రాయలసీమ న్యూస్, చిత్తూరు: చిత్తూర్: ప్రతిభకు వైకల్యం అడ్డు కాదని, పట్టుదలతో కృషి చేస్తే ఉన్నత స్థాయికి ఎదగవచ్చని జిల్లా కలెక్టర్ సుమిత్ కుమార్ పేర్కొన్నారు. చిత్తూరు జిల్లా విభిన్న ప్రతిభావంతుల శాఖ ఆధ్వర్యంలో శుక్రవారం కలెక్టరేట్లోని PGRS సమావేశ మందిరంలో నిర్వహించిన కార్యక్రమంలో 59 మంది దివ్యాంగులకు ఉచితంగా మూడు చక్రాల స్కూటర్లను పంపిణీ చేశారు.
ఈ కార్యక్రమంలో జిల్లా కలెక్టర్ సుమిత్ కుమార్, చిత్తూరు ఎమ్మెల్యే గురుజాల జగన్మోహన్ పాల్గొన్నారు. దివ్యాంగుల జీవన ప్రమాణాలను మెరుగుపరచడమే లక్ష్యంగా ఈ పంపిణీ చేపట్టినట్లు అధికారులు తెలిపారు. కార్యక్రమానికి హాజరైన లబ్ధిదారులు ఆనందం వ్యక్తం చేశారు.
ఈ సందర్భంగా కలెక్టర్ సుమిత్ కుమార్ మాట్లాడుతూ దివ్యాంగుల సంక్షేమానికి ప్రభుత్వం అనేక పథకాలు, సహాయక పరికరాలను అందిస్తున్నదని వివరించారు. వాటిని సద్వినియోగం చేసుకుని స్వయం సమృద్ధి దిశగా ముందుకు సాగాలని దివ్యాంగులను సూచించారు. ఒక్కో వాహనం సుమారు రూ.1.20 లక్షల విలువైనదని, ఆన్లైన్ దరఖాస్తులు, సర్టిఫికెట్ల పరిశీలన అనంతరం పారదర్శకంగా అర్హులను ఎంపిక చేసినట్లు తెలిపారు.
దివ్యాంగుల అవసరాలను దృష్టిలో పెట్టుకుని, వారి చలనం సులభతరం చేయడంలో మూడు చక్రాల స్కూటర్ల పంపిణీ కీలక పాత్ర పోషిస్తుందని కలెక్టర్ అభిప్రాయపడ్డారు. భవిష్యత్తులో మరిన్ని దివ్యాంగులను ఈ తరహా పథకాల ద్వారా ప్రోత్సహించే దిశగా చర్యలు కొనసాగుతాయని అధికార వర్గాలు సూచించాయి.
ఎమ్మెల్యే గురుజాల జగన్మోహన్ మాట్లాడుతూ దివ్యాంగుల సంక్షేమానికి కూటమి ప్రభుత్వం ప్రత్యేక ప్రాధాన్యత ఇస్తోందని తెలిపారు. ఇప్పటికే జిల్లాలో సుమారు 4,000 మంది దివ్యాంగులకు వివిధ సహాయక పరికరాలను అందించినట్లు వివరించారు. రాఖీ పౌర్ణమి సందర్భంగా దివ్యాంగులకు స్కూటర్లు, ట్రైసైకిళ్లు అందించడం ఆనందంగా ఉందని పేర్కొన్నారు.
దివ్యాంగుల కోసం ప్రభుత్వం అమలు చేస్తున్న పథకాలపై అవగాహన పెంచేందుకు గ్రామ స్థాయిలో కూడా ప్రచార కార్యక్రమాలు నిర్వహించాలని ప్రజా ప్రతినిధులు, అధికారులు సూచించారు. ఈ కార్యక్రమంలో సంబంధిత శాఖల అధికారులు, సిబ్బంది, లబ్ధిదారుల కుటుంబ సభ్యులు పాల్గొన్నారు.
