రాయలసీమ న్యూస్, అన్నమయ్య: అన్నమయ్య జిల్లా రాయచోటి పట్టణంలో జరిగిన విద్యుత్ ప్రమాదంలో ఒకరు మృతి చెందగా, నలుగురు గాయపడ్డారు. ఆటో నగర్ సమీపంలో ఐరన్ బంకు తరలిస్తున్న సమయంలో ఈ దుర్ఘటన చోటుచేసుకుంది. మృతుడు, గాయపడినవారు మహబూబ్ నగర్‌కు చెందినవారిగా గుర్తించారు.
పోలీసులు, స్థానికుల సమాచారం మేరకు.. రాయచోటి ఆటో నగర్ ప్రాంతంలో సోమవారం మధ్యాహ్నం ఐరన్ బంకును వాహనంపై తరలిస్తున్నారు. ఈ క్రమంలో బంకు పైభాగం మెయిన్ లైన్ విద్యుత్ తీగలకు తగలడంతో ఒక్కసారిగా విద్యుత్ ప్రవాహం దూసుకెళ్లింది. అక్కడే ఉన్న ఆరుగురికి విద్యుత్ షాక్ తగిలింది. వారిలో ఒకరు అక్కడికక్కడే మృతి చెందగా, మరికొందరు తీవ్రంగా గాయపడ్డారు.
స్థానికులు వెంటనే స్పందించి క్షతగాత్రులను రాయచోటి ప్రభుత్వ ఏరియా ఆసుపత్రికి తరలించారు. వైద్యులు గాయపడిన వారికి చికిత్స అందిస్తున్నారు. ప్రమాదంలో మరణించిన వ్యక్తి మృతదేహాన్ని పంచనామ నిమిత్తం ఆసుపత్రి మార్చురీకి తరలించారు.
ఈ ఘటనలో గాయపడి చికిత్స పొందుతున్న మహమ్మద్ వివరాల ప్రకారం, ఐరన్ బంకు తరలించే సమయంలో జాగ్రత్తలు పాటించకపోవడం వల్లే ప్రమాదం జరిగిందని ప్రాథమికంగా భావిస్తున్నారు. మెయిన్ లైన్ విద్యుత్ తీగల ఎత్తు, బంకు ఎత్తు మధ్య తగిన దూరం లేకపోవడం కూడా కారణంగా పోలీసులు అనుమానిస్తున్నారు.
సమాచారం అందుకున్న రాయచోటి పోలీసులు సంఘటనా స్థలానికి చేరుకుని పరిశీలించారు. ప్రమాదానికి సంబంధించిన పూర్తి వివరాలు తెలుసుకునేందుకు విచారణ చేపట్టారు. మృతుడి కుటుంబ సభ్యులకు సమాచారం అందజేశారు. కేసు నమోదు చేసి దర్యాప్తు కొనసాగిస్తున్నట్లు పోలీసులు తెలిపారు.
ఈ ఘటనతో ఆటో నగర్ పరిసర ప్రాంతంలో ఒకింత ఆందోళన నెలకొంది. విద్యుత్ లైన్ల సమీపంలో భారీ ఇనుము సామగ్రి తరలింపులో జాగ్రత్తలు తీసుకోవాలని అధికారులు హెచ్చరిస్తున్నారు. ఇలాంటి ప్రమాదాలు పునరావృతం కాకుండా సంబంధిత శాఖలు ముందస్తు చర్యలు తీసుకోవాల్సిన అవసరం ఉందని స్థానికులు అభిప్రాయపడుతున్నారు.
