రాయలసీమ న్యూస్, తిరుపతి:
టీటీడీ ఉద్యోగాల పేరిట భారీ మోసం..
నకిలీ అపాయింట్మెంట్ లెటర్లతో రూ.3 కోట్ల దందా
తిరుమల తిరుపతి దేవస్థానం (టీటీడీ) ఉద్యోగాల పేరిట భారీ మోసం వెలుగులోకి వచ్చింది. టీటీడీలో ఉద్యోగాలు ఇప్పిస్తానని నమ్మబలికి నిరుద్యోగుల నుంచి కోట్ల రూపాయలు దోచుకున్న మోసగాడిని తిరుపతి ఈస్ట్ పోలీసులు అరెస్ట్ చేశారు. టీటీడీ లోగోతో నకిలీ అపాయింట్మెంట్ లెటర్లు తయారు చేసి, వాటిని చూపిస్తూ బాధితులను మోసం చేసిన ఘటన ఆలస్యంగా బయటపడింది.
తిరుపతి ఈస్ట్ పోలీసుల సమాచారం ప్రకారం, లాయర్గా పరిచయం చేసుకుంటూ నిరుద్యోగులను నమ్మబలికిన కిరణ్ కుమార్ రెడ్డి అనే వ్యక్తి టీటీడీ ఉద్యోగాల పేరుతో మోసాలకు పాల్పడుతున్నాడు. టీటీడీ ప్రొక్యూర్మెంట్ జీఎం సుబ్రమణ్యం ద్వారా ఉద్యోగాలు ఇప్పిస్తానని చెప్పి, టీటీడీ అధికారులతో తనకు పరిచయాలు ఉన్నాయంటూ బాధితులను నమ్మించాడు. ఈ క్రమంలో టీటీడీ లోగోతో నకిలీ అపాయింట్మెంట్ ఆర్డర్లు తయారు చేసి, వాటిని బాధితులకు ఇచ్చాడు.
ప్రతి బాధితుడి నుంచి 15 లక్షల నుంచి 50 లక్షల వరకు వసూలు చేసినట్లు తెలుస్తోంది. ఇప్పటి వరకు బయటపడిన వివరాల ప్రకారం, దాదాపు 25 మంది యువకులు, ఉద్యోగార్థులు ఈ మోసగాడి వలలో చిక్కుకున్నారని పోలీసులు చెబుతున్నారు. మొత్తం మోసపు మొత్తం సుమారు రూ.3 కోట్ల వరకు ఉండొచ్చని ప్రాథమిక అంచనా.
నకిలీ అపాయింట్మెంట్ లెటర్లు చేతిలో పెట్టుకుని, త్వరలోనే జాయినింగ్ ఉంటుందని, కొద్దిరోజులు ఓపిక పట్టాలని బాధితులకు చెప్పి కాలయాపన చేశాడని పోలీసులు తెలిపారు. కొంతకాలం గడిచినా ఉద్యోగాలు రాకపోవడంతో అనుమానం వచ్చిన బాధితులు పరస్పరం మాట్లాడుకుని, లెటర్ల నిజస్వరూపం తెలుసుకునేందుకు టీటీడీ అధికారులను సంప్రదించారు. ఆ సమయంలో అపాయింట్మెంట్ ఆర్డర్లు నకిలీవని, టీటీడీకి సంబంధం లేదని తెలిసి, వెంటనే తిరుపతి పోలీసులకు ఫిర్యాదు చేశారు.
బాధితుల ఫిర్యాదు మేరకు తిరుపతి ఈస్ట్ పోలీసులు కేసు నమోదు చేసి దర్యాప్తు ప్రారంభించారు. సేకరించిన ఆధారాల ఆధారంగా కిరణ్ కుమార్ రెడ్డిని అరెస్ట్ చేసి, అతని వద్ద నుంచి నకిలీ అపాయింట్మెంట్ లెటర్లు, ఇతర పత్రాలను స్వాధీనం చేసుకున్నారు. మోసంలో మరెవరైనా వ్యక్తులు, మధ్యవర్తులు ఉన్నారా అనే కోణంలో కూడా పోలీసులు విచారణ కొనసాగిస్తున్నారు.
టీటీడీ వంటి ప్రముఖ పుణ్యక్షేత్రం పేరును ఉపయోగించి నిరుద్యోగుల ఆశలను దోపిడీ చేసిన ఈ ఘటన స్థానికంగా తీవ్ర చర్చనీయాంశమైంది. ఉద్యోగాల కోసం ప్రయత్నిస్తున్న యువతను లక్ష్యంగా చేసుకుని ఇలాంటి మోసాలు పెరుగుతున్న నేపథ్యంలో, అధికారిక ప్రకటనలు, నోటిఫికేషన్లు కాకుండా వ్యక్తిగత హామీలపై నమ్మకం పెట్టుకోకూడదని పోలీసు వర్గాలు హెచ్చరిస్తున్నాయి.
