రాయలసీమ న్యూస్, చిత్తూరు: చిత్తూరు జిల్లా జడ్పీ కార్యాలయంలో జిల్లా కలెక్టర్, జిల్లా ఎన్నికల అధికారి సుమిత్ కుమార్‌ను మాజీ మంత్రి ఆర్.కే. రోజా సోమవారం కలిశారు. నగరి మున్సిపల్ చైర్మన్‌ను ఏకగ్రీవంగా ప్రకటించిన విధానంపై ఆమె ఫిర్యాదు చేశారు. ఈ సందర్భంగా నగరి మున్సిపాలిటీ ఎన్నికల అధికారి, మున్సిపల్ కమిషనర్ & RO పై క్రిమినల్ కేసు నమోదు చేయాలని, వారిని సస్పెండ్ చేయాలని కలెక్టర్‌ను కోరారు.
నగరి మున్సిపాలిటీ చైర్మన్ పదవికి సంబంధించి ఏకగ్రీవ ప్రకటనపై చట్టపరమైన అభ్యంతరాలు ఉన్నాయని ఆర్.కే. రోజా కలెక్టర్ దృష్టికి తీసుకెళ్లినట్లు సమాచారం. ఎన్నికల ప్రక్రియను పక్కన పెట్టి చైర్మన్‌ను ఏకగ్రీవంగా ప్రకటించడం సరైన విధానం కాదని, దీనిపై విచారణ జరిపి బాధ్యులపై చర్యలు తీసుకోవాలని ఆమె డిమాండ్ చేశారు.
ఈ సందర్భంగా బాలకృష్ణన్ హైకోర్టులో దాఖలు చేసిన హౌస్ మోషన్ పిటిషన్ ప్రతిని కూడా కలెక్టర్‌కు ఆర్.కే. రోజా అందించారు. నగరి మున్సిపాలిటీ చైర్మన్ ఎంపికపై హైకోర్టులో ఇప్పటికే చట్టపరమైన పోరాటం కొనసాగుతోందని, ఆ పిటిషన్ వివరాలను జిల్లా ఎన్నికల అధికారికి తెలియజేశారు.
నగరి మున్సిపాలిటీ ఎన్నికల్లో వైఎస్ఆర్ కాంగ్రెస్ పార్టీ అభ్యర్థి పేరును ఫార్మ్ 4లో చేర్చాలని ఆర్.కే. రోజా కలెక్టర్‌ను కోరారు. చైర్మన్ పదవికి ఎన్నికలు నిర్వహించేలా చర్యలు తీసుకోవాలని, ప్రజాస్వామ్య విధానాలకు విరుద్ధంగా ఏకగ్రీవ ప్రకటనలు చేయకుండా చూడాలని ఆమె అభ్యర్థించారు.
నగరి మున్సిపాలిటీ ఎన్నికల ప్రక్రియ, చైర్మన్ ఎంపికపై వచ్చిన ఈ తాజా పరిణామాలతో చిత్తూరు జిల్లాలో రాజకీయ వాతావరణం కాస్త ఉద్రిక్తంగా మారింది. మాజీ మంత్రి ఆర్.కే. రోజా ఫిర్యాదుపై జిల్లా కలెక్టర్, జిల్లా ఎన్నికల అధికారి సుమిత్ కుమార్ ఏ నిర్ణయం తీసుకుంటారన్నది ఆసక్తికరంగా మారింది.
