రాయలసీమ న్యూస్, వై.యస్.ఆర్: వై.యస్.ఆర్. కడప జిల్లా ప్రొద్దుటూరు మండలం బొల్లవరం గ్రామానికి చెందిన 88 ఏళ్ల వృద్ధుడు శ్రీ బండి ఆత్మకూరు రామిరెడ్డి దాఖలు చేసిన పిటిషన్పై జమ్మలమడుగు సీనియర్ సిటిజన్స్ ట్రిబ్యునల్ కీలక నిర్ణయం తీసుకుంది. తన ముగ్గురు కుమారుల్లో ఇద్దరు కుమారులైన శ్రీ బండి ఆత్మకూరు నరసింహారెడ్డి, శ్రీ బండి ఆత్మకూరు రామిరెడ్డి పేర్లపై చేసిన గిఫ్ట్ సెటిల్మెంట్ డీడ్లను రద్దు చేయాలన్న వృద్ధుడి విజ్ఞప్తిని ట్రిబ్యునల్ పరిశీలించింది.
విచారణ సందర్భంగా, పిటిషనర్కు చెందిన ఆస్తులను గిఫ్ట్ సెటిల్మెంట్ డీడ్ల ద్వారా పొందిన కుమారులు వృద్ధ తండ్రిని సక్రమంగా పోషించకపోవడం నిర్ధారణైంది. ఆహారం, వైద్యం, నివాసం వంటి ప్రాథమిక అవసరాలు కూడా అందించకుండా నిర్లక్ష్యంగా వ్యవహరించినట్లు ట్రిబ్యునల్ ముందు వెల్లడైంది. ఈ నేపథ్యంలో, ఆస్తుల బదిలీకి సంబంధించిన గిఫ్ట్ సెటిల్మెంట్ డీడ్లు చట్టపరమైన నిబంధనలకు విరుద్ధంగా ఉన్నాయని ట్రిబ్యునల్ అభిప్రాయపడింది.
దీంతో, 16.07.2019న నమోదైన డాక్యుమెంట్ నెం.7524/2019, 7525/2019 గిఫ్ట్ సెటిల్మెంట్ డీడ్లను సీనియర్ సిటిజన్స్ చట్టంలోని సెక్షన్ 23 ప్రకారం చెల్లుబాటు కానివిగా ప్రకటించింది. ఈ డీడ్ల ద్వారా కుమారుల పేర్లకు బదిలీ అయిన సంబంధిత ఆస్తులపై హక్కులు, టైటిల్, ఆసక్తి తదితరాలను తిరిగి పిటిషనర్ అయిన శ్రీ బండి ఆత్మకూరు రామిరెడ్డికి పునరుద్ధరించాలని ట్రిబ్యునల్ ఆదేశించింది.
అంతేకాక, ఈ నిర్ణయానికి అనుగుణంగా రిజిస్ట్రేషన్ మరియు రెవెన్యూ రికార్డుల్లో అవసరమైన మార్పులు చేయాలని సంబంధిత అధికారులను ట్రిబ్యునల్ ఆదేశించింది. గిఫ్ట్ సెటిల్మెంట్ డీడ్ల రద్దు, ఆస్తి హక్కుల పునరుద్ధరణకు సంబంధించిన అన్ని తదుపరి చర్యలను చట్టబద్ధంగా పూర్తి చేయాలని సూచించింది.
వృద్ధుల గౌరవం, సంక్షేమం, భద్రత కోసం అమలులో ఉన్న చట్టం వారికి రక్షణ కల్పిస్తుందని, వృద్ధులను నిర్లక్ష్యం చేసే వారిపై చట్టపరమైన చర్యలు తప్పవని ట్రిబ్యునల్ స్పష్టం చేసింది. వృద్ధుల పోషణ బాధ్యతను నిర్వర్తించకుండా, వారి ఆస్తులను మాత్రమే స్వాధీనం చేసుకోవాలనే ధోరణిని చట్టం సమర్థించదని ఈ తీర్పు ద్వారా మరోసారి వెల్లడైంది.
