రాయలసీమ న్యూస్, తిరుపతి: తిరుపతి: ప్రతిపక్షంలో ఉన్నప్పటికీ ప్రజా సమస్యల పరిష్కారానికి ముఖ్యమంత్రి మాజీ వైఎస్సార్సీపీ అధినేత వైఎస్ జగన్మోహన్రెడ్డి కూటమి ప్రభుత్వంపై ఒత్తిడి తెస్తున్నారని మాజీ మంత్రి ఆర్కే రోజా పేర్కొన్నారు. తిరుపతిలో ఉమ్మడి చిత్తూరు జిల్లా YSRCP సమన్వయకర్తల సమావేశం సోమవారం జరిగింది. ఈ సమావేశంలో రోజా సహా పలువురు పార్టీ నేతలు పాల్గొన్నారు.
స్థానిక సంస్థల ఎన్నికల్లో పార్టీ అనుసరించాల్సిన వ్యూహాలు, భవిష్యత్ కార్యాచరణపై ఈ సమావేశంలో విస్తృతంగా చర్చించినట్లు పార్టీ వర్గాలు తెలిపాయి. గ్రామ, మండల, జిల్లా స్థాయిలో పార్టీ బలపరచడం, కార్యకర్తల సమన్వయం, బూత్ స్థాయి బలగాల పునర్వ్యవస్థీకరణ వంటి అంశాలపై నేతలు అభిప్రాయాలు వ్యక్తం చేశారు.
ఈ నేపథ్యంలో వైఎస్సార్సీపీ శ్రేణులు ప్రజల్లోకి ధైర్యంగా వెళ్లేందుకు సిద్ధంగా ఉండాలని రోజా పిలుపునిచ్చారు. రాష్ట్రంలో ప్రశ్నించే వారిపై అక్రమ కేసులు పెట్టి, రెడ్బుక్ రాజ్యాంగాన్ని నడుపుతున్నారంటూ ఆమె కూటమి ప్రభుత్వంపై విమర్శలు గుప్పించారు. ప్రజాస్వామ్య వ్యవస్థను దెబ్బతీసే విధంగా ప్రభుత్వం వ్యవహరిస్తోందని ఆమె ఆరోపించినట్లు పార్టీ నేతలు తెలిపారు.
డీఎస్సీ పోస్టుల భర్తీ, మెడికల్ కాలేజీల ప్రైవేటీకరణపై కూడా రోజా తీవ్ర వ్యాఖ్యలు చేశారు. డీఎస్సీ ప్రక్రియలో అక్రమాలు, అవకతవకలు జరిగాయనే ఆరోపణలపై సీబీఐ విచారణ జరిపించాలని ఆమె డిమాండ్ చేశారు. అనర్హులను ఉద్యోగాల నుంచి తొలగించేలా ప్రభుత్వం చర్యలు తీసుకోవాలని ఆమె కోరారు.
రాష్ట్రంలో విద్య, వైద్య రంగాలను బలహీనపర్చే విధంగా కూటమి ప్రభుత్వం నిర్ణయాలు తీసుకుంటోందని రోజా విమర్శించినట్లు సమాచారం. మెడికల్ కాలేజీల ప్రైవేటీకరణ నిర్ణయం వెనక్కి తీసుకోవాలని, పేద, మధ్యతరగతి విద్యార్థుల ప్రయోజనాలను కాపాడాలని ఆమె అభిప్రాయపడ్డారు.
రాబోయే స్థానిక సంస్థల ఎన్నికల్లో వైఎస్సార్సీపీ అభ్యర్థులు అన్ని స్థానాల్లో పోటీ చేయాలని రోజా సూచించారు. గ్రామపంచాయతీ, మండల పరిషత్, జిల్లా పరిషత్, మున్సిపల్, కార్పొరేషన్ స్థానాలన్నింటిలోనూ పార్టీ బలంగా రంగంలోకి దిగేందుకు సిద్ధం కావాలని ఆమె పార్టీ శ్రేణులకు సూచించినట్లు పార్టీ వర్గాలు వెల్లడించాయి.
ప్రజా సమస్యలను ఎక్కడైనా, ఏ వేదికలోనైనా బలంగా ప్రస్తావిస్తూ, కూటమి ప్రభుత్వంపై ఒత్తిడి కొనసాగిస్తామని వైఎస్సార్సీపీ నేతలు ఈ సమావేశంలో స్పష్టం చేసినట్లు సమాచారం. తిరుపతి సమావేశం ద్వారా ఉమ్మడి చిత్తూరు జిల్లాలో పార్టీకి కొత్త ఉత్సాహం, దిశా నిర్ధేశం లభించినట్లు నేతలు అభిప్రాయపడ్డారు.
