రాయలసీమ న్యూస్, పొలిటికల్ డెస్క్: అమరావతి: ఆంధ్రప్రదేశ్ డిప్యూటీ సీఎం పవన్ కళ్యాణ్ రాష్ట్రంలో శాంతిభద్రతల పరిస్థితులపై కఠిన వ్యాఖ్యలు చేశారు. తాను హోం మంత్రి కాదని, లా అండ్ ఆర్డర్ తన పరిధిలోకి రాదని స్పష్టం చేస్తూనే, రాష్ట్రంలో రూల్ ఆఫ్ లా బలంగా నిలవాల్సిన అవసరం ఉందని ఆయన అభిప్రాయపడ్డారు. నేరస్తులను కుల కళ్లజోడుతో చూడకూడదని, క్రిమినల్స్‌కు కులం ఉండదని పవన్ కళ్యాణ్ పేర్కొన్నారు.
తాను హోం మినిస్టర్ కాకపోవడం, లా అండ్ ఆర్డర్ తన పరిధిలో లేకపోవడం క్రిమినల్స్ అదృష్టమని పవన్ కళ్యాణ్ వ్యాఖ్యానించారు. గత రెండేళ్లుగా తాను చాలా సహనంగా వ్యవహరించానని, ఇకపై గుండాలు, నేరగాళ్ల విషయంలో కఠిన వైఖరి అవలంబించేందుకు సిద్ధంగా ఉన్నట్టు ఆయన హెచ్చరించారు.
ఒక తల్లి తన బిడ్డ కనిపించడం లేదని ఆవేదన వ్యక్తం చేసిన ఘటనను పవన్ కళ్యాణ్ ప్రస్తావించారు. బాధితుల హక్కులను గుర్తించి, వారికి న్యాయం జరిగేలా చూడాల్సిన బాధ్యత ప్రభుత్వంపై ఉందని ఆయన సూచించారు. ప్రతి సంఘటనకు కులాన్ని ముడిపెట్టడం సరైన పద్ధతి కాదని, సమాజాన్ని విభజించే కుల రాజకీయాలు రాష్ట్రానికి హానికరమని పవన్ విమర్శించారు.
తాను ఎప్పుడూ కుల గొడవలను ప్రోత్సహించలేదని, తనను కుల చట్రంలో బంధించేందుకు ప్రయత్నాలు జరుగుతున్నాయని పవన్ కళ్యాణ్ ఆరోపించారు. సమాజాన్ని బలహీనపరచడానికి తాను రాజకీయాల్లోకి రాలేదని ఆయన స్పష్టం చేశారు. గుండాలపై కఠిన చర్యలు తీసుకునే విషయంలో ఇకపై వెనుకడుగు వేయబోమని పవన్ సంకేతాలు ఇచ్చారు.
వైఎస్సార్ కాంగ్రెస్ పార్టీ పట్ల విధేయత చూపుతున్న అధికారులపై ప్రత్యేక దృష్టి పెట్టనున్నట్టు పవన్ కళ్యాణ్ హెచ్చరించారు. ఇప్పటి వరకు కొన్ని అంశాల్లో మౌనం పాటించినప్పటికీ, ఇకపై ప్రజల ముందే తన అభిప్రాయాలను బహిర్గతం చేస్తానని ఆయన తెలిపారు. ప్రజా సమస్యల పరిష్కారంలో ప్రభుత్వ వ్యవస్థ బాధ్యతాయుతంగా వ్యవహరించాల్సిన అవసరాన్ని ఆయన రेखాంఖితం చేశారు.
జనసేన ఎమ్మెల్యేలు, ఎంపీలు మరింత చురుకుగా వ్యవహరించాలని పవన్ కళ్యాణ్ సూచించారు. ప్రతి సమస్యకు తాను వ్యక్తిగతంగా వెళ్లడం సాధ్యం కాదని, ప్రజా సమస్యలపై పార్టీ ప్రజాప్రతినిధులు ముందుండాలని ఆయన పిలుపునిచ్చారు. ప్రజల మధ్య ఉండి, వారి సమస్యలను ప్రభుత్వ దృష్టికి తీసుకెళ్లే బాధ్యత జనసేన ప్రజాప్రతినిధులదేనని పవన్ అభిప్రాయపడ్డారు.
తప్పుడు ఎస్సీ, ఎస్టీ అట్రాసిటీ కేసులను నిరోధించాల్సిన అవసరం ఉందని పవన్ కళ్యాణ్ పేర్కొన్నారు. కొన్ని కేసుల్లో రాజకీయ ప్రయోజనాల కోసం వ్యవహరిస్తున్నారని ఆయన ఆరోపించారు. ఈ క్రమంలో సుగాలి ప్రీతి, వైఎస్ వివేకానంద రెడ్డి కేసులను పవన్ కళ్యాణ్ ప్రస్తావించారు.
రాష్ట్రంలో లా అండ్ ఆర్డర్ బలంగా ఉండాలని, రూల్ ఆఫ్ లా ను దృఢంగా నిలబెట్టాలని పవన్ కళ్యాణ్ అన్నారు. కులాలకు, మతాలకు వాట్సాప్ గ్రూపులు ఉన్నప్పుడు, లా అండ్ ఆర్డర్ నిర్వహణకు ఎందుకు అలాంటి వ్యవస్థ ఉండకూడదని ఆయన ప్రశ్నించారు. గుండాల తొక్కి నార తీసేంత కఠినంగా వ్యవహరించేందుకు తాను సిద్ధంగా ఉన్నట్టు పవన్ కళ్యాణ్ స్పష్టం చేశారు.
