రాయలసీమ న్యూస్, వై.యస్.ఆర్: రాష్ట్ర ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ ప్రొద్దుటూరు పర్యటనను దృష్టిలో పెట్టుకుని రవాణా సౌకర్యాలపై APSRTC అధికారులు ఎమ్మెల్యే నంద్యాల వరదరాజుల రెడ్డితో చర్చించారు. ఈ సమావేశం ఎమ్మెల్యే స్వగృహం కామనూరు రాధానగర్‌లో జరిగింది.
ఎమ్మెల్యే నంద్యాల వరదరాజుల రెడ్డి నివాసానికి APSRTC కడప జోనల్ చైర్మన్ మరియు అనంతపురం జిల్లా పార్లమెంటు అధ్యక్షులు శ్రీ పూల నాగరాజు, జోన్–4 ఎగ్జిక్యూటివ్ డైరెక్టర్ శ్రీ ఆర్.ఆర్.కె. కిషోర్, రీజనల్ మేనేజర్ శ్రీ పి. రమేష్ బాబు, కడప ఎగ్జిక్యూటివ్ ఇంజనీర్ శ్రీ పోతూ రాజు, ప్రొద్దుటూరు డిపో మేనేజర్ శ్రీ కె.వి. గంగాధర్, చీఫ్ సెక్యూరిటీ ఇన్స్పెక్టర్ శ్రీ ప్రవీణ్ కుమార్ మర్యాదపూర్వకంగా వెళ్లి కలిశారు.
ఈ సందర్భంగా ఈ నెల 5న జరగనున్న ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ ప్రొద్దుటూరు పర్యటనకు సంబంధించి ప్రజలకు అందించాల్సిన రవాణా సౌకర్యాలపై అధికారులు ఎమ్మెల్యేతో సమగ్రంగా చర్చించారు. పర్యటన రోజున ప్రొద్దుటూరు పట్టణం మరియు పరిసర ప్రాంతాల నుంచి పెద్ద సంఖ్యలో ప్రజలు తరలివచ్చే అవకాశం ఉన్న నేపథ్యంలో బస్సు సర్వీసుల నిర్వహణ, అదనపు సర్వీసుల ఏర్పాటు, ట్రాఫిక్ నియంత్రణ వంటి అంశాలపై సమావేశంలో దృష్టి పెట్టినట్లు సమాచారం.
ప్రొద్దుటూరు డిపో పరిధిలో నడిచే సాధారణ సర్వీసులకు అంతరాయం కలగకుండా, పర్యటనకు వచ్చే ప్రజలకు కూడా ఇబ్బంది లేకుండా ఉండే విధంగా రవాణా ప్రణాళికను రూపొందించేందుకు అధికారులు ఎమ్మెల్యే సూచనలు, స్థానిక పరిస్థితులపై ఆయన అభిప్రాయాలను తెలుసుకున్నారు. ముఖ్యంగా రూట్ల ఎంపిక, బస్సుల నిలిపే ప్రదేశాలు, భద్రతా చర్యలు, మహిళలు, వృద్ధులు, దివ్యాంగులకు సౌకర్యాలు వంటి అంశాలపై చర్చ సాగినట్లు తెలిసింది.
పర్యటన రోజున APSRTC సిబ్బంది పూర్తి సమన్వయంతో పనిచేసేలా ముందస్తు ఏర్పాట్లు, డ్యూటీ చార్టులు, కంట్రోల్ రూమ్ వ్యవస్థపై కూడా సమావేశంలో చర్చ జరిగినట్లు వర్గాలు పేర్కొన్నాయి. ప్రొద్దుటూరు పర్యటన విజయవంతం కావడానికి రవాణా వ్యవస్థ కీలకమని భావించిన APSRTC అధికారులు, స్థానిక ప్రజాప్రతినిధులతో సమన్వయం పెంచేందుకు ఈ సమావేశాన్ని ఉపయోగించుకున్నట్లు తెలుస్తోంది.
