెత్తబడేలా చేసి పక్కన పెట్టాలి. బ్రెడ్ ముక్కను ఒక వైపు మాత్రమే స్వల్పంగా కాల్చి, అదే వైపున ఈ వెజిటబుల్ మసాలాను సమానంగా పరచాలి. పై నుంచి చీజ్ వేసి కింద వైపు బ్రెడ్ క్రిస్పీగా కాలేంత వరకు, చీజ్ పూర్తిగా కరిగేంత వరకు వేయించాలి.
ఖట్టా మూంగ్
కావలసినవి: నానబెట్టిన పచ్చ పెసలు రెండు కప్పులు, పుల్లటి పెరుగు ఒక కప్పు, శనగపిండి మూడు టేబుల్ స్పూన్లు, కారం రెండు టీస్పూన్లు, పసుపు రెండు టీస్పూన్లు, ధనియాల పొడి రెండు టీస్పూన్లు, జీలకర్ర టీస్పూన్, ఆవాలు టీస్పూన్, పచ్చిమిర్చి రెండు (సన్నగా తరిగినవి), కరివేపాకు 5–6 ఆకులు, అల్లం ముక్కలు 5–6, కొత్తిమీర అర కప్పు (సన్నగా తరిగినది), నూనె సరిపడినంత, నీళ్లు.
తయారీ: ముందుగా నానబెట్టిన పెసలను మూడు కప్పుల నీటితో ప్రెషర్ కుక్కర్లో మూడు విజిల్స్ వచ్చే వరకు ఉడికించాలి. మరో గిన్నెలో శనగపిండి, పుల్లటి పెరుగు, కారం, పసుపు, ఒక కప్పు నీరు వేసి గడ్డలు లేకుండా కలిపి పక్కన పెట్టాలి. కడాయిలో నూనె వేడి చేసి జీలకర్ర, ఆవాలు, పచ్చిమిర్చి, కరివేపాకు వేసి మీడియం మంటపై కొన్ని సెకన్లు వేయించాలి. తరువాత ఉడికిన పెసలను వేసి తాలింపు బాగా పట్టేలా కలిపి రెండు నిమిషాలు మరిగించాలి.
ఇప్పుడు శనగపిండి–పెరుగు మిశ్రమం, ధనియాల పొడి చేర్చి బాగా కలిపి మంటను సిమ్లో పెట్టి 3–4 నిమిషాలు ఉడకనివ్వాలి. చివరగా స్టవ్ ఆఫ్ చేసి, పై నుంచి కొత్తిమీర, అల్లం ముక్కలతో గార్నిష్ చేయాలి. చపాతీ, పూరీ, అన్నంతో ఈ గుజరాతీ స్పెషల్ ఖట్టా మూంగ్ రుచిగా ఆస్వాదించవచ్చు.
