రాయలసీమ న్యూస్, పొలిటికల్ డెస్క్: తిరుపతి: ఆంధ్రప్రదేశ్‌లో ప్రజా ప్రభుత్వం రెండేళ్ల పాలనలోనే ప్రజలకు నిజమైన స్వేచ్ఛ లభించిందని రాష్ట్ర మంత్రి నారా లోకేశ్ తెలిపారు. ఏపీలో కూటమి ప్రభుత్వం ఏర్పడి రెండేళ్లు పూర్తయిన సందర్భంగా ‘రెండేళ్ల నమ్మకం, అభివృద్ధి, సంక్షేమం’ పేరుతో తిరుపతి సమీపంలోని దామినేడులో గురువారం నిర్వహించిన బహిరంగ సభలో ఆయన ప్రసంగించారు.
ఈ కార్యక్రమానికి ముఖ్యమంత్రి చంద్రబాబు, ఉప ముఖ్యమంత్రి పవన్ కల్యాణ్, భాజపా రాష్ట్ర అధ్యక్షుడు మాధవ్ తదితరులు హాజరయ్యారు. కూటమి ప్రభుత్వం చేపట్టిన అభివృద్ధి, సంక్షేమ కార్యక్రమాలను ప్రజలకు వివరించే లక్ష్యంతో ఈ సభను ఏర్పాటు చేశారు.
రెండేళ్లలో రాష్ట్రంలో చట్టవ్యవస్థ పటిష్ఠంగా నిలిచిందని, గతంలో జరిగినట్లుగా జేసీబీలతో కూల్చివేతలు, దాడులు, హత్యలు, అసభ్య పదజాలంతో దూషణలు లాంటి ఘటనలు చోటుచేసుకోలేదని లోకేశ్ వ్యాఖ్యానించారు. గత ప్రభుత్వ హయాంలో జరిగిన కొన్ని సంఘటనలను ఆయన ఈ సందర్భంగా గుర్తుచేశారు.
“వేంకటేశ్వరస్వామి జోలికి వెళ్లొద్దని నాటి సీఎంను హెచ్చరించా. దేవుడితో పెట్టుకుంటే ఏం జరుగుతుందో ఇవాళ అనుభవిస్తున్నారు. గొడ్డలిపార్టీ అరాచక పాలన చూశాం.. ఎన్నో దారుణాలు జరిగాయి. ఒక్క మాస్క్‌ అడిగినందుకు దళిత వైద్యుడిని చంపేశారు. డ్రైవర్‌ సుబ్రమణ్యాన్ని చంపేసి డోర్‌ డెలివరీ చేసిన ఘటన చూశాం. తెదేపా జెండా లేకుండా చేస్తామని నాడు వైకాపా నేతలు అన్నారు. ఇవాళ ప్రజలే వైకాపా జెండా పీకేశారు.. టీమ్‌ 11 తీర్పు ఇచ్చారు. రప్పా..రప్పా అంటే చూస్తూ ఊరుకునేది లేదు. రెడ్‌ బుక్‌ దాని పని అది చేసుకుంటూ పోతుంది. వైకాపా అరాచకాలు చూస్తూ మౌనంగా ఉండేది లేదు. ఎన్ని ఆర్థిక ఇబ్బందులు ఉన్నా.. హామీలన్నీ నెరవేరుస్తున్నాం. రాయలసీమ అంటే ఎన్టీఆర్‌కు చాలా ప్రేమ. నాడు కరవు వస్తే జోలె పట్టుకుని సీమ ప్రజలను ఆదుకున్నారు. మహిళలకు ప్రత్యేకంగా వర్సిటీ ఏర్పాటు చేశారు. రాయల్‌ సీమను రాయల్‌సీమగా మార్చాం. రాయలసీమలో రత్నాలు పండేలా చేసిన వ్యక్తి మన సీబీఎన్‌. కలియుగ దైవం వేంకటేశ్వరస్వామి సాక్షిగా ప్రజాప్రభుత్వం రెండేళ్ల పాలన పూర్తి చేసుకుంది”
రాయలసీమ అభివృద్ధిలో ఎన్టీఆర్‌, చంద్రబాబు పాత్రను లోకేశ్ ప్రత్యేకంగా ప్రస్తావించారు. కరవు సమయంలో ఎన్టీఆర్‌ ఆ ప్రాంత ప్రజలకు అండగా నిలిచిన విధానాన్ని గుర్తుచేశారు. మహిళల విద్యాభివృద్ధి కోసం ప్రత్యేక విశ్వవిద్యాలయం ఏర్పాటు చేయడం వంటి నిర్ణయాలు రాయలసీమను ముందుకు నడిపించాయని పేర్కొన్నారు.
ప్రస్తుత కూటమి ప్రభుత్వం ఆర్థిక ఇబ్బందులు ఉన్నప్పటికీ ప్రజలకు ఇచ్చిన హామీలను అమలు చేస్తోందని, అభివృద్ధి, సంక్షేమం రెండింటినీ సమతుల్యంగా ముందుకు తీసుకెళ్తోందని ఆయన అభిప్రాయపడ్డారు. ప్రజల నమ్మకానికి తగిన విధంగా పాలన కొనసాగుతుందని లోకేశ్ స్పష్టం చేశారు.
