రాయలసీమ న్యూస్, వై.యస్.ఆర్: జమ్మలమడుగు : వై.ఎస్.ఆర్. కడప జిల్లాలోని జమ్మలమడుగు అర్బన్ పరిధిలో అంజనేయపురం గ్రామంలో రోడ్డు భద్రత, సైబర్ నేరాలు, దొంగతనాల నివారణపై పోలీసు శాఖ ఆధ్వర్యంలో అవగాహన కార్యక్రమం నిర్వహించారు. జిల్లా ఎస్పీ శ్రీ షెల్కే నచికేత్ విశ్వనాథ్, ఐ.పి.ఎస్. ఆదేశాల మేరకు ప్రజలకు మరింత చేరువై, వారి భద్రతకు భరోసా కల్పిస్తూ నేరాల నియంత్రణపై అవగాహన పెంపొందించే చర్యల్లో భాగంగా ఈ కార్యక్రమం చేపట్టినట్లు జిల్లా పోలీస్ కార్యాలయం తెలిపింది.
జమ్మలమడుగు అర్బన్ సి.ఐ నరేష్ బాబు ఆధ్వర్యంలో, ఎస్.ఐ సత్యనారాయణతో పాటు పోలీసు సిబ్బంది అంజనేయపురం గ్రామాన్ని సందర్శించారు. గ్రామస్తులతో మమేకమై వారి సమస్యలను అడిగి తెలుసుకున్నారు. అనంతరం రోడ్డు భద్రత, సైబర్ నేరాల నివారణ, దొంగతనాల నియంత్రణ తదితర అంశాలపై ప్రజలకు విస్తృతంగా అవగాహన కల్పించారు.
వాహనదారులు తప్పనిసరిగా ట్రాఫిక్ నియమాలు పాటించాలని, ద్విచక్ర వాహనదారులు హెల్మెట్ ధరించడం అలవాటు చేసుకోవాలని పోలీసు అధికారులు సూచించారు. అతివేగంగా వాహనాలు నడపడం, మద్యం సేవించి వాహనాలు నడపడం వంటి ప్రమాదకర చర్యలకు దూరంగా ఉండాలని ప్రజలను హెచ్చరించారు. చిన్నపాటి నిర్లక్ష్యమే ప్రాణాంతక రోడ్డు ప్రమాదాలకు దారితీయవచ్చని అధికారులు స్పష్టం చేశారు.
సైబర్ నేరాల విషయంలో ప్రజలు అప్రమత్తంగా ఉండాలని, గుర్తు తెలియని వ్యక్తుల ఫోన్ కాల్స్, అనుమానాస్పద లింకులు, సందేశాలను నమ్మి వ్యక్తిగత వివరాలు, బ్యాంకు ఖాతా సమాచారం, ఓటీపీలు ఎట్టి పరిస్థితుల్లోనూ తెలియజేయవద్దని పోలీసు శాఖ సూచించింది. సైబర్ మోసాలకు గురైన వెంటనే 1930 హెల్ప్లైన్కు సమాచారం అందించాలని ప్రజలకు వివరించారు.
ఇళ్లకు తాళాలు వేసి ఎక్కువ రోజులు బయటకు వెళ్లే సందర్భాల్లో స్థానిక పోలీసులకు ముందస్తుగా సమాచారం ఇవ్వాలని, గ్రామంలో లేదా పరిసర ప్రాంతాల్లో అనుమానాస్పద వ్యక్తుల కదలికలను గమనిస్తే వెంటనే పోలీసులకు తెలియజేయాలని అధికారులు కోరారు. ఈ విధంగా ప్రజల భాగస్వామ్యంతోనే నేరాల నియంత్రణ, సురక్షిత సమాజ నిర్మాణం సాధ్యమవుతుందని జమ్మలమడుగు పోలీసులు పేర్కొన్నారు.
జిల్లా పోలీస్ కార్యాలయం, కడప నుంచి విడుదల చేసిన ప్రకటనలో ఇటువంటి అవగాహన కార్యక్రమాలను జిల్లాలోని ఇతర గ్రామాల్లో కూడా కొనసాగిస్తామని, ప్రజల సహకారంతో నేరాల నియంత్రణ లక్ష్యాన్ని సాధించేందుకు కృషి చేస్తామని వెల్లడించారు.
