రాయలసీమ న్యూస్, స్పోర్ట్స్ డెస్క్: ఇంగ్లండ్ టెస్టు క్రికెట్ జట్టుకు కొత్త హెడ్కోచ్ ఎంపిక ప్రక్రియలో భారత మాజీ కెప్టెన్, టీమిండియా మాజీ హెడ్కోచ్ రాహుల్ ద్రవిడ్ పేరు కూడా పరిశీలనలో ఉన్నట్లు సమాచారం. న్యూజిలాండ్తో టెస్టు సిరీస్లో ఓటమి అనంతరం ప్రస్తుత ప్రధాన కోచ్ బ్రెండన్ మెక్కల్లమ్ ఆ ఫార్మాట్ నుంచి తప్పుకోవాలని నిర్ణయించుకోవడంతో, ఇంగ్లండ్ టెస్టు జట్టుకు కొత్త కోచ్ ఎవరన్న దానిపై చర్చ మొదలైంది.
డైలీ మెయిల్ ప్రచురించిన కథనం ప్రకారం, ఇంగ్లండ్ టెస్టు కోచ్ పదవికి దరఖాస్తు చేసిన వారి జాబితాలో జింబాబ్వే దిగ్గజం ఆండీ ప్లవర్, మాజీ ఇంగ్లండ్ స్పిన్నర్ రిచర్డ్ డాసన్లతో పాటు రాహుల్ ద్రవిడ్ పేరు కూడా ఉన్నట్లు తెలుస్తోంది. అయితే వైట్ బాల్ క్రికెట్లో మాత్రం బ్రెండన్ మెక్కల్లమ్ యథావిధిగా కోచ్ బాధ్యతలు కొనసాగించనున్నాడు.
రాహుల్ ద్రవిడ్ టీమిండియాకు అన్ని ఫార్మాట్లలో హెడ్కోచ్గా పనిచేసిన అనుభవం కలిగి ఉన్నాడు. అతని కోచింగ్ హయాంలో టీమిండియా 2024 టీ20 ప్రపంచకప్ను కైవసం చేసుకోగా, 2023 ఐసీసీ టెస్టు చాంపియన్షిప్లో రన్నరప్గా నిలిచింది. ఈ విజయాల నేపథ్యంలోనే ద్రవిడ్ పేరు ఇంగ్లండ్ టెస్టు కోచ్ రేసులో వినిపించడం క్రికెట్ వర్గాల్లో ఆసక్తి రేపుతోంది. అయితే అతడు ఈ బాధ్యతలు స్వీకరించడానికి ముందుకు వస్తాడా లేదా అన్నది ఇంకా స్పష్టత రావాల్సి ఉంది.
టెస్టు కోచ్ పదవికి ప్రధాన పోటీలో ఉన్న మరో పేరు ఆండీ ప్లవర్. గతంలో ఇంగ్లండ్ జట్టుకు కోచ్గా పనిచేసిన ఆయన, విజయవంతమైన కోచ్గా మంచి పేరు తెచ్చుకున్నాడు. అతని హయాంలో ఇంగ్లండ్ మూడు యాషెస్ సిరీస్లను గెలుచుకోవడంతో పాటు టెస్టుల్లో నంబర్వన్ ర్యాంకును అందుకుంది. ఇండియన్ ప్రీమియర్ లీగ్లో ఆర్సీబీ వరుసగా రెండో టైటిల్ సాధించడంలో కూడా ఆండీ ప్లవర్ పాత్ర కీలకంగా నిలిచింది.
ప్రస్తుతం గ్లామోర్గాన్ కోచ్గా ఉన్న రిచర్డ్ డాసన్ కౌంటీ, అంతర్జాతీయ స్థాయిల్లో తన వ్యూహాలతో జట్టును నడిపించడంలో నైపుణ్యం చూపుతున్న కోచ్గా గుర్తింపు పొందాడు. వీరితో పాటు శ్రీలంక దిగ్గజం కుమార సంగక్కర, మాజీ ఆల్రౌండర్ ఆండ్రూ ఫ్లింటాఫ్, పాక్ హెడ్కోచ్ మైక్ హసన్, ఆస్ట్రేలియా మాజీ కోచ్ జస్టిన్ లాంగర్ పేర్లు కూడా ఈ పదవికి పరిశీలనలో ఉన్నట్లు సమాచారం.
2022లో టెస్టు హెడ్కోచ్గా బాధ్యతలు చేపట్టిన బ్రెండన్ మెక్కల్లమ్, అప్పటి కెప్టెన్ బెన్ స్టోక్స్తో కలిసి ఇంగ్లండ్ టెస్టు క్రికెట్కు దూకుడైన ఆటతీరుకు శ్రీకారం చుట్టాడు. అయితే ఈ ఏడాది ఆస్ట్రేలియాలో జరిగిన యాషెస్ సిరీస్లో ఇంగ్లండ్ 1–4 తేడాతో ఓటమి పాలవడం, అనంతరం బెన్ స్టోక్స్ అంతర్జాతీయ క్రికెట్కు వీడ్కోలు పలకడం వంటి పరిణామాల నేపథ్యంలో ఈసీబీ ఒత్తిడి కారణంగా మెక్కల్లమ్ టెస్టు కోచ్ పదవి నుంచి తప్పుకున్నట్లు తెలుస్తోంది.
వచ్చే ఏడాది యాషెస్ను దృష్టిలో పెట్టుకుని టెస్టు జట్టుకు కొత్త కోచ్ను నియమించాలని ఇంగ్లండ్ అండ్ వేల్స్ క్రికెట్ బోర్డు భావిస్తోంది. మెక్కల్లమ్ మార్గదర్శకత్వంలో హ్యారీ బ్రూక్ నాయకత్వంలోని ఇంగ్లండ్ ఇటీవల టీ20 ప్రపంచకప్ సెమీఫైనల్కు చేరడమే కాకుండా, భారత్పై 4–0 తేడాతో టీ20 సిరీస్ను గెలుచుకుని ఐసీసీ టీ20 ర్యాంకింగ్స్లో అగ్రస్థానానికి చేరుకుంది. ఈ నేపథ్యంలో టెస్టు ఫార్మాట్కు ప్రత్యేకంగా కొత్త కోచ్ ఎంపికపై ఈసీబీ దృష్టి సారించింది.
