రాయలసీమ న్యూస్, ఎంటర్టైన్మెంట్ డెస్క్: నటి Samantha తన గర్భధారణ విషయంపై అధికారికంగా స్పష్టత ఇచ్చింది. ఇటీవల విడుదలైన ‘మా ఇంటి బంగారం’ సినిమా విజయోత్సవ వేడుకల్లో బేబీ బంప్తో కనిపించిన సమంతపై అప్పటి నుంచి సోషల్ మీడియాలో గర్భవతి అన్న వార్తలు చక్కర్లు కొడుతున్నాయి. అయితే ఇప్పటివరకు ఈ విషయంపై నేరుగా స్పందించని ఆమె, తాజా కార్యక్రమంలో తనే స్వయంగా మెటర్నిటీ లీవ్ తీసుకుంటున్నానని చెప్పి అభిమానులకు క్లారిటీ ఇచ్చింది.
‘మా ఇంటి బంగారం’ సినిమా విడుదలైన తర్వాత ట్రాలాలా మూవింగ్ పిక్చర్స్ కార్యాలయం వద్ద విజయోత్సవాలు నిర్వహించారు. ఆ వేడుకకు జీన్స్, టీ షర్ట్లో హాజరైన సమంత బేబీ బంప్ స్పష్టంగా కనిపించింది. కేక్ కట్ చేసే సమయంలో ఆమెకు కత్తి ఇవ్వబోతే, తాను కత్తి పట్టకూడదని సమంత చెప్పినట్టు అక్కడున్నవారు తెలిపారు. దీంతో ఆమె గర్భవతి అన్న వార్తలకు మరింత బలం చేకూరింది.
నిన్న రాత్రి జరిగిన ‘మా ఇంటి బంగారం’ సక్సెస్ మీట్లో సమంత మాట్లాడుతున్న సమయంలో, ప్రేక్షకుల మధ్య నుంచి ఆమె ప్రెగ్నెన్సీపై ప్రస్తావన వచ్చింది. దానికి సమంత స్పందిస్తూ, తన గర్భధారణ విషయం రూమర్ కాదని, నిజమేనని పరోక్షంగా అంగీకరించినట్లు అక్కడున్నవారు పేర్కొన్నారు. అనంతరం తాను మెటర్నిటీ లీవ్ తీసుకుంటున్నానని చెప్పి ఈ విషయాన్ని అధికారికంగా ధృవీకరించింది.
నేను మెటర్నిటీ లీవ్ తీసుకుంటున్నా
సమంత గతేడాది డిసెంబరులో దర్శక–నిర్మాత రాజ్ నిడిమోరును వివాహం చేసుకుంది. వివాహం తర్వాత ఆమె చేసిన తొలి చిత్రం ‘మా ఇంటి బంగారం’ బాక్సాఫీస్ వద్ద మంచి విజయాన్ని సాధించింది. ఈ సినిమా రూ.50 కోట్ల క్లబ్బులో చేరినట్టు చిత్రబృందం ప్రకటించింది. వరుసగా మంచి పరిణామాలు జరుగుతున్నాయని భావిస్తున్న సమంత అభిమానులు సోషల్ మీడియాలో ఆనందం వ్యక్తం చేస్తున్నారు.
తన పాత్ర, సినిమా గురించి సమంత మాట్లాడుతూ, రిస్క్ తీసుకోకపోతే ఒక వలయంలోనే పరిమితమైపోతామని, ‘మా ఇంటి బంగారం’లో చేసిన పాత్ర తనకు నిజంగా సవాల్లాంటిదని పేర్కొంది. ఈ ప్రయాణంలో టీమ్ ఎంతో సహకరించిందని ఆమె తెలిపింది. చిరంజీవి నుంచి వచ్చిన ప్రశంసలు తమకు పెద్ద ప్రోత్సాహమని, ఆయన తమ టీమ్తో గంటకు పైగా మాట్లాడారని సమంత చెప్పింది.
ఈ సందర్భంగా సంబంధాల గురించి కూడా సమంత తన అభిప్రాయాన్ని వెల్లడించింది. కొన్ని రిలేషన్షిప్లు సహజంగానే సంక్లిష్టంగా ఉంటాయని, అవి ఒక్కరి చేతుల్లో కాకుండా ఇద్దరి చేతుల్లో ఉంటాయని ఆమె అభిప్రాయం వ్యక్తం చేసింది. ఒక మహిళకు తనపై తానూ నమ్మకం ఉండాలి, అప్పుడు మాత్రమే సరైన వ్యక్తిని గుర్తించగలదని, లేకపోతే తప్పులు జరిగే అవకాశముంటుందని సమంత పేర్కొంది. రిలేషన్షిప్లో ఉన్నవారు ఎదుటి వ్యక్తి తనకు సంపూర్ణత్వం తీసుకురావాలని ఆశించకుండా, ముందుగా తామే పరిపూర్ణ వ్యక్తులుగా మారేందుకు ప్రయత్నించాలని ఆమె సలహా ఇచ్చింది.
