రాయలసీమ న్యూస్, ఇంటర్నేషనల్ డెస్క్:
అమెరికా–ఇరాన్ అవగాహనకు మోదీ స్వాగతం
పశ్చిమాసియాలో నెలల తరబడి కొనసాగిన ఉద్రిక్తతలకు ముగింపు పలికే దిశగా అమెరికా–ఇరాన్ మధ్య కీలక అవగాహన కుదిరింది. ఇరు దేశాలు కాల్పుల విరమణ పాటిస్తూ శాంతి ఒప్పందం చేసుకోవాలని నిర్ణయించుకున్న నేపథ్యంలో, ఈ పరిణామాన్ని భారత ప్రధాని నరేంద్ర మోదీ స్వాగతించారు. ఈ మేరకు ఆయన తన ఎక్స్‌ ఖాతాలో ఒక పోస్టు చేశారు.
పశ్చిమాసియాలో నెలకొన్న ఈ సంక్షోభం ప్రపంచవ్యాప్తంగా ఆర్థిక వ్యవస్థలపై గణనీయమైన ప్రభావం చూపిందని, అనేక దేశాల్లో ప్రాణనష్టం కూడా సంభవించిందని మోదీ పేర్కొన్నారు. అమెరికా–ఇరాన్ మధ్య కుదిరిన ఈ అవగాహన అమలులోకి వస్తే, ప్రాంతంలో శాంతి, స్థిరత్వం పునరుద్ధరించడమే కాకుండా ప్రపంచ వాణిజ్య మార్గాలకు కూడా ఊరట లభిస్తుందని ఆయన ఆశాభావం వ్యక్తం చేశారు.
“పశ్చిమాసియాలో జరిగిన ఘర్షణను ముగించేందుకు అమెరికా–ఇరాన్ మధ్య కుదిరిన అవగాహనను నేను స్వాగతిస్తున్నాను. ఇది ప్రపంచవ్యాప్తంగా ఆర్థిక అంతరాయాలను కలిగించింది, అనేక దేశాల్లో ప్రాణనష్టానికి కారణమైంది. ఈ ఒప్పందం అమలైతే ప్రాంతంలో శాంతి, స్థిరత్వం పునరుద్ధరించబడుతుంది. కీలక సముద్ర మార్గాల ద్వారా వాణిజ్యం సజావుగా కొనసాగుతుంది. ఈ అవగాహన అమలు పశ్చిమాసియాలో శాంతి, స్థిరత్వాన్ని తీసుకురావడమే కాకుండా వాణిజ్య నౌకా మార్గాల్లో స్వేచ్ఛాయుత రవాణాను నిర్ధారిస్తుందని మేము ఆశిస్తున్నాం” అని ప్రధాని మోదీ తెలిపారు.
మిగిలిన అంశాలపై అమెరికా–ఇరాన్ మధ్య జరగబోయే చర్చలు స్థిరమైన, దీర్ఘకాలిక ఒప్పందానికి దారితీయాలని కూడా మోదీ ఆకాంక్షించారు.
ప్రస్తుతం నరేంద్ర మోదీ స్లోవేకియా పర్యటనలో ఉన్నారు. 1993 తర్వాత ఆ దేశాన్ని సందర్శిస్తున్న భారత ప్రధాని ఆయనే కావడం విశేషం. ఫ్రాన్స్‌ నుంచి అక్కడికి చేరుకున్న మోదీకి, స్థానికంగా వందేమాతరం ఆలపిస్తూ ఘన స్వాగతం లభించింది.
ఇక అమెరికా–ఇరాన్ డీల్‌కు సంబంధించి కొన్ని మీడియా సంస్థల నివేదికల ప్రకారం, ఈ ఫ్రేమ్‌వర్క్‌లో పలు కీలక అంశాలు చోటుచేసుకున్నాయి. హర్ముజ్ జలసంధి ద్వారా నౌకా రవాణా పునరుద్ధరణ, ఇరాన్ అణు కార్యక్రమంపై చర్చలను తిరిగి ప్రారంభించడం, తాత్కాలిక ఆంక్షల సడలింపు, అలాగే ఇరాన్‌కు నిలిచిపోయిన ఆస్తుల విడుదల వంటి అంశాలు ఇందులో భాగమని సమాచారం.
హర్ముజ్ జలసంధి ప్రపంచ చమురు రవాణాలో అత్యంత కీలక సముద్ర మార్గం కావడంతో, ఈ ఒప్పందం భారత్ వంటి దేశాలకు ప్రత్యేక ప్రాధాన్యం సంతరించుకుంది. చమురు దిగుమతులపై అధికంగా ఆధారపడే భారత్‌కు ఈ మార్గంలో ఉద్రిక్తతలు తగ్గితే ఇంధన ధరలపై ఉన్న ఒత్తిడి తగ్గే అవకాశం ఉందని విశ్లేషకులు భావిస్తున్నారు.
